លោកពូទីនរាំជាមួយរដ្ឋមន្ត្រីការបរទេសអូទ្រីស
ប្រទេសរុស្ស៊ី-អូទ្រីស ៖ ប្រធានាធិបតីរុស្ស៊ីលោកវ្ល៉ាឌីមៀរ ពូទីន នាថ្ងៃទី១៨ សីហា បានចូលរួមក្នុងពិធីមង្គលការ រដ្ឋមន្ត្រីការបរទេសអូទ្រីស លោកស្រី KARIN…
ប្រទេសរុស្ស៊ី-អូទ្រីស ៖ ប្រធានាធិបតីរុស្ស៊ីលោកវ្ល៉ាឌីមៀរ ពូទីន នាថ្ងៃទី១៨ សីហា បានចូលរួមក្នុងពិធីមង្គលការ រដ្ឋមន្ត្រីការបរទេសអូទ្រីស លោកស្រី KARIN KNEISSL ហើយបានឡើងរាំជាមួយលោកស្រីទៀតផង។ វត្តមានបែបនោះរបស់លោកពូទីនត្រូវបានពួកប្រឆាំងអូទ្រីស ចាត់ទុកថា ធ្វើឲ្យប៉ះពាល់ដល់អព្យាក្រិតភាពនយោបាយរបស់ប្រទេស។
លោកពូទីនស្ថិតក្នុងចំណោមភ្ញៀវពិសេសច្រើនរយនាក់ ដែលមកចូលរួមក្នុងពិធីមង្គលការនេះ ដែលប្រព្រឹត្តទៅនៅ GAMLIFL ជាភូមិមួយនាជាយក្រុង GRAZ ភាគអាគ្នេយ៍អូទ្រីស។ លោកពូទីនត្រូវបានគេថតរូប ពិសេសកំពុងតែរាំជាមួយលោកស្រីKARIN KNEISSL ដែលរៀបការជាមួយពាណិជ្ជករម្នាក់លោក WOLFGANG MEILINGER។ ប្រមុខរដ្ឋរុស្ស៊ីមកចូលរួមក្នុងពិធីនេះអមដោយអ្នកចម្រៀងមួយក្រុមដែលមកសម្ដែងក្នុងពិធីមង្គលការ។
ប៉ូលិសជាច្រើនរយនាក់ដាក់ពង្រាយនាឱកាសមង្គលការ ព្រមទាំងតាមដងផ្លូវពីភូមិនោះរហូតដល់ព្រលានយន្តហោះក្រុង GRAZ ដែលបិទពេលលោកពូទីនមកដល់ និងចេញទៅវិញ។ លោកពូទីនអមដំណើរមកកាន់ព្រលានយន្តហោះ ដោយអធិការបតីអភិរក្សនិយមអូទ្រីស លោក SEBASTIAN KURZ បន្ទាប់មកលោកធ្វើដំណើរដោយត្រង់មកកាន់អាល្លឺម៉ង់ជួបជាមួយអធិការបតីប្រទេសនេះ លោកស្រីអេនហ្សឺឡាម័រកែលនាវេលាល្ងាចនៅជិតក្រុងប៊ែរឡាំង។
ពួកប្រឆាំងអូទ្រីសបានរិះគន់វត្តមានលោកពូទីនក្នុងមង្គលការនេះ ដោយយល់ថា ធ្វើឲ្យប៉ះពាល់ដល់តួនាទីអូទ្រីសដែលឡើងជាប្រធានប្ដូរវេនរបស់សហភាពអឺរ៉ុប។ នៅអាល្លឺម៉ង់លោកពូទីន អំពាវនាវដល់សហភាពអឺរ៉ុបឲ្យចូលរួមក្នុងការកសាងប្រទេសស៊ីរីឡើងវិញ ដែលអាចជម្រុញដល់ការវិលត្រឡប់នៃពួកជនភៀសខ្លួនចូលស្រុកវិញ៕
ចែករំលែកព័តមាននេះ