នៅពេលអ្នកមានជំងឺ ការញ៉ាំអាហារដែលត្រឹមត្រូវ គឺជារឿងដែលសំខាន់ជាង អ្វីៗទៅទៀត។ អាហារខ្លះមានសារធាតុដែលចាំបាច់ ហើយអាចទ្រទ្រង់ដល់រាងកាយ ដើម្បីប្រឆាំងនឹងជំងឺបាន។ សូមណែនាំនូវអាហារមួយចំនួន ព្រោះវាអាចជួយបំបាត់រោគញ្ញា ហើយក៏ជួយឲ្យអ្នកកាន់តែឆាប់ជាផងដែរ ។
១-ផ្លែចេក ៖ ផ្លែចេកគឺជាអាហារដ៏ល្អមួយដែលអ្នកគួរញ៉ាំនៅពេលមានជំងឺ ។ វាជាអាហារដែលស្រួលទំពា តែផ្តល់កាឡូរី និងជីវជាតិគ្រប់គ្រាន់។ ផ្លែចេកត្រូវបានគេណែនាំឲ្យទទួលទានលើករណីមានបញ្ហាចង្អោរ ។ អត្ថប្រយោជន៍មួយផ្សេងទៀតរបស់ផ្លែចេកគឺសម្បូរជាតិសរសៃ ។ បើសិនជាអ្នករាករូស ផ្លែចេកអាចជាអាហារដ៏ល្អបំផុតសម្រាប់អ្នកហើយ ព្រោះជាតិសរសៃរបស់វាអាចជួយបំបាត់ការរាករូសបាន ។
២-ទឹកដូង ៖ នៅពេលក្រពះមានការរលាក ឬមានបញ្ហាក្រពះ សារធាតុដែលមានឈ្មោះថា Tannins ដែលមានក្នុងទឹកដូងប្រហែលជាជួយបន្ថយការរលាកនេះបាន ។ ជាមួយគ្នានេះដែរ ទឹកដូងសម្បូរជាតិរ៉ែដូចជា ប៉ូតាស្យូម និងសូដ្យូម ។ វាអាចជួយរាងកាយបង្គ្រប់ជាតិទឹកបានលឿនក្រោយពីក្អួត ឬរាករូសរួច ។ ការសិក្សាបានរកឃើញថា ទឹកដូងប្រហែលជាជួយផ្តល់នូវការបង្គ្រប់ជាតិទឹកដូចគ្នានឹងភេសជ្ជៈប៉ូវកម្លាំងពេលលេងកីឡា ។ អ្វីដែលកាន់តែមានប្រយោជន៍គឺទឹកដូងគ្មានជាតិស្ករដែលត្រូវបន្ថែមឡើយ ។
៣-ទឹកឃ្មុំ ៖ ការឈឺបំពង់កអាចបង្កឡើងដោយការបង្ករោគពីបាក់តេរី ។ ទឹកឃ្មុំផ្ទុកទៅដោយសារធាតុប្រឆាំងនឹងមេរោគដែលអាចជួយបោសសម្អាតការបង្ករោគទាំងនេះបាន។ ជាមួយគ្នានេះដែរ ទឹកឃ្មុំប្រហែលជាមានប្រយោជន៍លើការព្យាបាលការក្អករបស់ក្មេង ប៉ុន្តែចូរចាំថា វាមិនគួរណាប្រើលើទារកទើបនឹងកើតអាយុក្រោម១២ខែឡើយ។
៤-បន្លែពណ៌បៃតង ៖ វាគឺជារឿងសំខាន់ណាស់ដែលអ្នកត្រូវញ៉ាំអាហារមានជាតិរ៉ែ និងវីតាមីនទាំងអស់ខណៈពេលដែលកំពុងតែឈឺ ប៉ុន្តែវាអាចជារឿងពិបាកបំផុត ក្នុងការរករបបអាហារបែបនេះ ។ បន្លែពណ៌បៃតងដូចជា សាឡាត ឬ ស្ពៃស្ពីណាច ផ្ទុកទៅដោយជាតិសរសៃ វីតាមីន និងជាតិរ៉ែ ។ វាគឺជាប្រភពដ៏ល្អនៃវីតាមីន Folate, C, A និង K ។ បន្លែពណ៌បៃតងចាស់ក៏ផ្ទុកទៅដោយសារធាតុមានប្រយោជន៍ច្រើនដែរ ដែលដើរតួនាទីជាអង់ទីអុកស៊ីដង់ដើម្បីជួយការពារកោសិកាពីការខូចខាត និងប្រឆាំងការរលាកផង ។
៥-ត្រីសាលម៉ុង ៖ ត្រីសាលម៉ុងគឺជាប្រភពដ៏ល្អបំផុតមួយនៃជាតិប្រូតេអ៊ីនដែលអ្នកគួរញ៉ាំនៅពេលឈឺ ។ វាងាយស្រួលក្នុងការញ៉ាំ ទន់ និងផ្ទុកទៅដោយប្រូតេអ៊ីនដែលមានគុណភាពខ្ពស់ និងជាតម្រូវការរបស់រាងកាយផង ។ ត្រីសាលម៉ុងផ្ទុកទៅដោយអាស៊ីតខ្លាញ់អូមេហ្គាបីដែលអាចប្រឆាំងនឹងការរលាកយ៉ាងល្អ ។ ក្រៅពីនេះ ត្រីសាលម៉ុងក៏ជាប្រភពដ៏ល្អមួយនៃជាតិរ៉ែ និងវីតាមីនដូចជា វីតាមីន D ជាដើម ដែលវាដើរតួនាទីយ៉ាងសំខាន់លើមុខងារប្រព័ន្ធភាពស៊ាំ។
៦-ស៊ុប ៖ ស៊ុបគឺជាអាហារដ៏ល្អមួយទៀតដែលគួរញ៉ាំនៅពេលមានអារម្មណ៍មិនស្រួលខ្លួន ។ ស៊ុបឆ្អឹងក្តៅឧណ្ហៗនឹងជួយឲ្យធូរស្រាលក្នុងទ្រូងនៅពេលអ្នកកំពុងតែថប់ដង្ហើម ។ ខ្ទឹមស និងខ្ទឹមបារាំងក្នុងទឹកស៊ុបនេះ គឺជាជីវជាតិដ៏អស្ចារ្យ ហើយក៏អាចសម្លាប់មេរោគនានាបានថែមទៀតផង ។
ការសិក្សាមិនបានណែណាំថា ស៊ុបមាន់ក្តៅ ឧណ្ហៗមួយចាននឹងជួយព្យាបាលជំងឺឡើយ តែវាជាអ្វីដែលជួយឲ្យមានផាសុកភាព និងជាការព្យាបាលដ៏ពេញនិយមនួយក្នុងការជួយបង្គ្រប់ជាតិទឹកក្នុងរាងកាយ ដើម្បីបន្ថយការរលាក ប្រឆាំងការបង្ករោគ និងមិនឲ្យតឹងច្រមុះ ស្ទះផ្លូវដង្ហើម និងបំពង់ក (ប្រភពពី៖ Health.com.kh) ៕
ចែករំលែកព័តមាននេះ