ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា លោកតាម្នាក់លង់ទឹកស្លាប់បង្កការភ្ញាក់ផ្អើលកាលពីព្រឹកថ្ងៃទី១៤ ខែសីហា ឆ្នាំ២០១៨ ស្ថិតនៅភូមិចំណារ ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។
តាមសមត្ថកិច្ចនគរបាលប្រាប់ថា ជនរងគ្រោះឈ្មោះ គង់ ជិន ភេទប្រុស អាយុ៨៤ឆ្នាំ រស់នៅភូមិ-ឃុំកើតហេតុខាងលើ ចំណែកកូនប្រសាររបស់ជនរងគ្រោះឈ្មោះ ទី តឿន ភេទប្រុស អាយុ៣៨ឆ្នាំ នៅភូមិ-ឃុំជាមួយគ្នា។
បើយោងតាមការបំភ្លឺរបស់កូនប្រសាជនរងគ្រោះប្រាប់ថា កាលពីរសៀលថ្ងៃ១៣ សីហា រូបគេបានមកពីធ្វើការវិញជាមួយនឹងប្រពន្ធក៏ចូលលេងផ្ទះឪពុកក្មេក ហើយឃើញគាត់យកកង់កញ្ចាស់១គ្រឿងលក់អេតចាយបានលុយចំនួន៦០០០រៀល រួចគាត់ប្រាប់ខ្ញុំថា គាត់ទៅរកទិញផ្លែឪឡឹកនៅឯភូមិដងអន្ទាក់ ប្រហែលចម្ងាយ៣គីឡូម៉ែត្រ។ ចំណែកខ្ញុំនិងប្រពន្ធក៏នៅអង្គុយលេងជាមួយម្ដាយក្មេក រហូតដល់ម៉ោងប្រហែល៧យប់មិនឃើញគាត់មកវិញ ខ្ញុំក៏នាំប្រពន្ធទៅផ្ទះ ដោយមិនបានចាប់អារម្មណ៍នោះទេ ព្រោះកន្លងមកគាត់តែងតែស្រវឹងស្រា ហើយដើរដួល ជួនពេលខ្លះគាត់នៅដេកតាមផ្ទះគេ រហូតដល់ស្វាងស្រាបានត្រឡប់មកផ្ទះវិញ។
កូនប្រសារបន្តទៀតថា លុះព្រឹកឡើងថ្ងៃទី១៤ សីហា ខ្ញុំនិងប្រពន្ធបានមកផ្ទះគាត់ទៀត ស្រាប់តែម្ដាយក្មេកប្រាប់ថា «អា ទៅដើររកឪអាមើល យប់មិញមិនឃើញគាត់មកផ្ទះនោះទេ» ឮដូច្នេះ ខ្ញុំក៏ជិះម៉ូតូដើររកគាត់សំដៅទៅភូមិដងអន្ទាក់។ ពេលជិះម៉ូតូចេញពីផ្ទះចម្ងាយប្រហែល៥០០ម៉ែត្រ ស្រាប់តែឃើញឪពុកក្មេកស្លាប់អណ្ដែតក្នុងទឹកស្នាមភ្លោះជាប់ផ្លូវលំទៅហើយ មិនដឹងថាគាត់ស្លាប់តាំងពីពេលណាមកនោះទេ ឃើញដូច្នោះខ្ញុំក៏ស្រែកហៅប្រពន្ធ និងបងប្អូនក្នុងភូមិឱ្យជួយ។
ក្រោយពីទទួលព័ត៌មានភ្លាម កម្លាំងជំនាញប៉ុស្ដិ៍នគរបាល និងអាជ្ញាធរភូមិចុះដល់កន្លែងកើតហេតុធ្វើពិនិត្យឃើញថា ជនរងគ្រោះពិតជាស្លាប់ដោយលង់ទឹកប្រាកដមែន មិនពាក់ព័ន្ធបទល្មើសព្រហ្មណាមួយឡើយ ។ ចំណែកមូលហេតុគឺប្រហែលជាស្រវឹងស្រា ហើយដួលធ្លាក់ទឹកស្នាមភ្លោះក៏លង់ស្លាប់តែម្តង ក្រោយពីពិនិត្យក៏ប្រគល់សពជូនក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ