ខេត្តប៉ៃលិន ៖ សត្វគោ១ក្បាលបានងាប់នៅនឹងកន្លែង ខណៈដើរឆ្លងផ្លូវថ្នល់នាពេលយប់ត្រូវបានរថយន្តឡិចស៊ីស បើកបុកចំពាក់កណ្តាលខ្លួនពេញទំហឹងដោយធ្វើឱ្យរថយន្តទទួលរងការ ខូចខាតយ៉ាងដំណំផងដែរ ។ ក្រោយពេលកើតហេតុម្ចាស់រថយន្តបានព្យាយាមសួរនាំរកម្ចាស់គោ ដើម្បីឱ្យចេញមុខសងថ្លៃការខូចខាត ។
ហេតុការណ៍រថយន្តបុកសត្វគោដើរឆ្លងផ្លូវនេះ បានកើតឡើងកាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី១៧ ខែសីហា ឆ្នាំ២០១៨ នៅបណ្តោយផ្លូវជាតិលេខ៥៧ មុខផ្ទះសំណាក់ វ៉ាន់ ធី ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ម្ចាស់រថយន្តមានឈ្មោះ ម៉ន សារ៉ុម ភេទប្រុស អាយុ៤០ឆ្នាំ ជា មន្ត្រីរាជការ មានទីលំនៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ដោយបើកបររថយន្តម៉ាក Lexus 470 ពណ៌ខ្មៅ ពាក់ស្លាកលេខ ភ្នំពេញ 2A- 8555 បុកសត្វគោពេញមួយទំហឹង បណ្ដាលឲ្យខូចខាតឡានមួយកំណាត់មុខ និងងាប់គោមួយក្បាល ។
ពាក់ព័ន្ធនឹងបញ្ហានេះបច្ចុប្បន្នរថយន្ត និងសត្វគោត្រូវបានយករក្សាទុកនៅប៉ុស្តិ៍នគរបាលរដ្ឋបាលឃុំស្ទឹងកាច់ និងបន្តធ្វើការស្វែងរកម្ចាស់គោ ដើម្បីហៅមកធ្វើការដោះស្រាយតាមផ្លូវច្បាប់ ។
សូមបញ្ជាក់ផងដែរថា ជាញយដងហើយដែលប្រជាពលរដ្ឋរស់នៅក្នុងភូមិមួយចំនួនក្នុង ខេត្តប៉ៃលិនបានបណ្តែតបណ្តោយឱ្យសត្វគោរបស់ខ្លួនដើរពាសពេញផ្លូវទីសាធារណៈដោយអត់មានចង ហើយក៏ធ្លាប់បង្កឱ្យមានករណីគ្រោះថ្នាក់ចរាចរណ៍ត្រូវម៉ូតូបុករបួសធ្ងន់ស្រាលផងដែរ ។ លុះក្រោយពេលកើតហេតុគេមិនអាចរកឃើញម្ចាស់ ដើម្បីមកដោះស្រាយនោះឡើយ ។
ដូច្នេះសូមឱ្យប្រជាពលរដ្ឋដែលចិញ្ចឹមសត្វគោក្របីត្រូវតែរក្សាសត្វរបស់ខ្លួនឱ្យបានល្អ មិនត្រូវលែងពាសពេញវាលនោះទេ ព្រោះសត្វចិញ្ចឹមទាំងអស់ស្ថិតនៅក្នុងការគ្រប់គ្រងរបស់ខ្លួន បើមានបញ្ហាត្រូវតែសងជនរងគ្រោះតែម្តង ៕
ចែករំលែកព័តមាននេះ