រាជធានីភ្នំពេញ ៖ រដ្ឋលេខាធិការក្រសួងវប្បធម៌ និងវិចិត្រសិល្បៈលោកថៃ នរៈសត្យា បានផ្តែផ្តាំដល់តារាមួយដែលនិយមភាពសិចស៊ី កុំខ្លាចការរិះគន់ពីមហាជន បើទោះបីវាជាសិទ្ធិរបស់ខ្លួនក៏ដោយ ។ ការលើកឡើងនេះបន្ទាប់ពីមួយរយៈចុងក្រោយនេះអ្នកនាងស្រីម៉ុច និងថៃ ស្រីនាង ជាដើមបានបង្ហាញភាពសិចស៊ីហួសប្រមាណជាសាធារណៈ ហើយរងការរិះគន់ខ្លាំង ។
ជាមួយនឹងអ្វីដែលខ្លួនបានប្រព្រឹត្ត ហើយថា សិទ្ធិបុគ្គលនោះ លោកថៃ នរៈសត្យា បានផ្តាំកុំឲ្យតារាទាំងនោះកុំខ្លាចការរិះគន់ ដ្បិតខ្លួនជាបុគ្គលសាធារណៈ ។ សំណេរដែលបានបង្ហោះតាមហ្វេសប៊ុកកាលពីថ្ងៃទី១៧ សីហា ២០១៨ លោកថៃ នរៈសត្យា បានលើកឡើងថា «ជាមនុស្សមិនមែនមិនដឹងថា យ៉ាងម៉េចមិនល្អ យ៉ាងម៉េចល្អ យ៉ាងម៉េចមិនថ្លៃថ្នូរ យ៉ាងម៉េចមិនសម យ៉ាងម៉េចអាសអាភាស…នោះទេ ! អារឿងតុបតែងខ្លួនក៏អ៊ីចឹងដែរ តែអ្នកខ្លះដូចជាមិនមែនតុបតែងទេ គឺដូចជាបកចេញ ឬបើកបង្ហាញទៅវិញសោះ។
តារាៗខ្លះគេអាចយកលេសសិទ្ធិសេរីភាពមកនិយាយ ការពារអំពើរបស់គេដូចជាការស្លៀកពាក់បញ្ចេញកន្លុកកន្លៀតហួសហេតុស្ទើរអាក្រាត តែគេក៏មិនអាចបិទសិទ្ធិសេរីភាពរបស់មហាជនមិនឲ្យរិះគន់ ជេរប្រទេចពួកគាត់ថាបានជាន់ឈ្លីប្រពៃណីដ៏ល្អផូរផង់របស់ជាតិខ្មែរបានដែរ ។ ដូចនេះបើមហាជនមានការរិះគន់ ជេរប្រទេចដូចខាងលើ មេត្តាកុំអាក់អន់ស្រពន់ចិត្តអី ដោយហេតុថាលទ្ធផលនេះគឺទទួលបានមកពីអំពើប្រព្រឹត្តដោយប្រមាថក្នុងចំណង់ និងភាពអសីលធម៌ផ្ទាល់ខ្លួនរបស់យើងហើយ !
ក្រសួងពិតជាមិនចង់បែកញើសដោយរឿងអត់បានការ តែក្រសួងបែរជាតែងតែរងនូវការវាយប្រហារយ៉ាងដំណំពីបងប្អូនមហាជនយើងពីបញ្ហានេះ ដូចនេះវាជាការចាំបាច់ក្នុងការដោះស្រាយសំណូមពរមហាជនដែលជាសសរស្តម្ភរបស់ប្រទេស ។
ការលើកសរសើរ ការព្រមាន ការដាក់ពិន័យ ការធ្វើសិក្ខាសាលាដើម្បីបង្កើនការយល់ដឹងពីក្រមសីលធម៌វិជ្ជាជីវ: យើងបាន និងកំពុងអនុវត្តជាបន្តបន្ទាប់មកហើយ តែលទ្ធផលវាត្រូវតែចាប់ផ្ដើមពីរូបអ្នកខ្លួនឯង មិនមែនដោយសារចំណុចដែលជាកម្មវត្ថុខាងលើនេះទេ ! ក៏វាមិនខុសពីការជូនពរដែរ គេជូនពរអ្នកឲ្យអ្នកបានសុខ អាយុយឺនយូរ សុភមង្គល តែបើអ្នកប្រមាថគ្រប់រឿងគ្រប់ជំហាននោះ ពរជ័យនោះវាមិននៅជាមួយអ្នកឡើយ វាប្រៀបដូចជា«ភ្លើងជិតទឹកឆ្ងាយអ៊ីចឹង ! ហើយអ្នកពិតជានឹងទទួលនូវអ្វីដែលជាទម្ងន់នៃជញ្ជីងស្វ័យប្រព្រឹត្តជាប្រតិសកម្មរបស់ខ្លួនក្នុងថ្ងៃណាមួយមិនខានឡើយ…»។
មុននេះអ្នកនាងសុខស្រីម៉ុច បានបង្ហោះសារតាមហ្វេសប៊ុករបស់នាងវាយបកមហាជនដែលរិះគន់នាងរឿងស្លៀកពាក់សិចស៊ីថា «ចង់និយាយអីបន្តិច ព្រោះតាំងពីចប់កម្មវិធីមកអត់បាននិយាយអីសោះ ។ ខ្ញុំដឹងថាខ្លួនខ្ញុំមួយមិនអាចតម្រូវចិត្តមនុស្សគ្រប់គ្នាបានទេ តែខ្ញុំដឹងត្រឹមថាខ្ញុំនឹងបំពេញតួនាទីរបស់ខ្ញុំក្នុងនាមខ្ញុំជា presenter ដែលការងារនេះវាជាសិទ្ធិបុគ្គល ហើយវាជា our private party ។
តែខ្ញុំមិនខឹងនឹងអ្នកដែលមិនពេញចិត្ត ហើយខ្ញុំក៏មិនអាចតម្រូវចិត្តគ្រប់គ្នាបាន ដូចខ្ញុំនិយាយពីខាងលើ ។ តែអ្វីដែលខ្ញុំហួសចិត្ត គឺចំពោះអ្នកមួយចំនួនបញ្ចេញមតិដូចជាមនុស្សដែលគ្មានការសិក្សា អ្នកគ្មានសិទ្ធិជេរបញ្ចោរខ្ញុំដៀលខ្ញុំ ហើយអ្នកសំអាងអីថាខ្ញុំបំផ្លាញ វប្បធម៌ជាតិ រៀនបើកភ្នែកមើលពិភពលោកផង ថាវាដល់ណាហើយ ?
កុំហាមាត់ឡើងគេបំផ្លាញជាតិ ។ ហេតុអីខ្ញុំអាចក្លាយជា presenter ព្រោះមិនមែនត្រឹមតែសម្រស់ទេ គឺមកពីចរិតប្ញកពាខ្ញុំដូចគ្នានឹងប្រវត្តិក្រុមគ្រួសារខ្ញុំ ទាំងនេះវាជាដើមហេតុដែគេជ្រើសរើសខ្ញុំ ។ ជេរខ្ញុំក្នុងកម្មវិធី privateរបស់ខ្ញុំ មិនឆ្អែតហើយ នៅមកបញ្ចោរខ្ញុំសូម្បីតែខ្ញុំទៅសមុទ្រ ។ ខ្ញុំមិនចង់ល្បីទេឈប់ធ្វើឲ្យខ្ញុំល្បីទៅ បើខ្ញុំចង់ល្បីខ្ញុំមិនឈប់ពីសិល្បៈទេ ។ កើតមកជាមនុស្សមិនគ្រប់គ្រាន់ទេ ត្រូវរៀនធ្វើជាមនុស្សផង ។ ប្រទេសមានច្បាប់ស្រុកមានវិនយ័ អ៊ីចឹងកុំមានមាត់គិតតែជេរគេ ដៀលគេដោយគ្មានដឹងថាអ្វីជាអ្វី ដឹងទេថាវារំលោភលើសិទ្ធិឯកជនរបស់ខ្ញុំដូចគ្នា »៕
ចែករំលែកព័តមាននេះ