ខេត្តបាត់ដំបង ៖ កងកម្លាំងអន្តរាគមន៍ពិសេស វរសេនាតូចលេខ១ នៅទីបញ្ជាការតំបន់ប្រតិបត្តិការសឹករងបាត់ដំបងត្រូវបានបិទវគ្គហ្វឹកហ្វឺនបំប៉នជំនាញ ដែលមានរយៈពេល៤៥ថ្ងៃរួចមកក្រោមអធិបតីភាព លោកឧត្តមសេនីយ៍ ឯក ជា រស់ អនុប្រធានក្រុមការងារស្រាវជ្រាវ យុទ្ធសាស្ត្រយោធា អគ្គបញ្ជាការ លោកឧត្តមសេនីយ៍ទោ ជុំ សុខឿន អគ្គនាយករងនាយកដ្ឋានផ្គត់ផ្គង់ស្បៀងក្រសួងការពារជាតិប្រចាំទិសយោធភូមិភាគទី៥ លោកឧត្តមសេនីយ៍ ទោ អ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបង ព្រមទាំងមេបញ្ជាការរង នាយការិយាល័យបានចូលរួម ។
លោកវរសេនីយ៍ឯក ហង្ស សុភ័ណ្ឌ មេបញ្ជាការរងតំបន់ប្រតិបត្តិការសឹករងបាត់ដំបងទទួលបន្ទុកការងារហ្វឹកហ្វឺនបានរាយការណ៍អំពីដំណើរការបើកវគ្គហ្វឹកហ្វឺនពីដើមឆ្នាំ២០១៨កន្លងមកនេះ គឺបានចំនួន១២វគ្គ ចំនួន៤០៥នាក់ ដោយមានការជួយទំនុកបម្រុងពីមេបញ្ជាការ និងគ្រប់ថ្នាក់ដឹកនាំបានជួយបំប៉នអាហារមួយថ្ងៃ៣ពេល និងការស្នាក់នៅបានគ្រប់គ្រាន់ គ្រប់វគ្គជាបន្តបន្ទាប់ ដោយក្នុងគោលបំណង លើកកម្ពស់ការយល់ដឹង វិន័យ សណ្តាប់ធ្នាប់ តួនាទី ភារកិច្ច នយោបាយចិត្តសាស្ត្រ ក្រមសីលធម៌ ច្បាប់រដ្ឋ បណ្តុះឆន្ទៈប្រយុទ្ធ ត្រៀមប្រយុទ្ធក្នុងស្មារតីអង់អាចក្លាហាន ដើម្បីមាតុភូមិ ការពារបូរណភាពទឹកដី ទប់ស្កាត់ប្រឆាំងភរវកម្ម បាតុកម្ម បទល្មើសគ្រឿងញៀន និងជួយសង្គ្រោះដល់ប្រជាពលរដ្ឋដែលជួបគ្រប់គ្រោះមហន្តរាយផ្សេងៗដែលកើតមានមកនោះ ។
បន្ទាប់ពីបានចែកវិញ្ញាបនបត្រដល់សិក្ខាកាមពូកែទាំងអស់រួចមក លោកឧត្តមសេនីយ៍ ឯក ជា រស់ បានរំលឹកអនុស្សាវរីយ៍ចាស់ៗ កាលពីជំនាន់មានសង្គ្រាមកន្លងមកក្នុងតំបន់នេះ ដោយមានអ្នកពលីជីវិតអស់ជាច្រើននាក់ ហើយអ្នកដែលនៅសល់ គឺមានវ័យកាន់តែចាស់ៗរៀងខ្លួនទៅហើយ ដូច្នេះសូមយុវវ័យដែលបានហ្វឹកហ្វឺនរួច ធ្វើការងារបន្តវេន សូមយកបទពិសោធន៍ទាំងប៉ុន្មានទៅអនុវត្តន៍បន្តក្នុងកិច្ចការ ការពារ និងកសាងសង្គមជាបន្តទៅទៀត ឲ្យមានប្រសិទ្ធិភាព ។
លោកឧត្តមសេនីយ៍ឯកបានផ្តាំផ្ញើទៀតថា ត្រូវសិក្សាស្រាវជ្រាវដោយខ្លួនឯងបន្ថែមទៀត ទាំងផ្នែកព័ត៌មានវិទ្យាក្នុងសង្គម ចៀសវាងការជឿតាមការបំពុលក្នុងសង្គមពីក្រៅប្រទេសមក ដោយកន្លងមកថ្មីៗនេះជនអគតិមួយចំនួនបានបំផុសបំពុលបង្កការរំខានដល់ការបោះឆ្នោត តាមរបៀបឃោសនាម្រាមដៃស្អាត និងដេកនៅផ្ទះឈ្នះឯងត្រូវបានទទួលបរាជ័យទាំងស្រុង ដូច្នោះដំណើរការបោះឆ្នោតនៅកម្ពុជា គឺទទួលបានតាមរបៀបប្រជាធិបតេយ្យ មានតម្លាភាព គ្មានអំពើហិង្សាមករំខានការបោះឆ្នោតឡើយ ៕
ចែករំលែកព័តមាននេះ