ខេត្តបាត់ដំបង ៖ ក្នុងអាស្រមប៊ុត សាវង្ស ឃុំរតនៈ ក្រុងបាត់ដំបង វេលារសៀលថ្ងៃទី១៨ ខែសីហា ឆ្នាំ២០១៨ យោធិនក្នុងយោធភូមិភាគទី៥បានធ្វើកិច្ចបច្ឆាមរណៈ និងដាក់កម្រងផ្កាជូនលោកវរសេនីយ៍ទោ សែម សុគុណ្ណា នាយរងការិយាល័យសុខាភិបាល កងពលតូចថ្មើរជើងលេខ៥៣ ដែលបានទទួលមរណៈភាពវេលាម៉ោង១៧និង៣៥នាទីថ្ងៃទី១៧ ខែសីហា ឆ្នាំ២០១៨ ក្នុង ជន្មាយុ៥១ឆ្នាំ ដោយរោគាពាធ ។
ក្រោមអធិបតីភាពលោកឧត្តមសេនីយ៍ទោ កែវ ចំរើន មេបញ្ជាការរង តំណាងលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ ដោយមានការចូលរួមពីលោកនាយរងសេនាធិការយោធភូមិភាគ មេបញ្ជាការរងកងពលថ្មើរជើងលេខ៥៣ និងវរសេនាតូចលេខ៥៣១-៥៣២-៥៣៣-៥៣៤ និងផែនការិយាល័យបានដាក់កម្រងផ្កា និងគោរពវិញ្ញាណក្ខន្ធ និងពាំនាំបច្ច័យមិត្តជួយមិត្តរបស់យោធភូមិភាគទី៥ ចំនួន៤លានរៀល បច្ច័យកងពលចំនួន៨០ម៉ឺនរៀល អង្ករ៥ ការ៉ុង បានទៅចូលរួមរំលែកទុក្ខដល់គ្រួសារនៃសពផងដែរ ។
លោកឧត្តមសេនីយ៍ទោ កែវ ចំរើន បានផ្តាំផ្ញើដល់គ្រួសារសពថា អង្គភាពមានការសោកស្តាយយ៉ាងខ្លាំង ចំពោះការបាត់បង់មិត្តរួមអាជីពក្នុងការងារ ដែលធ្លាប់មានស្នាដៃជួយជាតិកន្លងមកនេះ ហើយសូមជួយទំនុកបម្រុងថែររក្សាកូនប្រុសចំនួន២នាក់ឲ្យបានរៀនសូត្រទទួលបានចំណេះដឹងកុំឲ្យមានជួបការលំបាកទៅថ្ងៃក្រោយឡើយ ។ កម្មវិធីបុណ្យនឹងត្រូវរៀបចំបូជានៅវេលារសៀលថ្ងៃទី១៩ ខែសីហា ឆ្នាំ២០១៨ នៅក្នុងបរិវេណនេះដោយកិច្ចបញ្ចប់បុណ្យ ៕
ចែករំលែកព័តមាននេះ