ខេត្តប៉ៃលិន ៖ រហូតមកដល់ពេលបច្ចុប្បន្ននេះប្រជាកសិករជាច្រើនគ្រួសាររស់នៅស្រុកសាលាក្រៅកំពុងមានការព្រួយបារម្ភយ៉ាងខ្លាំងចំពោះដំណាំក្រូចពោធិ៍សាត់របស់ខ្លួនរាប់ពាន់ដើម កំពុងកើតជំងឺម្យ៉ាង (ជំងឺប្រាក់) បណ្តាលឱ្យរលួយឫស បែកសំបកដើម និងក្រហមស្លឹក ងាប់ជាបណ្តើរៗ ដោយមិនអាចរកវិធីសាស្ត្រអ្វីជួយកម្ចាត់រោគរុក្ខជាតិមួយនេះបាននោះជាហេតុធ្វើឱ្យអ្នកខ្លះខាតអស់លុយកាក់ជាច្រើន ហើយចង់បោះបង់មុខរបរមួយនេះចោលទាំងស្រុង ។
បើតាមការរៀបរាប់ពីបុរសម្នាក់ឈ្មោះ យ៉ន ប៊ុនធឿន អាយុ៣៤ឆ្នាំ រស់នៅភូមិអូរកន្ធៀងវ៉ា ឃុំស្ទឹងត្រង់ ស្រុកសាលាក្រៅបានរៀបរាប់ឱ្យដឹងថា គាត់បានដាំដំណាំក្រូចពោធិ៍សាត់ចំនួន៣០០០ដើម អស់រយៈពេលជាង១០ឆ្នាំមកហើយមិនធ្លាប់មានបញ្ហាអ្វីនោះឡើយដោយទទួលបានផលបេះលក់ជារៀងរាល់ឆ្នាំ ដោយក្នុង១ឆ្នាំៗអាចម៉ៅឱ្យឈ្មួញបេះយកទៅលក់នៅក្នុងក្រុងប៉ៃលិន និងរហូតទៅដល់ខេត្តបាត់ដំបងថែមទៀតផង ។ គាត់បន្តទៀតថា ប៉ុន្តែនៅដើមឆ្នាំ២០១៨នេះ ស្រាប់តែក្រូចរបស់គាត់ចំនួន២០០០ដើម ចាប់ផ្តើមរលួយឫស និងប្រេះបែកសំបកដើម ហើយស្លឹកចាប់ផ្តើមក្លាយទៅជាពណ៌លឿងក្រហម រួចក្លាយទៅជាងាប់ពេញចម្ការតែម្តង ។
គាត់ខិតខំប្រឹងប្រែងរាវរកវិធីសាស្ត្រ និងថ្នាំ ដើម្បីជួយឱ្យដំណាំក្រូចរបស់ខ្លួនបន្តរស់ទៅទៀតដែរ ប៉ុន្តែមើលទៅគ្មានសង្ឃឹមអ្វីនោះទេ ព្រោះដើមក្រូចខ្លះបន្ទាប់ពីផ្លែរួចចាប់ផ្តើមកើតជំងឺមួយនេះ ហើយក៏រៀបនឹងងាប់បន្តទៀតដែរ ។ ទោះបីជាគាត់ខំប្រឹងដាំដំណាំក្រូចថ្មីៗបន្ថែមទៀតក៏ឆ្លងជំងឺបន្តបន្ទាប់គ្នាដោយមិនទាន់បានផ្លែ សូម្បីតែម្តងក៏រៀបនឹងងាប់ទៅជាមួយនឹងដើមក្រូចចាស់ដែរ ។
គាត់ក៏សូមអំពាវនាវដល់ខាងក្រសួងកសិកម្មក៏ដូចជា មន្ទីរកសិកម្មខេត្តឱ្យចុះទៅត្រួតពិនិត្យ មើលចម្ការក្រូចពោធិ៍សាត់របស់ប្រជាពលរដ្ឋរស់នៅភូមិខាងលើ និងភូមិផ្សេងៗទៀតក៏មានបញ្ហាដំណាំក្រូចកើតជំងឺប្រាក់នេះដែរ ។
ចំណែកស្ត្រីម្នាក់ អាយុ៣៧ឆ្នាំ បានឱ្យដឹងដែរថា ដំណាំក្រូចពោធិ៍សាត់ចំនួន៤០០ដើម ដោយទទួលផលជាង១០ឆ្នាំមកហើយ មិនដឹងជាយ៉ាងណា ស្រាប់តែរហូតមកដល់ពេលនេះ ស្រាប់តែកើតជំងឺងាប់អស់៨០ភាគរយ នៅសល់២០ភាគរយទៀតកំពុងតែចាប់ផ្តើមឆ្លងជំងឺបន្តបន្ទាប់ ដោយមិនអាចរកថ្នាំមកការពារ ឬព្យាបាលបាននោះទេ ។ ម្យ៉ាងវិញទៀតគាត់គិតថា ក្រូចរបស់ខ្លួនដល់អាយុត្រូវងាប់ ដូច្នេះហើយមានតែកាប់ដើមចាស់ចោល រួចដាំសារជាថ្មីឡើងវិញ ។ គាត់នៅមានចម្ងល់មិនមែនតែក្រូចរបស់គាត់ដើមចាស់ងាប់នោះទេ សូម្បីតែក្រូចអ្នកផ្សេងទៀតដែលទើបនឹងដាំបានរយៈពេល២ទៅ៣ឆ្នាំក៏ចាប់ផ្តើមងាប់ដូចក្រូចចាស់របស់គាត់ដែរ ។
គាត់បន្តទៀតថា តាំងពីដូនតារហូតមកដល់ពេលនេះការដាំក្រូចរបស់ពួកគាត់មិនមានខាងជំនាញ ឬខាងមន្ទីរណាចុះទៅបង្រៀនអប់រំណែនាំពីរបៀបដាំ និងរបៀបថែទាំនោះទេ ដោយរៀនតៗគ្នាពីឪពុកម្តាយទៅកូនចៅប៉ុណ្ណោះ ហើយពេលឃើញដំណាំក្រូចមានជំងឺក៏មិនដឹងធ្វើយ៉ាងណាដែរ មានតែអង្គុយសោកស្តាយដំណាំដែលបានផលហើយ បែរជាក្លាយទៅជាងាប់អស់រលីងបែបនេះ ។
ការលក់ក្រូចរបស់គាត់ គឺក្នុង១ផ្លូនចំនួន៤០ផ្លែ ឈ្មួញទិញតម្លៃ១០០០០ទៅ១៥០០០រៀល តាមផ្លែតូច ឬផ្លែធំលុះគេយកទៅលក់អាច១គីឡូក្រាម៣៥០០រៀលទៅ៤០០០រៀល ដោយ គិតតម្លៃទីផ្សារក្រូចនៅមានការធ្លាក់ចុះខ្លាំងអត់សូវមានតម្លៃខ្ពស់នោះទេ ៕
ចែករំលែកព័តមាននេះ