ប្រទេសស្វ៊ីស ៖ ក្នុងសេចក្ដីប្រកាសមួយនៅក្រុងហ្សឺណែវ មូលនិធិកូហ្វីអាណាន់ថ្លែងថា ជាមួយក្ដីក្រៀមក្រំក្រៃលែងដែលគ្រួសារ និងមូលនិធិកូហ្វីអាណាន់សូមប្រកាសថា លោកកូហ្វី អាណាន់ អតីតអគ្គលេខាធិការ អ.ស.ប និងជាជ័យលាភីពានរង្វាន់ណូបែលសន្តិភាព ទទួលមរណភាពដោយស្ងប់ហើយកាលពីថ្ងៃទី១៨ សីហា នៅទីក្រុង BERNEប្រទេសស្វ៊ីស ក្នុងជន្មាយុ៨០ឆ្នាំក្រោយលោកមានជំងឺរយៈពេលខ្លីមួយមក។
ភរិយានិងកូនៗលោកនៅក្បែររូបលោកប៉ុន្មានថ្ងៃចុងក្រោយ នៅប្រទេសស្វ៊ីសជាកន្លែងលោករស់នៅ។ ក្រោយមរណភាពរបស់លោកបណ្ដាឥស្សរជនលើពិភពបានសម្ដែងការសោកស្ដាយបំផុតចំពោះការបាត់បង់រូបលោក។
លោកកូហ្វី អាណាន់ ជាអគ្គលេខាធិការ អ.ស.ប ២អាណត្តិរយៈពេល១០ឆ្នាំ។ លោកកូហ្វីអាណាន់ តែងធ្វើអ្វីគ្រប់យ៉ាងដើម្បីឲ្យអង្គការអន្តរជាតិនោះនៅតែជាតំណាងដ៏ល្អ របស់បណ្ដាប្រទេស និងប្រជាជនលើឆាកអន្តរជាតិ។ លោកកាន់តំណែងអគ្គលេខាធិការ អ.ស.ប ២អាណត្តិពីឆ្នាំ១៩៩៧ទៅ២០០៧។
លោកដឹកនាំអង្គការនេះអំឡុងពេលមានសង្គ្រាមនៅអ៊ីរ៉ាក់ មុនពេលមានការចោទប្រកាន់លោកពីរឿងពុករលួយក្នុងករណីប្រេងប្ដូរស្បៀង។ ពីដំបូងដៃមកលោកជាមេដឹកនាំ អ.ស.ប មួយរូបក្នុងចំណោមមេដឹកនាំ អ.ស.ប ដែលមានប្រជាប្រិយភាពបំផុត។ រួមជាមួយអង្គការនេះ លោកទទួលនាឆ្នាំ២០០១ ពានរង្វាន់ណូបែលសន្តិភាព ចំពោះការខិតខំប្រឹងប្រែងរបស់លោក ជាគុណប្រយោជន៍ដល់ពិភពលោក ដែលមានលក្ខណៈកាន់តែល្អប្រសើរនិងកាន់តែមានសន្តិភាព។
មុនពេលលោកក្លាយជាអគ្គលេខាធិការ អ.ស.ប ពេលលោកជាប្រមុខនៃប្រតិបត្តិការថែរក្សាសន្តិភាព អ.ស.ប ជួបប្រទះនឹងដំណាក់កាលខ្មៅងងឹតនៃប្រវត្តិសាស្ត្ររបស់ខ្លួនព្រោះកើតមានការប្រល័យពូជសាសន៍នៅរវ៉ាន់ដា និងសង្គ្រាមនៅបូស្នី។ កងទាហានមួកខៀវបានដកចេញពីរវ៉ាន់ដាក្នុងឆ្នាំ១៩៩៤ ពេលផ្ទុះចលាចលនិងអំពើហិង្សាជនជាតិភាគតិចខ្លាំង ឈានដល់ការប្រល័យពូជសាស្ត្រ។ មួយឆ្នាំបន្ទាប់ពីនេះអ.ស.បពុំអាចរារាំងកងកម្លាំងស៊ែរប៊ីសម្លាប់រង្គាលជនអ៊ិស្លាមច្រើនពាន់នាក់ នៅទីក្រុងស្រេប្រេនីកាបូស្នី៕
ចែករំលែកព័តមាននេះ