រាជធានីភ្នំពេញ ៖ ស្ត្រីម្នាក់ស្លាប់ភ្លាមៗនៅកន្លែងកើតហេតុ ចំណែកបុរសជាប្តីរងរបួសស្រាលបែកក្បាល បន្ទាប់ពីជិះម៉ូតូឌុបគ្នាចេញពីកម្មវិធីផ្ទះបងគោលបំណងវិលត្រឡប់ទៅផ្ទះ ជាអកុសលត្រូវបានរថយន្តកុងតឺន័របើកកៀរ បណ្តាលឲ្យដួល ហើយកិនស្ត្រីជាប្រពន្ធបាក់ភ្លៅសងខាង ហើយបោកក្បាលស្លាប់យ៉ាងអាណោចអាធម៌ កាលពីវេលាម៉ោង៩និង១៥នាទីយប់ថ្ងៃទី១៨ ខែសីហា ឆ្នាំ២០១៨ ស្ថិតនៅតាមផ្លូវ៣០ម៉ែត្រ ខាងលិចក្បែរផ្សារសុភមង្គល ត្រង់ចំណុចភូមិត្រាំដោក សង្កាត់ពងទឹក ខណ្ឌដង្កោ ក្រោយកើតហេតុរថយន្តបង្កបើករត់គេចទៅបាត់ ។
ស្ត្រីជាប្រពន្ធស្លាប់មានឈ្មោះ ចាន់ ណារី អាយុ២៨ឆ្នាំ មុខរបរកម្មការិនីកាត់ដេរ មានស្រុកកំណើត នៅស្រុកសន្ទុក ខេត្តកំពង់ធំ ចំណែកប្តីរងរបួសស្រាលមានឈ្មោះ យា អាយុ២៩ឆ្នាំ មុខរបរជាងជួសជុលរថយន្ត មានស្រុកកំណើត ខេត្តស្វាយរៀង ។ ជនរងគ្រោះទាំង២នាក់ប្តី-ប្រពន្ធ ស្នាក់នៅភូមិតំណាក់ត្រយឹង សង្កាត់ចោមចៅ២ ខណ្ឌពោធិសែនជ័យ ដោយជិះម៉ូតូ មួយគ្រឿង ម៉ាកសេ១០០សេរីចាស់ ។
តាមពលរដ្ឋនៅផ្ទះក្បែរកន្លែងកើតហេតុបានឲ្យដឹងថា មុនកើតហេតុគេឃើញជនរងគ្រោះទាំង២នាក់ខាងលើជិះម៉ូតូសេ១០០ឌុបគ្នា ធ្វើដំណើរតាមបណ្តោយផ្លូវ៣០ម៉ែត្រ ពីលិចទៅកើត លុះដល់ចំណុចកើតហេតុ ស្រាប់តែមានរថយន្តកុងតឺន័របើកស្របទិសកៀរពីក្រោយ ដួល ហើយកិនស្លាប់ប្រពន្ធរបួសស្រាលប្តី ហើយរថយន្តបង្កបន្ថែមល្បឿនបើករត់គេចបាត់ ។
តាមសាច់ញាតិបានឲ្យដឹងថា មុនកើតហេតុជនរងគ្រោះទាំង២នាក់ជិះម៉ូតូចេញពីកម្មវិធី កន្លែងយានដ្ឋានជួសជុលរថយន្ត នៅភូមិទួលកី សង្កាត់ភ្លើងឆេះទេះ គោលបំណងឌុបប្រពន្ធវិលត្រឡប់ទៅផ្ទះស្រាប់តែដល់ចំណុចខាងលើជួបហេតុការណ៍នេះតែម្តង ។
ក្រោយកើតហេតុសពជនរងគ្រោះត្រូវបានសមត្ថកិច្ចចុះទៅពិនិត្យរួចប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី ៕
ចែករំលែកព័តមាននេះ