រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោក សុខ ឥសាន បានអះអាងថា ការដែលចង់ឲ្យរដ្ឋាភិបាលដោះលែងលោក កឹម សុខា នោះជាការប្រើវប្បធម៌នីទណ្ឌភាព ហើ យជាអន្ទាក់នយោបាយតែប៉ុណ្ណោះ ។
ការអះអាងរបស់មន្ត្រីជាន់ខ្ពស់គណបក្សកាន់អំណាចរូបនេះ ខណៈដែលសំណុំរឿងរបស់លោក កឹម សុខា អតីតប្រធានគណបក្សសង្គ្រោះជាតិកំពុងតែស្ថិតក្នុងនីតិវិធីតុលាការចាត់ការ តាមផ្លូវច្បាប់ ហើយមតិប្រឆាំងមួយចំនួនទាំងក្នុងនឹងក្រៅប្រទេសចង់ឲ្យរាជរដ្ឋាភិបាលដោះលែងលោក កឹម សុខា ។
លោក សុខ ឥសាន បានឲ្យដឹងនៅថ្ងៃទី១៧ សីហា ថា ៖«ការលើកឡើងជាមតិចង់ឲ្យមានការដោះលែងជនជាប់ចោទគ្មានអ្វីក្រៅពីចង់ប្រែក្លាយសំណុំរឿងព្រហ្មទណ្ឌឲ្យទៅជារឿងនយោបាយដែលពួកគេតែងតែប្រើពាក្យអ្នកទោសមនសិការនោះឡើយ »។
ក្រោមសំណុំរឿងរបស់អតីមេបក្សប្រឆាំងនេះដែរក៏ត្រូវបានអ្នកនាំពាក្យបក្សកាន់អំណាចលើកឡើងបញ្ជាក់ថា ៖«មកពីគេចង់យកវប្បធ៌មនីទណ្ឌភាពមកដាក់នៅកម្ពុជា ហើយអាលពួកគេ ឆ្លៀតវាយប្រហារមកលើរាជរដ្ឋាភិបាលកម្ពុជារបស់គណបក្សប្រជាជនកម្ពុជាតែប៉ុណ្ណោះ។ នេះហើយដែលហៅថាជាអន្ទាក់នយោបាយនោះ» ។
ការលើកឡើងរបស់លោក សុខ ឥសាន នេះដែរខណៈដែរអតីតមន្ត្រីជាន់ខ្ពស់គណបក្សសង្គ្រោះជាតិលោក អ៊ូ ច័ន្ទរ័ត្ន ក៏ដូចជាមន្ត្រីមួយចំនួនទៀត និងបណ្តាលសមាជិកព្រឹទ្ធសភា រដ្ឋសភាបរទេសបានចង់ឃើញរដ្ឋាភិបាលដោះលែងលោក កឹម សុខា ឲ្យមានសេរីភាព ៕
ចែករំលែកព័តមាននេះ