សារព័ត៌មានបរទេសកាលពីពេល ថ្មីៗកន្លងមកផ្សាយថា ទីក្រុងសាំងហ្គាពួរ និងក្រុងគួឡាឡាំពួរ ប្រទេសម៉ាឡេស៊ីជាទីក្រុង២គួរឲ្យចង់រស់នៅបំផុតនៅក្នុងក្រុមប្រទេសអាស៊ាន តាមការរៀបចំណាត់ថ្នាក់របស់ «Economist Intelligence Unit» អង្គភាពផ្នែកទិន្នន័យរបស់ទស្សនាវដ្ដី«The Economist» ស្ថិតនៅលំដាប់ទី៣៥ និង៧៨នៅលើពិភពលោក ។ ចំពោះរាជធានីភ្នំពេញវិញ តើស្ថិតក្នុងលំដាប់ថ្នាក់ទីប៉ុន្មាន ?
ចំណែកក្រុងបាងកក ប្រទេសថៃ ជាទីក្រុងគួរឲ្យចង់រស់នៅបំផុតក្នុងលំដាប់ទី៩៨ នៅលើពិភពលោក ឬនៅឆ្ចាយពីសិង្ហបុរីចំនួន៦៣ និងគួឡាឡាំពួរ២០ចំណាត់ថ្នាក់ ។
ក្រុងផ្សេងទៀតក្នុងអាស៊ានដែលមានចំណាត់ថ្នាក់ប្រហាក់ប្រហែលនឹងក្រុងបាងកកមានក្រុងបាន់ដាស៊េរី បេកាវ៉ាន់ ប្រទេសព្រុយណេ នៅលំដាប់១០១ និងក្រុងម៉ានិលនៅលំដាប់១០៣ ។
ចំណែកក្រុងហាណូយ និងហូជីមិញ ប្រទេសវៀតណាមស្ថិតនៅលំដាប់១០៧ និង១១៦ រីឯក្រុងហ្សាការតា ប្រទេសឥណ្ឌូណេសុីនៅលំដាប់ទី១១៩ ។ ដោយឡែករាជធានីភ្នំពេញ នៃប្រទេសកម្ពុជាស្ថិតនៅលំដាប់ទី១២៥ ។
ក្រៅពីនេះអ្វីគួរឲ្យចាប់អារម្មណ៍លើការរៀបចំណាត់ថ្នាក់ក្នុងឆ្នាំ២០១៨នេះ ឃើញថាក្រុងវីយែន ប្រទេសអូទ្រីស បានផ្ដួលជើងឯកចាស់គឺក្រុងមេលប៊ន ប្រទេសអូស្ត្រាលី ក្លាយជាទីក្រុងគួរឲ្យចង់រស់នៅបំផុតនៅលើពិភពលោកមាន៩៩,១ពិន្ទុ មានន័យថាជាក្រុងដ៏ល្អឥតខ្ចោះ ។
ក្រៅពីនេះក្រុងដែលមានពលរដ្ឋចង់រស់នៅតិចបំផុតនៅលើពិភពលោកគឺក្រុងដាម៉ាស ប្រទេសស៊ីរីព្រោះតែមានសង្គ្រាម ។
ទីក្រុងគួរឲ្យចង់រស់នៅបំផុតក្នុងចំណាត់ថ្នាក់ទាំង១០នៅលើពិភពលោកប្រចាំឆ្នាំ២០១៨ រួមមាន ៖ ក្រុងវីយែន ប្រទេសអូទ្រីស ។ ក្រុងមេលប៊ន ប្រទេសអូស្ត្រាលី ។ ក្រុងអូសាកា ប្រទេសជប៉ុន ។ ក្រុងខាល់ហ្គារី ប្រទេសកាណាដា ។ ក្រុងស៊ីដនី ប្រទេសអូស្ត្រាលី ។ ក្រុងវេនគូវើ ប្រទេសកាណាដា ។ ក្រុងតូរ៉ង់តូ ប្រទេសកាណាដា ។ ក្រុងតូក្យូ ប្រទេសជប៉ុន ។ ក្រុងកូប៉េនហាក ប្រទេសដាណឺម៉ាក និងក្រុងអាដេឡេត ប្រទេសអូស្ត្រាលី ៕
ចែករំលែកព័តមាននេះ