ជួយពង្រឹងផ្នែកចំណេះជំនាញផ្ទាល់ខ្លួន ដើម្បីជួយកាត់បន្ថយភាពក្រីក្រ
- បាត់ដំបង
ខេត្តបាត់ដំបង ៖ លោក វិធូ រ៉ាត់ស៊ីណាម អភិបាលខេត្តច័ន្ទបូរីប្រទេសថៃ និងលោក ងួន រតនៈ អភិបាលខេត្តបាត់ដំបង…
ខេត្តបាត់ដំបង ៖ លោក វិធូ រ៉ាត់ស៊ីណាម អភិបាលខេត្តច័ន្ទបូរីប្រទេសថៃ និងលោក ងួន រតនៈ អភិបាលខេត្តបាត់ដំបង បានរួមគ្នាបិទវគ្គបំប៉នការបណ្តុះបណ្តាលជំនាញជួសជុលរថយន្តខ្នាតតូច ដល់យុវវ័យកម្ពុជា នៅវិទ្យាស្ថានជាតិវិជ្ជាជីវបាត់ដំបងដែលបានធ្វើឡើងនៅវេលារសៀលថ្ងៃទី១៧ ខែសីហា ឆ្នាំ២០១៨ ដោយមានមន្ត្រីប្រធានមន្ទីរការងារទាំងសងខាងចូលរួមផងដែរ ។
លោក សុង ក្រានភើមរឿឆៃ ប្រធានការិយាល័យអភិវឌ្ឍន៍ជំនាញខេត្តច័ន្ទបូរី និងលោក នៅ ញ៉ិន នាយកវិទ្យាស្ថានជាតិវិជ្ជាជីវបាត់ដំបងបានរាយកាណ៍រួមគ្នាថា លើកនេះយើងបានទទួលការបណ្តុះបណ្តាលជំនាញផ្នែកជួសជុលរថយន្តចំនួន២០នាក់ មានរយៈពេលពីថ្ងៃទី១៣ ដល់១៧ ខែសីហា ឆ្នាំ២០១៨ នេះបន្ទាប់ពីទទួលបានការផ្តល់ឲ្យពីរាជរដ្ឋាភិបាលថៃ តាមរយៈក្រសួងការបរទេសថៃបញ្ជូនតាមរយៈក្រសួងការងារប្រទេសកម្ពុជាបានចាប់ផ្តើមបន្ថែមទៀតជួយពង្រឹងផ្នែកចំណេះជំនាញផ្ទាល់ខ្លួន ជួយជាគុណភាពសម្រាប់ជីវភាពរស់នៅក្នុងនាមប្រទេសជិតខាងគ្នា ឲ្យកាន់តែមានភាពល្អប្រសើរឡើងបន្ថែមទៀត ។
លោកនាយកវិទ្យាស្ថានជាតិបន្ថែមទៀតថា ខាងកម្ពុជាបាន និងកំពុងធ្វើការបណ្តុះបណ្តាល ចាប់ពីកម្រិតវិញ្ញាបនបត្រវិជ្ជាជីវដល់កម្រិតជាន់ខ្ពស់បច្ចេកទេស (បរិញ្ញាបត្ររង) ដែលមានជំនាញជួសជុលកុំព្យូទ័រ ជាងផ្សាដែក តបណ្តាញអគ្គិសនី បរិក្ខាត្រជាក់ កាត់ដេរ កែសម្ផស្សនារី កុំព្យូទ័ររដ្ឋបាល ជាងកំបោរ ជួស ជុលម៉ាស៊ីនធុនតូច ជំនួញខ្នាតតូច បសុបព្យាបាល វារីវប្បកម្ម កសិកម្ម សេវាថែទាំ និងជួសជុលរថយន្ត ជាដើម ។ ជួយដល់សិស្សនិស្សិតទូទៅ ជនទីទ័លក្រ ជនពិការ ជនបាត់បងឱកាសការងារ ស្ត្រីមេម៉ាយ ដើម្បីជួយកាត់បន្ថយភាពក្រីក្រឲ្យកាន់តែមានការថយចុះបន្ថែមទៀត ។
លោក វីធូរ៉ាត់ ស៊ីណាម អភិបាលខេត្តច័ន្ទបូរីបានចាប់អារម្មណ៍ថា នេះជាលើកដំបូងក្នុងគម្រោងរបស់រាជរដ្ឋាភិបាលថៃបានជំរុញការផ្លាស់ប្តូរគ្នាទៅវិញទៅមកចែករំលែកបទពិសោធន៍ ជួយផ្តល់ចំណេះជំនាញដល់ប្រទេសជិតខាងគ្នាដែលមានកម្ពុជា-ឡាវ និងភូមា ក្នុងនាមយើងជាបងប្អូនគ្នា នៅក្នុងអាស៊ានតែមួយ រួមចំណែកជួយគ្នាជាបន្តទៅមុខបន្ថែមទៀត ។
បន្តមក លោក ងួន រតនៈ អភិបាលខេត្តបាត់ដំបងបានថ្លែងអំណរគុណពីភាគីថៃដែលបានឆ្លើយតបតាមតម្រូវការដល់ពលករនៅក្នុងប្រទេសកម្ពុជា ក្នុងការបណ្តុះបណ្តាលផ្នែកមុខជំនាញនេះ ព្រោះវាជាទុនផ្ទាល់ខ្លួនមួយសម្រាប់ជួយដល់បងប្អូន កូនក្មួយកម្ពុជាយើងទទួលបានប្រាក់ចំណូលបន្ថែមទៀត នៅពេលដែលយកជំនាញនេះទៅអនុវត្តន៍ប្រកបមុខរបរជួយបំពេញជីវភាពក្នុងគ្រួសារ ហើយក៏សូមផ្តាំផ្ញើដល់យុវវ័យទាំងអស់ សូមយកចិត្តទុកដាក់មកក្រេបជញ្ជក់យកជំនាញពីទីកន្លែងនេះ ដើម្បីចេញទៅរកស៊ីដោយខ្លួនឯងទើបយើងបានចំណូលច្រើន ព្រោះសម័យឥឡូវតាមបច្ចេកវិទ្យាថ្មី បើយើងគ្មានជំនាញទេគ្រប់អ្នកវិនិយោគទុនក៏មិនត្រូវការផ្តល់កម្រៃឲ្យយើងបានចំណូលច្រើនដែរ ៕
ចែករំលែកព័តមាននេះ