ខេត្តកណ្តាល ៖ នៅព្រឹកថ្ងៃទី១៧ ខែសីហា ឆ្នាំ២០១៨ នៅសាលាដំបូងខេត្តកណ្តាលបានបើកប្រកាសសាលក្រមផ្តន្ទាទោសសំណុំរឿងក្រុមទទួលផលចោរកម្មស្ថានទម្ងន់ទោសចំនួនបីខេត្ត ។ ការប្រកាសសាលក្រមនេះមានចៅក្រមលោក គឹម ម៉េង ជាប្រធានប្រឹក្សាមានការចូលរួមពីលោក ទី សំណាង ចៅក្រម, លោក ផូង វណ្ណ ចៅក្រម និងលោក ឯក ស៊ុនរស្មី ជាតំណាងអយ្យការ ។
ក្រោយបញ្ចប់សាលក្រមលោក គឹម ម៉េង ប្រធានក្រុមប្រឹក្សាជំនុំជម្រះសាលាដំបូងខេត្តកណ្ដាលបានសម្រេចផ្តន្ទាទោសជនជាប់ចោទទី១-ឈ្មោះ តេង លី ភេទប្រុស, ទី២-ឈ្មោះ សេង បូរិទ្ធ ភេទប្រុស ចំនួន៧ឆ្នាំ និងទី៣-ឈ្មោះ ហេង ភក្តី ភេទប្រុស, ទី៤-ឈ្មោះ យន់ សំអឿន ភេទប្រុស និងទី៥-ឈ្មោះ យន់ វាសនា ភេទប្រុស ចំនួន៤ឆ្នាំ ។ ជនជាប់ចោទទាំងនោះត្រូវជាប់ចោទពីបទ «ទទួលផលចោរកម្ម និងទទួលផលចោរកម្មមានស្ថានទម្ងន់ទោស តាមមាត្រា៤០០, ៤០១ នៃក្រមព្រហ្មទណ្ឌ» ។
សូមរំលឹកថា ការបើកប្រតិបត្តិការណ៍បង្ក្រាបនេះក្រោយកម្លាំងនគរបាលស្រុកកណ្តាលស្ទឹងឃាត់ខ្លួនក្រុមចោរធាក់ផ្តួលម៉ូតូប្លន់បាន១ក្រុមក្រោយពួកគេធ្វើសកម្មភាពវាយប្លន់ជនរងគ្រោះ២នាក់ប្តីប្រពន្ធកាលពីថ្ងៃទី១០ ខែកុម្ភៈ ឆ្នាំ២០១៨ នៅចំណុចដីភូមិព្រែកអង្គុញ ឃុំសៀមរាប ស្រុកកណ្តាលស្ទឹង ខេត្តកណ្តាល រួចគេចខ្លួន ៕
ចែករំលែកព័តមាននេះ