ខេត្តព្រៃវែង ៖ ទឹកជំនន់នៅតែបន្តកើនឡើងជារៀងរាល់ថ្ងៃ ធ្វើឲ្យដីស្រែចម្ការ ផ្ទះសម្បែង និងផ្លូវថ្នល់ជាច្រើនខ្សែនៅក្នុងខេត្ត ត្រូវជន់លិច ក្នុងនោះទំនប់បង្ហៀរបឹងស្នេហ៍ ស្ថិតនៅក្នុងឃុំធាយស្រុកបាភ្នំ ក៏ត្រូវទឹកជន់លិចដែរ ។
ផ្លូវទំនប់បង្ហៀរបឹងស្នេហ៍ គឺជាផ្លូវសេដ្ឋកិច្ចដ៏សំខាន់មួយរបស់ខេត្ត តភ្ជាប់ពីផ្លូវជាតិលេខ១ត្រង់ចំណុចផ្សារកំពង់សិង្ហឆ្ពោះទៅកាន់ផ្លូវជាតិលេខ១១ ត្រង់ចំណុចកែងស្នេហ៍ ហើយក៏ជាផ្លូវវាងតែមួយគត់ដែលគេអាចធ្វើដំណើរទៅកាន់ទីរួមខេត្ត នៅពេលដែលទីប្រជុំជនអ្នកលឿងមានបញ្ហាកកស្ទះចរាចរណ៍ ពិសេសខណៈកំណាត់ផ្លូវជាតិលេខ១១ក៏កំពុងជួសជុល ។
ដោយសារទឹកជំនន់កើនឡើងខ្លាំង និងជន់លិចទំនប់នេះ ទើបកាលពីព្រឹកថ្ងៃទី១៦ ខែសីហា អាជ្ញាធរខេត្តបានប្រកាសបិទផ្លូវនេះ លែងឲ្យយានយន្តគ្រប់ប្រភេទធ្វើចរាចរណ៍ឆ្លងកាត់ជាបណ្តោះអាសន្ន ដើម្បីការពារកុំឲ្យមានគ្រោះថ្នាក់ជាយថាហេតុ ហើយរហូតទាល់តែទឹកជំនន់ស្រកអស់ទៅវិញ ទើបបើកឲ្យធ្វើចរាចរណ៍ឆ្លងកាត់ឡើងវិញ ។
សូមរំលឹកដែរថា កាលពីឆ្នាំ២០១៣ ខណៈទឹកជំនន់ជន់លិចខ្លាំង មានរថយន្តកាមរីឆ្លាម១គ្រឿង ជិះគ្នា៨នាក់ ក្នុងនោះខ្មែរម្នាក់ និងជនជាតិស៊ីរី៧នាក់ បើកបរឆ្លងកាត់តាមទំនប់បង្ហៀរស្នេហ៍នេះ ក៏ត្រូវទឹកហូរកួចធ្លាក់ចេញពីផ្លូវ លិចចូលទៅក្នុងទឹកបាត់ និងបណ្តាលឱ្យស្លាប់ចំនួន៧នាក់ ។ ដោយសារធ្លាប់មានប្រវត្តិបែបនេះហើយ ទើបនៅពេលនេះអាជ្ញាធរខេត្ត បានដាក់បារ៉ាស់បិទផ្លូវ និងប្រកាសបិទមិនឲ្យធ្វើចរាចរណ៍ឆ្លងកាត់ផ្លូវនេះជាបណ្តោះអាសន្ន ៕
ចែករំលែកព័តមាននេះ