ខេត្តបន្ទាយមានជ័យ ៖ បុរសម្នាក់ដែលអ្នកជិតខាងក៏ដូចជាសមត្ថកិច្ចសង្ស័យថា កើតជំងឺសរសៃប្រសាទ បានយកកាំបិត ចិតបន្លែចុងស្រួចអារកសម្លាប់ខ្លួនឯង បង្កឲ្យមានការភ្ញាក់ផ្អើល។ ហេតុការណ៍នេះបានកើតឡើងថ្ងៃទី១៧ ខែសីហា ឆ្នាំ២០១៨ វេលាម៉ោង២ និង២៤នាទីរសៀល នៅភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
ប្រភពព័ត៌មានពីនគរបាលមូលដ្ឋានបានឲ្យដឹងថា៖ ជនរងគ្រោះមានឈ្មោះ ពក ណាវ ភេទប្រុស អាយុ៣៧ឆ្នាំ រស់នៅភូមិ-ឃុំ កើតហេតុខាងលើ និងមានប្រពន្ធ កូនក្នុងបន្ទុកចំនួន៣នាក់ ប្រុស២នាក់។ ការសាកសួរព័ត៌មានពីអ្នកជិតខាង និងក្រុមគ្រួសាររបស់ជនរងគ្រោះ មុនពេលស្លាប់ គឺជនរងគ្រោះឈ្មោះ ពក ណាវ រយៈពេល២ថ្ងៃ មុនចេះតែនិយាយថារវើរវាយមិនចង់រស់ មានគេមកយក។
នៅថ្ងៃកើតហេតុជនរងគ្រោះក៏បានយកកាំបិតសចុងស្រួចសម្រាប់ចិតបន្លែ ធ្វើអត្តឃាតសម្លាប់ខ្លួនស្លាប់នៅក្នុងថ្លុកឈាមតែម្តងចោលប្រពន្ធ និងកូនទាំង៣។ លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានបញ្ជាក់ថា៖ ឆ្លងតាមការពិនិត្យរបស់សមត្ថកិច្ចជាមួយលោកមេភូមិ ដែលមានអ្នកជិតខាងចូលរួមផងនោះ ជនរងគ្រោះឈ្មោះ ពក ណាវ គឺពិតជាបានធ្វើអត្តឃាតខ្លួនឯងពិតមែន។ សពជនរងគ្រោះត្រូវបានប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕
ចែករំលែកព័តមាននេះ