រាជធានីភ្នំពេញ៖ សម័យប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅនៅថ្ងៃទី២០ និង២១ ខែសីហា ខាងមុខនេះ រដ្ឋបាលរាជធានីភ្នំពេញនឹងដាក់កម្លាំងសមត្ថកិច្ចនៅគ្រប់មណ្ឌលប្រឡងទាំង២៥ និងមណ្ឌលកំណែទាំង១០នៅភ្នំពេញ ដើម្បីការពារសន្តិសុខសណ្តាប់ធ្នាប់ឱ្យបានល្អ។ ក្នុងកិច្ចប្រជុំស្តីពី…
រាជធានីភ្នំពេញ៖ សម័យប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅនៅថ្ងៃទី២០ និង២១ ខែសីហា ខាងមុខនេះ រដ្ឋបាលរាជធានីភ្នំពេញនឹងដាក់កម្លាំងសមត្ថកិច្ចនៅគ្រប់មណ្ឌលប្រឡងទាំង២៥ និងមណ្ឌលកំណែទាំង១០នៅភ្នំពេញ ដើម្បីការពារសន្តិសុខសណ្តាប់ធ្នាប់ឱ្យបានល្អ។
ក្នុងកិច្ចប្រជុំស្តីពី «ការរៀបចំសន្តិសុខសណ្តាប់ធ្នាប់នៅថ្ងៃប្រឡងសញ្ញាបត្រមធ្យមសិក្សាទុតិយភូមិ» នាថ្ងៃទី១៧ ខែសីហា នេះ នៅសាលារាជធានីភ្នំពេញលោក នួន ផារ័ត្ន អភិបាលរងរាជធានីភ្នំពេញ អះអាងថា អាជ្ញាធររាជធានីភ្នំពេញបានត្រៀមកម្លាំងសមត្ថកិច្ចគ្រប់គ្រាន់ ដើម្បីការពារសន្តិសុខ សណ្តាប់ធ្នាប់ និងសុវត្ថិភាពជូនដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២០ និង២១ ខែសីហា ដើម
សប្តាហ៍ក្រោយ ។
លោកបានលើកឡើងថា នៅថ្ងៃទី២០ និងថ្ងៃទី២១ រដ្ឋបាលរាជធានីភ្នំពេញនឹងដាក់កម្លាំងនគរបាលចរា
ចរណ៍ គ្រប់ដងផ្លូវសំខាន់ៗទាំងអស់ ជាពិសេសផ្លូវចេញចូលទៅមណ្ឌលប្រឡងទាំង២៥ នៅរាជធានីភ្នំពេញ ចាប់ពីម៉ោង៥ព្រឹកតទៅ ដោយសារបេក្ខជនប្រឡងនៅរាជធានីភ្នំពេញទាំងអស់មានចំនួនជាង២ម៉ឺននាក់។
លោក ជា ជាតិ អនុរដ្ឋលេខាធិការក្រសួងអប់រំ យុវជននិងកីឡា ថ្លែងថា នេះជាលើកទី៥ ហើយ ដែលក្រសួងអប់រំធ្វើកំណែទម្រង់នៃការប្រឡងមធ្យមសិក្សាទុតិយភូមិ ដែលមានអ្នកសង្កេតការណ៍ ចូលរួមតាមគ្រប់សកម្មភាពរបស់បេក្ខជនប្រឡង។ ចំពោះកំណែទម្រង់នៃការប្រឡងទាំង៤ លើកកន្លងទៅគឺទទួលបានជោគជ័យដ៏ធំធេងផងដែរ ។
លោកបានបន្តថា មណ្ឌលប្រឡងនៅរាជធានីភ្នំពេញមានចំនួន២៥មណ្ឌល គិតជាបន្ទប់ប្រឡងមានចំនួន៩១៣បន្ទប់ ដែលមានបេក្ខជនប្រឡងចំនួន២២៧៧៨នាក់ ។ លោកបានស្នើអោយគ្រប់ស្ថាប័នពាក់ព័ន្ធ និងសមត្ថកិច្ចត្រូវបន្ដកិច្ចសហការ គាំទ្រ ដើម្បីធ្វើការសម្របសម្រួល បេក្ខជនក្នុងអំឡុងពេលប្រឡងសញ្ញាបត្រសិក្សាទុតិយភូមិឆ្នាំនេះប្រព្រឹត្តទៅទទួលបានភាពល្អប្រសើរ។
ចំណែកលោក ឃាង សេង អនុប្រធានអង្គភាពប្រឆាំងអំពើពុករលួយ ស្នើអោយអាជ្ញាធររាជធានីភ្នំពេញ ចូលរួមការពារសន្តិសុខសណ្តាប់ធ្នាប់២៤ម៉ោង លើ២៤ម៉ោង នៅតាមមណ្ឌលប្រឡងទាំងអស់ និងការពារសុវត្ថិភាពនៅមណ្ឌលទាំង១០កន្លែងនៅរាជធានីភ្នំពេញរហូត ដល់ថ្ងៃទី២៩ ខែសីហា ឆ្នាំ២០១៨។
លោកបានបន្តថា អង្គភាពរបស់លោកបានដាក់អ្នកសង្កេតការណ៍ស្ម័គ្រចិត្តចំនួន១១១៤នាក់ ទូទាំង២៥មណ្ឌលប្រឡង ហើយគ្រប់បេក្ខជនប្រលងទាំងអស់ និងអ្នកពាក់ព័ន្ធនានា បើធ្វើឱ្យបែកធ្លាយវិញ្ញាសារជាសាធារណៈ គឺជាប់ទោសព្រហ្មទណ្ឌ ហើយបើមានការបែកធ្លាយវិញ្ញាសារមែននោះ អង្គភាពប្រឆាំងអំពើពុករលួយនឹងបើកការស្រាវជ្រាវស៊ើបអង្កេត និងឃាត់ខ្លួនជនល្មើសតែម្តង ៕
ចែករំលែកព័តមាននេះ