ខេត្តរតនគិរី ៖ ឪពុក និងកូនតូចទៅមុជទឹកអូរទុកកូនចោល រវល់ទៅបត់ជើងត្រឡប់មកវិញលុងទឹកអូរស្លាប់បាត់ ហេតុការណ៍នេះបានកើតឡើងកាលពីថ្ងៃទី១៨ ខែសីហា ឆ្នាំ២០១៨ វេលាម៉ោង៥និង៣០នាទីល្ងាចចំណុចអូរកោះពាក្យ ក្នុងភូមិកោះពាក្យ ឃុំកោះពាក្យ ស្រុកវ៉ើនសៃ ។
ទាក់ទិននឹងករណីខាងលើត្រូវបានសមត្ថកិច្ចមូលដ្ឋានឲ្យសារព័ត៌មានដឹងនៅព្រឹកថ្ងៃទី១៩ ខែសីហា ឆ្នាំ២០១៨ ថា ក្មេងប្រុសរងគ្រោះមានឈ្មោះ លឹក អម អាយុ៧ឆ្នាំ ជាសិស្សថ្នាក់បឋមសិក្សា ឪពុកដែលនាំកូនទៅមុជទឹកមានឈ្មោះ លឹក មុខរបរកសិករ រស់នៅភូមិឃុំខាងកើតហេតុខាងលើ ។
សមត្ថកិច្ចបានបញ្ជាក់ថា បើតាមការរៀបរាប់បុរសជាឪពុកប្រាប់សមត្ថកិច្ចថា នៅមុនពេលកើតហេតុវេលាម៉ោង៥ជាងល្ងាចនោះគាត់ និងកូនប្រុសបាននាំគ្នាទៅអូរខាងក្រោយផ្ទះចម្ងាយ២០០ម៉ែត្រ ដើម្បីមុជទឹកនៅពេលទៅដល់អូរ គាត់បានទុកកូនចោលនៅក្បែរមាត់អូរ រួចប្រាប់កូនថា ចាំមួយភ្លេតគាត់ទៅបត់ជើងក្នុងព្រៃឃ្លាតឆ្ងាយពីកូនប្រហែល១០ម៉ែត្រ បានតែកន្លះម៉ោងប៉ុណ្ណោះ ឪពុកក៏ត្រឡប់មកកន្លែងកូនអង្គុយចាំ ស្រាប់តែមកដល់ក៏បាត់កូនអត់ឃើញ ។
ក្រោយមកបុរសជាឪពុកស្មានតែកូនដើរទៅផ្ទះមុនគាត់ក៏ត្រឡប់មកផ្ទះភ្លាមៗដែរ ដើម្បីសួរប្រពន្ធ និងកូនក្មួយជុំវិញផ្ទះគាត់ ពេលសួរនាំគ្រប់គ្នារួច ប្រពន្ធ និងសាច់ញាតិឆ្លើយថា អត់ឃើញនោះទេ ទើបមានការឆោឡោនោះឡើង ។
សមត្ថកិច្ចមូលដ្ឋានបានបន្តទៀតថា ក្មេងប្រុសលង់ទឹកអូរតាមការត្រួតពិនិត្យរបស់សមត្ថកិច្ចក្នុងស្ថានភាពជាក់ស្តែងកន្លែងទឹកអូរក្មេងលង់ទឹកនោះជម្រៅទឹកអូរ២-៣ម៉ែត្រ និងទឹកហូរតិចៗឆ្ពោះទៅទន្លេសេសាន្ត ។ គួរឲ្យសោកស្តាយតែឪពុកមានការហ្វេសប្រហែសទុកកូនចោលឲ្យនៅម្នាក់ឯងបែបនេះ ៕
ចែករំលែកព័តមាននេះ