អតីតនាយករដ្ឋមន្ត្រីមួយរូបទទួលមរណភាព
ប្រទេសឥណ្ឌា ៖ ប្រមុខរដ្ឋាភិបាលឥណ្ឌា បច្ចុប្បន្នលោកណារេនដ្រាម៉ូឌី រាយការណ៍ថាអតីតនាយករដ្ឋមន្ត្រីឥណ្ឌា លោក ATAL BIHARI VAJPAYEE បានទទួលមរណភាពហើយកាលពីថ្ងៃទី១៦…
ប្រទេសឥណ្ឌា ៖ ប្រមុខរដ្ឋាភិបាលឥណ្ឌា បច្ចុប្បន្នលោកណារេនដ្រាម៉ូឌី រាយការណ៍ថាអតីតនាយករដ្ឋមន្ត្រីឥណ្ឌា លោក ATAL BIHARI VAJPAYEE បានទទួលមរណភាពហើយកាលពីថ្ងៃទី១៦ សីហា ក្នុងជន្មាយុ៩៣ឆ្នាំ ក្រោយពីបញ្ជូនទៅសង្គ្រោះបន្ទាន់ក្នុងមន្ទីរពេទ្យមួយនៃទីក្រុងញូវដែល្លី។
តាម TWITTER លោកម៉ូឌីសរសេរពីលោក VAJPAYEE ដែល៣លើកកាន់តំណែងនាយករដ្ឋមន្ត្រីឥណ្ឌាថា មរណភាពរបស់លោកកំណត់ពីការបញ្ចប់សករាជមួយ។ មួយជីវិតរបស់លោកលះបង់ដើម្បីប្រជាជាតិ ហើយបម្រើប្រជាជាតិដោយប្ដូរផ្ដាច់ រយៈពេលជាច្រើនទសវត្ស។ មរណភាពនេះជាការបាត់បង់មួយសម្រាប់រូបលោកផ្ទាល់។
លោក VAJPAYEE ដែលធ្វើនាយករដ្ឋមន្ត្រីឥណ្ឌាដល់ទៅ៣លើក ចាប់តាំងពីច្រើនឆ្នាំមកហើយជួបប្រទះនឹងបញ្ហាសុខភាពនានា រួចសុខភាពលោកស្រុតចុះដុនដាបខ្លាំងរយៈពេលប៉ុន្មានថ្ងៃចុងក្រោយនេះ។
លោក VAJPAYEE ជាអតីតអ្នកកាសែត និងជាកវីនិពន្ធ ហើយងាកមកប្រឡូកខាងនយោបាយ។ អតីតនាយករដ្ឋមន្ត្រីរូបនោះ បានរួមចំណែកយ៉ាងខ្លាំងក្នុងការធ្វើឲ្យគណបក្ស BHARATIYA JANATA កំពុងកាន់អំណាចខ្លាំង ហើយលោកកាន់តំណែងនាយករដ្ឋមន្ត្រីដល់ទៅ៣លើក គឺក្នុងឆ្នាំ១៩៩៦ ១៩៩៨-៩៩និង១៩៩៩-២០០៤។
អាជីពនយោបាយរបស់លោកមានរយៈពេលដល់ទៅ៥ទសវត្ស។ លោកធ្លាប់ចូលរួមជាពិសេសក្នុងការចរចាជាមួយនាយករដ្ឋមន្ត្រីប៉ាគីស្ថាន ជាគូប្រឆាំងធំរបស់ឥណ្ឌា កាលពីឆ្នាំ១៩៩៩ ប៉ុន្តែរូបភាពសន្តិភាពនិយមរបស់លោកត្រូវរលំរលាយ ពេលផ្ទុះអំពើហិង្សា រវាងពួកយុទ្ធជនស្និទ្ធប៉ាគីស្ថាន និងកងទាហានឥណ្ឌានៅតំបន់មានជម្លោះកាស្មៀរ បណ្ដាលឲ្យមនុស្សស្លាប់ប្រមាណ១០០០នាក់។
លោកក៏រួមចំណែកដែរធ្វើឲ្យមានភាពតានតឹងនៅអាស៊ីខាងត្បូងដោយធ្វើការសាកល្បងនុយក្លេអ៊ែរនានាក្នុងឆ្នាំ១៩៩៨។ លោក VAJPAYEE ដកខ្លួនថយពីឆាកនយោបាយ ក្រោយទទួលបរាជ័យក្នុងការបោះឆ្នោតនាឆ្នាំ២០០៤។ លោកជួបប្រទះគ្រោះថ្នាក់ដាច់សរសៃឈាមក្នុងខួរក្បាលនាឆ្នាំ២០០៩ ដែលតម្រូវឲ្យលោកស្ថិតនៅតែក្នុងផ្ទះក្នុងទីក្រុងញូវដែល្លី៕
ចែករំលែកព័តមាននេះ