រាជធានីភ្នំពេញ ៖ មន្ត្រីជាន់ខ្ពស់ក្រសួងពាណិជ្ជកម្មមានសុទិដ្ឋិនិយមថា ការនាំចេញរបស់កម្ពុជាក្នុងឆ្នាំ២០១៨នេះ នឹងសម្រេចបានទឹកប្រាក់ប្រមាណ១២ពាន់លានដុល្លារអាមេរិក ពោលគឺអាចនឹងកើន១៥% បើធៀបនឹងឆ្នាំមុន។
រដ្ឋលេខាធិការក្រសួងពាណិជ្ជកម្មកម្ពុជា លោកឱក ប៊ុង បានមានប្រសាសន៍ថា ទឹកប្រាក់នាំចេញរបស់កម្ពុជាបានកើនឡើងជាបន្តបន្ទាប់ពីមួយឆ្នាំទៅមួយឆ្នាំ ។ ជាក់ស្ដែងកាលពីឆ្នាំ២០១៦ ទឹកប្រាក់នាំចេញមានត្រឹមតែជាង៩ពាន់លានដុល្លារអាមេរិកប៉ុណ្ណោះ ហើយបានកើនឡើងដល់ជាង១១ពាន់លានដុល្លារអាមេរិកក្នុងឆ្នាំ២០១៧ ។ ដោយឡែកក្នុងឆ្នាំ២០១៨នេះ ការនាំចេញសរុបរបស់កម្ពុជាទៅកាន់ទីផ្សារអន្តរជាតិ អាចនឹងសម្រេចបានជាង១២ពាន់លានដុល្លារអាមេរិក ពោលគឺកើនឡើង១៥% ។ លោកថ្លែងថា ៖« កត្តាដែលយើងហ៊ានអះអាងបែបនេះ យើងផ្អែកទៅលើតួលេខនាំចេញក្នុងរយៈពេល៦ខែដើមឆ្នាំ២០១៨នេះ ដោយយើងសម្រេចបាននូវទឹកប្រាក់នាំចេញប្រមាណជាង៦ពាន់លានដុល្លារអាមេរិកទៅហើយ។ ដូចនេះ យើងរំពឹងថាពាក់កណ្ដាលឆ្នាំទៀត យើងនឹងសម្រេចបានប្រហាក់ប្រហែលនឹងពាក់កណ្ដាលឆ្នាំកន្លងទៅ »។
លោកបន្តថា ចាប់តាំងពីកម្ពុជាទទួលបាននូវការអនុគ្រោះពន្ធសម្រាប់ការនាំចេញទំនិញ ទំហំទឹកប្រាក់នាំចេញ គឺបានកើនឡើងជាបន្តបន្ទាប់ ហើយមិនមានតួលេខណាមួយបង្ហាញពីការធ្លាក់ចុះនោះទេ ពោលគឺបានកើនឡើងក្នុងរង្វង់ពី ១៥ទៅ១៨% ក្នុងនោះទីផ្សារសំខាន់ៗរបស់កម្ពុជា មានដូចជា អាមេរិក និងអឺរ៉ុប ហើយថ្មីៗនេះ កម្ពុជាក៏បានពង្រីកទីផ្សារនាំចេញរបស់ខ្លួនកាន់តែច្រើនថែមទៀត ដូចជាទីផ្សារប្រទេសកាណាដា, កូរ៉េ និងជប៉ុនជាដើម ។ ក្រៅពីនោះទៀត ប្រទេសចិនក៏ជាទីផ្សារនាំចេញសំខាន់ផងដែរ សម្រាប់ផលិតផលប្រទេសកម្ពុជា ។ លោកបន្ថែមថា ផលិតផលនាំចេញសំខាន់ៗ របស់កម្ពុជាលើទីផ្សារអន្តរជាតិតាំងពីដើមរហូតដល់បច្ចុប្បន្ននេះ រួមមាន សម្លៀកបំពាក់ ស្បែកជើង កៅស៊ូ អង្ករ និងផលិតផលកសិកម្ម ជាច្រើនទៀត ។ លោកថា ៖« ដើម្បីជំរុញឲ្យការនាំចេញរបស់យើងកាន់តែមានប្រសិទ្ធភាព និង មានទំហំកាន់តែច្រើននោះ ក្រសួងពាណិជ្ជកម្មដែលមានតួនាទីសំខាន់លើកិច្ចការនេះ បានខិតខំធ្វើយ៉ាងណាសម្រួលការនាំចេញឲ្យកាន់តែរលូន និងមានភាពងាយស្រួលដល់អ្នកនាំចេញ » ។
លោក កាំង ម៉ូនីកា អគ្គលខាធិការរងនៃសមាគមរោងចក្រកាត់ដេរនៅកម្ពុជា បានមានប្រសាសន៍ថា ទីផ្សារនាំចេញ និងការបញ្ជាទិញផលិតផលនានានៅតែរក្សាបានកំណើនល្អប្រសើរ ។ លោកបន្ដថា ៖« ទំនិញនាំចេញសំខាន់ៗពីកម្ពុជារួមមាន ផលិតផលវាយនភ័ណ្ឌ សម្លៀកបំពាក់ ស្បែកជើង និងអង្ករ ជាដើម ហើយទីផ្សារនាំចេញរបស់កម្ពុជា មានដូចជា សហរដ្ឋអាមេរិក សហគមន៍អឺរ៉ុប កាណាដា និងជប៉ុន ជាដើម »។
បើតាមសេចក្តីប្រកាសព័ត៌មានរបស់ក្រសួងពាណិជ្ជកម្មពេលថ្មីៗនេះ បានបង្ហាញថា ក្រសួងនឹងរៀបចំឲ្យពាណិជ្ជករកម្ពុជា ចូលរួមក្នុងព្រឹត្តិការណ៍ពិព័រណ៍ក្នុងប្រទេសម៉ាឡេស៊ី នៅដើមខែក្រោយនេះ ។
តាមរយៈសកម្មភាពនេះ វាគឺជាឱកាសបន្ថែមសម្រាប់ពាណិជ្ជករកម្ពុជា ក្នុងការនាំយកផលិតផលរបស់ខ្លួនបង្ហាញដល់ពាណិជ្ជករម៉ាឡេស៊ី ក្នុងការនាំចេញ ។ ក្រៅពីនោះដែរ ក្រសួងពាណិជ្ជកម្ម ក៏តែងតែនាំយកផលិតផលខ្មែរ តាំងបង្ហាញនៅប្រទេសចិន ដែលជាប្រទេសមានទីផ្សារធំមួយនៅលើពិភពលោក ដើម្បីត្រៀមនាំចេញ ។ មួយវិញទៀត កាលពីពេលថ្មីៗនេះដែរ ក្រសួងកសិកម្មកម្ពុជា និងភាគីចិន ក៏បានចុះហត្ថលេខាបន្ថែម លើការនាំចេញផ្លែចេកទៅកាន់ប្រទេសចិនដោយផ្ទាល់ ខណៈកន្លងមក ផលិតផលផ្លែចេករបស់កម្ពុជា ត្រូវឆ្លងកាត់ប្រទេសទី២ជាមុនសិន មុននឹងនាំចេញទៅកាន់ប្រទេសចិន ៕
ចែករំលែកព័តមាននេះ