ខេត្តកែប ៖ មានករណីភ្ញាក់ផ្អើលមួយកាលពីវេលាម៉ោង៥និង១០នាទីល្ងាចថ្ងៃទី១៧ ខែសីហា ឆ្នាំ២០១៨ ខណៈម្ចាស់ផ្ទះជួយឆោឡោដោយសារជនបរទេសម្នាក់ដេកស្លាប់ក្នុងផ្ទះជួលរបស់ខ្លួន ដោយមិនដឹងមូលហេតុ ។ ហេតុការណ៍ភ្ញាក់ផ្អើលខាងលើបានកើតឡើងត្រង់ចំណុចផ្ទះជួលមួយកន្លែង ស្ថិតក្នុងភូមិថ្មី…
ខេត្តកែប ៖ មានករណីភ្ញាក់ផ្អើលមួយកាលពីវេលាម៉ោង៥និង១០នាទីល្ងាចថ្ងៃទី១៧ ខែសីហា ឆ្នាំ២០១៨ ខណៈម្ចាស់ផ្ទះជួយឆោឡោដោយសារជនបរទេសម្នាក់ដេកស្លាប់ក្នុងផ្ទះជួលរបស់ខ្លួន ដោយមិនដឹងមូលហេតុ ។ ហេតុការណ៍ភ្ញាក់ផ្អើលខាងលើបានកើតឡើងត្រង់ចំណុចផ្ទះជួលមួយកន្លែង ស្ថិតក្នុងភូមិថ្មី សង្កាត់ព្រៃធំ ក្រុងកែប ខេត្តកែប ។
តាមប្រភពព័ត៌មានពីម្ចាស់ផ្ទះឈ្មោះ យ៉ាវ ពេន ភេទប្រុស មុខរបរកសិករ រស់នៅក្នុងភូមិកើតហេតុខាងលើបានឲ្យដឹងថា ជនបរទេសដែលស្លាប់នេះទើបតែមកជួលផ្ទះរបស់គាត់ស្នាក់នៅបានតែ២ថ្ងៃប៉ុណ្ណោះ ដោយបុរសបរទេសរងគ្រោះបានមកជួលស្នាក់អាស្រ័យនៅវេលាម៉ោង៤រសៀល ថ្ងៃទី១៥ ខែសីហា ឆ្នាំ២០១៨ ក្នុង១ខែតម្លៃ១៥០ដុល្លារ ហើយក៏មិនទាន់បានបំពេញឯកសារ និងថតលិខិតឆ្លងដែននៅឡើយទេ ។ ម្ចាស់ផ្ទះបានបន្តថា ការប្រទះឃើញជនរងគ្រោះស្លាប់នេះដោយសាររូបគាត់មិនឃើញបុរសរងគ្រោះចេញមកអង្គុយលេងនៅមុខផ្ទះដូចរយៈពេលមុន ទើបមានការសង្ស័យទៅអើតមើលតាមមាត់បង្អួចក៏ឃើញជនបរទេសនោះដេកមិនកម្រើកសោះទើបរាយការណ៍ប្រាប់សមត្ថកិច្ចតែម្តង ។
ទាក់ទិននឹងករណីបុរសជនបរទេសស្លាប់ខាងលើសមត្ថកិច្ចដែលកំពុងធ្វើកោសល្យវិច្ច័យសព បានឲ្យដឹងថា ជនបរទេសដែលស្លាប់ខាងលើមានឈ្មោះ ECHTERNACHT FRIEDRICH WILHELM អាយុ៥១ឆ្នាំ ជនជាតិអាឡឺម៉ង់ មុខរបរអ្នកទេសចរណ៍ កាន់លិខិតឆ្លងដែនលេខ C2Uk33NHID <<6709246M2802149<<< ។
ចំពោះការត្រួតពិនិត្យនៅលើខ្លួនសព គឺគ្មានអី្វគួរឲ្យសង្ស័យនោះទេ ដោយជនរងគ្រោះបានបន្សល់ទុកនូវកូនកាបូបមួយមានប្រាក់ដុល្លារចំនួន៥០ដុល្លារ និងប្រាក់រៀលចំនួន៤៥៩០០រៀល ម៉ាស៊ីនថតមួយគ្រឿង ទូរស័ព្ទម៉ាកហូវៃមួយគ្រឿង រួម និងលិខិតឆ្លងដែនផងដែរ ។
ក្រោយពីត្រួតពិនិត្យសមត្ថកិច្ចបានសន្និដ្ឋានថា ជនបរទេសនេះស្លាប់ បណ្តាលមកពីជំងឺគាំងបេះដូង ខណៈដែលជនរងគ្រោះផឹកស្រាច្រើនហួសកម្រិត ។ បច្ចុប្បន្នសពជនបរទេសត្រូវបានសមត្ថកិច្ចកំពុងទំនាក់ទំនងទៅខាងស្ថានទូតឲ្យមកទទួល ដើម្បីប្រគល់សពជូនទៅក្រុមគ្រួសារនៅប្រទេសអាឡឺម៉ង់ ៕
ចែករំលែកព័តមាននេះ