ខេត្តប៉ៃលិន ៖ នគរបាលបានចាប់ឃាត់ខ្លួនបុរសម្នាក់នៅក្នុងកាស៊ីណូមួយ ជាប់ព្រំដែនកម្ពុជា-ថៃ ក្រោយពីជននេះ លួចរថយន្តហាយឡែនឌ័រមួយគ្រឿង ដែលម្ចាស់ចតទុកនៅមុខផ្ទះរួចយកទៅលាក់ទុកនៅក្នុងផ្ទះមួយ ហើយចូលទៅសម្ងំលេងល្បែងក្នុងកាស៊ីណូនោះ ។ ការចាប់ឃាត់ជនសង្ស័យលួចរថយន្តនេះ បានធ្វើឡើង កាលពីវេលាម៉ោង៦និង៣០នាទីល្ងាចថ្ងៃទី១៤ ខែសីហាកន្លងទៅ ដែលកាសុីណូខាងលើស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពព័ត៌មានបានឱ្យដឹងថា នគរបាលប៉ុស្តិ៍ស្ទឹងកាច់បានទទួលពាក្យបណ្តឹងពីស្ត្រីឈ្មោះសេង សំណាង អាយុ៤៩ឆ្នាំ រស់នៅរាជធានីភ្នំពេញ ពីករណីបាត់រថយន្តមួយគ្រឿងម៉ាកឡាយឡែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ ២AV-២១៣៨ កាលពីថ្ងៃទី៨ ខែសីហា ឆ្នាំ២០១៨ ខណ:ចតទុកនៅមុខផ្ទះនាពេលយប់។
ដោយសាររថយន្តនោះមានបំពាក់ប្រព័ន្ធGPS កម្លាំងនគរបាលស្រុកសាលាក្រៅ សហការជាមួយនគរបាលប៉ុស្តិ៍ស្ទឹងកាច់ បានស្វែងរកឃើញរថយន្តនៅផ្ទះរបស់ឈ្មោះ ឈាវ រដ្ឋា ភេទប្រុស ស្ថិតនៅក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ និងឈានទៅឃាត់ខ្លួនជនសង្ស័យម្នាក់ឈ្មោះ តាន់ វណ្ណថនា ភេទប្រុស អាយុ៤១ឆ្នាំ មុខរបរនិងទីលំនៅមិនពិតប្រាកដ នៅក្នុងកាស៊ីណូ ជី.អឹម ។ ជនសង្ស័យនិងវត្ថុតាង ត្រូវបានបញ្ជូនទៅអធិការដ្ឋាននគរបាលស្រុកសាលាក្រៅ ដើម្បីចាត់ការទៅតាមនីតិវិធី ៕
ចែករំលែកព័តមាននេះ