ខេត្តព្រះសីហនុ ៖ សេចក្តីរាយការណ៍បឋមឱ្យដឹងថា កាលពីវេលាម៉ោង០៩ និង៣០នាទីព្រឹកថ្ងៃទី១៨ សីហា នេះ ត្រូវបានអាជ្ញាធរសម្រេចផ្អាកមិនឱ្យចរាចរណ៍ទៅមកជាបណ្តោះអាសន្ន ស្ថិតតាមបណ្តោយផ្លូវជាតិលេខ៤ ត្រង់ចំណុចស្ពានគគីរ(ជិតពេជ្រនិល)គីឡូម៉ែត្រលេ១០៦-១០៧ ព្រំប្រទល់ខេត្តកំពង់ស្ពឺ និងខេត្តព្រះសីហនុ ។
សេចក្តីរាយការណ៍បន្តថា ការផ្អាកមិនឱ្យធ្វើដំណើរនេះ ដោយសារភ្លៀងបានបន្តធ្លាក់មកយ៉ាងគំហុក ធ្វើឱ្យទឹកហូរកាត់លើស្ពាន ជិតលិចបង្កាន់ដៃទៅហើយ ។
ប្រភពបន្តថា គិតនៅម៉ោងជាង១២ថ្ងៃត្រង់ថ្ងៃដដែលនេះ ជំនន់ទឹកភ្លៀងត្រង់ចំណុចស្ពានគគីរខាងលិចចំណោទលោកយាយម៉ៅពេជ្រនិល (ទីតាំងខាងលើ) ទឹកក៏បានស្រកទៅវិញបណ្តើរៗហើយ ។ រីឯចរាចរណ៍ ត្រូវបានអាជ្ញាធរបើកឱ្យដំណើរវិញជាធម្មតាដែរ ។
ប៉ុន្តែក៏នៅតែអំពាវនាវដល់យានយន្តទាំងអស់ បើកបរឆ្លងកាត់សូមបន្ថយល្បឿនយឺតៗ ដើម្បីបង្ការកុំឱ្យកើតមានគ្រោះថ្នាក់ជាយថហេតុ ។ សូមចូលរួមប្រុងប្រយ័ត្នទាំងអស់គ្នា ។
ចែករំលែកព័តមាននេះ