រាជធានីភ្នំពេញ ៖ នៅក្នុងសង្គមសិល្បៈតែងតែកើតមានយូរមកហើយការប៉ែងជើងគ្នាដើម្បីទាញយកផលប្រយោជន៍ផ្ទាល់ខ្លួន ។ តារាខ្លះសភាពពិតខាងក្រៅជួបគ្នាញញឹមរាក់ទាក់ តែក្នុងចិត្តពេញដោយភាពឈ្នានីស ។ ក្នុងសង្គមសិល្បៈតារាមួយចំនួនចេះប្រើវិធី មួយបែបៗម្នាក់ដើម្បីប្រាក់ចំណូល និងប្រជាប្រិយភាពរបស់ខ្លួន…
រាជធានីភ្នំពេញ ៖ នៅក្នុងសង្គមសិល្បៈតែងតែកើតមានយូរមកហើយការប៉ែងជើងគ្នាដើម្បីទាញយកផលប្រយោជន៍ផ្ទាល់ខ្លួន ។ តារាខ្លះសភាពពិតខាងក្រៅជួបគ្នាញញឹមរាក់ទាក់ តែក្នុងចិត្តពេញដោយភាពឈ្នានីស ។
ក្នុងសង្គមសិល្បៈតារាមួយចំនួនចេះប្រើវិធី មួយបែបៗម្នាក់ដើម្បីប្រាក់ចំណូល និងប្រជាប្រិយភាពរបស់ខ្លួន ។ តារាខ្លះសុខចិត្តចំណាយប្រាក់មិនតិចទេ ដូចជាលក់ដី លក់អ្វីដែលជារបស់សំខាន់ដើម្បីទិញឡានស៊េរីទំនើប ពាក់គ្រឿង អលង្ការ ថ្លៃៗលម្អខ្លួន ។ ខ្លះទៀតចំណាយយ៉ាងច្រើនតាមយកចិត្តផលិតករអ្នកដឹកនាំ ឬតារាជើងចាស់ធ្វើបែបណាឲ្យតែបានចេញមុខ និងឲ្យសម្តែងមានប្លង់ថតច្រើន ។
រូបភាពទាំងនេះបានបង្កឲ្យតារាដែលអត់បក្សអត់ខ្សែ ខ្លះអស់សង្ឃឹម ខ្លះមានគំនិតគំកួនចងចាំចំណុចអាក្រក់របស់អ្នកធ្វើលើខ្លួន ។ មានតារារាយរងខ្លះទៀតធ្លាប់សម្តែងការឈឺចាប់នៅពេលគេទុកចោល ហើយលើកមុខមាត់តែអ្នក ចាស់ៗ ល្បីៗ ។ ភាពច្រណែននេះបានរុញឲ្យតារាមួយចំនួនហ៊ានថត ឬឡើងច្រៀងកម្មវិធីខ្លះស្ទើរមិនយកប្រាក់កម្រៃ ឬយកតែបន្តិចបន្តួចធ្វើបែបណាឲ្យតែល្បី បានគេឃើញច្រើនបណ្តាលឲ្យខូចតម្លៃហាងឆេងតារា ។
ជាក់ស្តែងកាលពីពេលកន្លងទៅ តារាចម្រៀងស៊ូ សុីរីកា ប្រចាំផលិតកម្មថោន ខណៈកំពុងតែលេចធ្លោបែរជាប្រកាសដកថយពីសិល្បៈចម្រៀង ដោយលើកហេតុផលថាវិថីមួយនេះពោរពេញដោយភាពច្រណែននិន្ទាគ្នា ប្រឹងប្រែងច្រើនបានតែមុខ ហើយគ្មានតម្លៃ ។ ក្រោយពីមានការលើកទឹកចិត្តពីអ្នកគាំទ្រ សុីរីកាបន្តឈរជើងឡើងវិញក្នុងពិភពសិល្បៈដោយមិនដឹងថានាងទប់បានដល់កម្រិតណាឡើយ ។
យោងតាមការឲ្យដឹងពីតារាប្រុសម្នាក់សុំមិនបញ្ចេញឈ្មោះ កាលពីពេល ថ្មីៗកន្លងមកបានសម្តែងអារម្មណ៍អាក់អន់ចិត្ត ដោយលោកលើកឡើងថាសង្គមសិល្បៈបើអ្នកមិនដឹង ពិតជាយល់ថាល្អ តែការណ៍ពិតពោរពេញដោយបក្សពួកនិយម ការមើលលើក្រោម កុងកាច់ឥតល្ហែ ញញឹមចាប់ដៃ ជាន់ជើង ។ បើចូលសិល្បៈគ្រាន់តែសប្បាយមិនអីទេ តែបើឲ្យយកជាដុំកំភួនគឺគ្មានទេ ។
ប្រភពដដែលនិយាយថាតួខ្លះចេះអែបចេះជូននេះជូននោះដល់អ្នកដឹកនាំ បានក្លាយជាតួមានមុខច្រើនក្នុងសង្គមសិល្បៈ ។ សូម្បីពេលខ្លះយកមុខអែបពេកត្រូវជំពាក់បុលគេក៏សុខចិត្តហើយអង្គុយយំក្នុងផ្ទះ។
អ្នកស្រីស កេសរ៉ា តារាភាពយន្តជើងចាស់លើកឡើងថា«ក្នុងនាមជាសិល្បករជើងចាស់ខ្ញុំចង់ឲ្យតារាយើងបច្ចុប្បន្នដែល ស្អាតៗ និងមានភាពប៉ិនប្រសប់ក្នុងការសម្តែង ចេះរួមគ្នាជាបន្តទៀតព្រោះមួយរយៈចុងក្រោយនេះឃើញថាចេះសហការគ្នាល្អ ចូរបន្តរក្សាទម្លាប់របៀបនេះទៀត ។ ត្រូវយកសមត្ថភាពពិតមកប្រជែងលើសិល្បៈ បើសិនជាអង្គុយអែបជិតអ្នកណាក៏ដោយមានអ្វីជូនគេមែន តែសម្តែងចេញមកមិនល្អក៏ទស្សនិកជនមិនទទួលស្គាល់ដែរ »។
អ្នកស្រីសាក់ សាកេតមយូរ៉ា តារាជើងចាស់មួយដួងដែរនោះបានសំណូមពរឲ្យសិល្បករទាំងអស់ស្រឡាញ់រាប់អានគ្នា ជួយគ្នាបើអ្នកណាល្អរៀនសូត្រពីគ្នាទៅវិញទៅមក ។«ប្រសិនបើយើងកាច់កុងអ្នកនេះមិនល្អ អ្នកនោះមិនល្អសិល្បៈនៅតែប្រឈម ។ ទាន់សិល្បៈយើងកំពុងបោះជំហានទៅមុខត្រូវនាំគ្នាធ្វើ នាំគ្នាពង្រឹងស្នាដៃឲ្យបានផុសផុលឡើង នោះសិល្បៈប្រាកដជាមានតម្លៃបន្តទៀត »។
លោកទេព រិនដារ៉ូ បានចូលរួមផ្តល់យោបល់ថា«ត្រូវរួមកម្លាំងគ្នា ការបៀតបៀនគ្នានាំឲ្យបែកបាក់ គ្មានរឿងណាធ្វើមិនបាននោះទេ តែបើបែកបាក់សាមគ្គីគ្នានោះ មិនអាចរុញទូកមួយទៅមុខបានដែរ ។ ដូចនេះបើស្រឡាញ់សិល្បៈគួរនាំគ្នាច្បិចយកវិធីប្រើស្នាដៃទេពកោសល្យសម្តែងឲ្យបានល្អ មិនមែនវិធីវាយអែបអបឡើយ ហើយចំណុចនេះក៏មិនអាចរស់នៅជាមួយសង្គមសិល្បៈយូរអង្វែងឡើយ» ៕
ចែករំលែកព័តមាននេះ