ការកើតមកជាមនុស្ស សុទ្ធតែជាអ្នកមាននិស្ស័យខ្ពស់ណាស់គឺអាចធ្វើបុណ្យកុសលបំពេញបន្ថែមបានក្នុងកំណើតជាមនុស្សបច្ចុប្បន្ននេះ ដែលចាត់ថាជាកំណើតដើម្បីប្រយោជន៍ ខុសពីកំណើតសត្វក្នុងអបាយភូមិដែលត្រូវបិទនូវឧបនិស្ស័យនៃបុណ្យកុសល គឺពុំអាចបំពេញឱ្យសម្បូរបែបក្នុងកំណើតនោះបានទេ ។
សប្បុរសគួរពិចារណាអំពីជាតិកំណើតដ៍ពិសេសនេះ និងរកឱកាសធ្វើប្រយោជន៍ឱ្យបានច្រើន សូមកុំឱ្យពេលវេលាកន្លងហួសទៅទទេឱ្យសោះ គួរធ្វើនូវប្រយោជន៍គឺបុណ្យកុសលគ្រប់យ៉ាងដែលអាចធ្វើបាន ដោយសេចក្តីព្យាយាម សូមឱ្យកុសលធម៌រស់នៅជានិច្ចក្នុងសន្តានចិត្ត ។
ការស្តាប់ព្រះធម៌ គឺជាការទូន្មានចិត្ត ការស្តាប់ក៏នាំឱ្យមានបញ្ញាជាប្រទីបធំ ជាប្រទីបពិសេសសម្រាប់បំភ្លឺលោក កម្ចាត់នូវភាពងងឹតគឺអវិជ្ជា ដូច្នេះពុទ្ធបរិស័ទគួរយកចិត្តទុកដាក់ស្តាប់នូវព្រះធម៌ដោយសេចក្តីគោរព យកការស្តាប់ និងការបដិបត្តិព្រះធម៌ជាធំក្នុងជីវិត ។
ក្នុងលោកនេះគ្មានអ្នកណាអាចនាំយកនូវជាតិកំណើតមកប្រគល់ឱ្យយើងបានទេ គឺមានតែយើងខ្លួនឯងប៉ុណ្ណោះដែលមានអវិជ្ជាតែងនាំយកនូវជាតិទុក្ខមកសម្រាប់ខ្លួនឯង ប្រគល់ឱ្យខ្លួនឯង ដូច្នេះខ្លួនឯងហ្នឹងជាកំពូលសត្រូវរបស់ខ្លួនឯង នាំមកនូវទុក្ខសព្វបែបយ៉ាងនៅក្នុងជាតិកំណើតនេះ ។
ដូច្នេះដើម្បីរំសាយទុក្ខ បុគ្គលត្រូវទូន្មានចិត្តឱ្យតាំងនៅក្នុងការស្តាប់ព្រះធម៌ដោយគោរព និងត្រូវចាំជានិច្ចថា ទាល់តែមានព្រះពុទ្ធត្រាស់ដឹងទើបមាននូវព្រះធម៌ ដូច្នេះព្រះធម៌ជារបស់ដែលក្រសែនមហាក្រ តែនេះគឺជាភ័ព្វសំណាងណាស់ ដែលបុគ្គលកើតមកទាន់ព្រះធម៌ក្នុងសម័យកាលនេះ ។
ចែករំលែកព័តមាននេះ