សហរដ្ឋអាមេរិក ៖ មន្ទីរប៉ង់តាហ្គោនគូសបញ្ជាក់នាថ្ងៃទី១៦សីហាថា ក្បួនព្យុហយាត្រាយោធាដែលប្រធានាធិបតីអាមេរិកលោក ដូណាល់ ត្រាំ ចង់ធ្វើ ហើយគ្រោងសម្រាប់ថ្ងៃទី១០វិច្ឆិកាខាងមុខនេះទីបំផុតត្រូវច្រានចោលវិញតែអាចមានក្នុងឆ្នាំ២០១៩ ។ ការចំណាយខ្ពស់ជាបញ្ហាចោទនិងរងការរិះគន់ ។
អ្នកនាំពាក្យមន្ទីរប៉ង់តាហ្គោន វរសេនីយ៍ឯក ROB MANNING ក្នុងសេចក្ដីប្រកាសមួយគូសបញ្ជាក់ថា មន្ទីរប៉ង់តាហ្គោននិងសេតវិមានចង់រៀបចំធ្វើព្យុហយាត្រាយោធា ជាកិត្តិយសជូនដល់អតីតយុទ្ធជនអាមេរិកនិងដើម្បីប្រារព្ធខួប១០០ឆ្នាំនៃសង្គ្រាមលោកលើកទី១ ។ ពីខាងដើមយើងគិតយកថ្ងៃទី១០ វិច្ឆិកា ២០១៨សម្រាប់ព្រឹត្តិការណ៍នោះ ប៉ុន្តែយើងងាកមកព្រមព្រៀងគ្នាពិនិត្យលទ្ធភាពក្នុងឆ្នាំ២០១៩វិញ ។
មុននេះបន្តិចអ្នកទទួលខុសត្រូវអាមេរិកម្នាក់អះអាងថា ថវិកាសម្រាប់ចំណាយលើការរៀបចំព្រឹត្តិការណ៍បែបនេះ មានដល់ជាង៩០លានដុល្លារ ខណៈគ្រាដំបូងសេតវិមានគិតថា ចំណាយត្រឹមតែពី១០ទៅ៣០លានដុល្លារប៉ុណ្ណោះ ។
កាលពីដើមខែកុម្ភៈសេតវិមានធ្លាប់ប្រកាសថា លោកត្រាំចង់ឲ្យមានព្យុហយាត្រាយោធាបង្ហាញ
ពីកម្លាំងយោធាអាមេរិក ។ លោកចាប់អារម្មណ៍លើរឿងនេះកាន់តែខ្លាំង ក្រោយពីទៅចូលរួមបុណ្យជាតិបារាំងហើយចូលរួមទស្សនាព្យុហយាត្រាយោធារបស់កងទ័ពបារាំងថ្ងៃទី១៤ កក្កដា ៕
ចែករំលែកព័តមាននេះ