រាជធានីភ្នំពេញ៖ ផ្ទះចំនួន២ខ្នងនៅតំបន់មិនរៀបរយត្រពាំងឈូក ស្ថិតនៅក្នុងភូមិបុរីកម្មករ សង្កាត់ទឹកថ្លា ត្រូវបានអាជ្ញាធរ និងសមត្ថកិច្ចចុះប្រើវិធានការរដ្ឋបាលចុះរុះរើចោល បន្ទាប់ពីសកម្មភាពជួញដូរ និងប្រើប្រាស់គ្រឿងញៀនបានកំរើកឡើងវិញ។ ការប្រើវិធានការរដ្ឋបាលក្តៅចុះរុះរើផ្ទះខាងលើនេះធ្វើឡើងកាលពីរសៀលថ្ងៃទី១៧ ខែសីហា ឆ្នាំ២០១៨ ។
តាមប្រភពព័ត៌មានបានឱ្យដឹងថា ការរុះរើសំណង់ដែលក្រុមជនសង្ស័យលាក់ខ្លួនប្រព្រឹត្តបទល្មើសនេះ ធ្វើឡើងតាមការណែនាំរបស់លោកអភិបាលខណ្ឌសែនសុខ ។
តាមប្រភពព័ត៌មានបានឱ្យដឹងបន្តទៀតថា កាលពីរសៀលថ្ងៃទី១៦ ខែសីហា ឆ្នាំ២០១៨ គណៈបញ្ជាការឯកភាពខណ្ឌសែនសុខបានចុះធ្វើរដ្ឋបាលនៅតំបន់ស្មុគស្មាញក្នុងភូមិបុរីកម្មករ ដែលជាអតីតភូមិត្រពាំងឈូក ឃាត់ខ្លួនបានក្រុមជនសង្ស័យចំនួន៧នាក់ និងដកហូតបានថ្នាំញៀនចំនួន៥កញ្ចប់ ព្រមទាំងឧបករណ៍សម្រាប់ប្រើប្រាស់គ្រឿងញៀនមួយផងដែរ ។
បន្ទាប់ពីឆែកឆេរ និងឃាត់ខ្លួនជនសង្ស័យដែលប្រមូលផ្តុំគ្នានៅផ្ទះទាំង២ខ្នងខាងលើ ទើបអាជ្ញាធរសង្កាត់ និងសមត្ថកិច្ចឈានទៅរុះរើផ្ទះទាំង២នោះចោល ដើម្បីកុំឱ្យក្រុមជនសង្ស័យបន្តយកផ្ទះនោះធ្វើសកម្មភាពប្រើប្រាស់គ្រឿងញៀនទៀត ។
គួរបញ្ជាក់ថា អតីតភូមិត្រពាំងឈូកក្លាយជាភូមិបុរីកម្មករ ក្នុងសង្កាត់ទឹកថ្លានេះជាតំបន់មិនរៀបរយ ដែលល្បីឈ្មោះថាមានជនសង្ស័យបានមកពពាក់ពពួននាំគ្នាប្រើប្រាស់គ្រឿងញៀន ។
នៅក្នុងយុទ្ធនាការបោសសំអាតគ្រឿងញៀននេះ ក្រសួងមហាផ្ទៃក៏ដូចជាសាលារាជធានីភ្នំពេញ កាលពីជំនាន់លោកប៉ា សុជាតិវង្ស ក៏បានដាក់បទបញ្ជាឱ្យអាជ្ញាធរ និងសមត្ថកិច្ចថ្នាក់មូលដ្ឋាន និងការិយាល័យប្រឆាំងគ្រឿងញៀនចុះធ្វើរដ្ឋបាលជាប្រចាំ និងឱ្យរុះរើលំនៅឋានប្រមាណជាង១០០បន្ទប់នៅអំឡុងឆ្នាំ២០១៦ ហើយបានធ្វើឱ្យតំបន់នោះស្ងប់ស្ងាត់អស់រយៈពេលប្រមាណ២ឆ្នាំមកហើយ តែពេលនេះបានកំរើកឡើងវិញហើយ ទើបអាជ្ញាធរបន្តប្រើវិធានការក្តៅចុះរុះរើផ្ទះចោលជាបន្តទៀត ៕
ចែករំលែកព័តមាននេះ