ខេត្តកំពត ៖ ការជំពាក់បំណុលធនាគារ ដែលតាមច្បាប់គឺត្រូវតែសង ព្រោះរបរអ្នកឱ្យខ្ចីប្រាក់ គឺរំពឹងបានប្រាក់ការនេះឯង ។ បើនិយាយពីបញ្ហាបំណុលក្នុងស្រទាប់ពលរដ្ឋខ្មែរបច្ចុប្បន្នពិតណាស់ថា បានកើតឡើងនូវបញ្ហាផ្សេងៗ ដែលករណីខ្លះជាយថាហេតុ បានបង្ហាញពីការបរាជ័យនៃមុខរបរ បានធ្វើឱ្យអ្នកជំពាក់បំណុល ប្រឈមនិងការលំបាក ។
ករណីជំពាក់បំណុលធនាគារឯកជនមួយ បានកើតឡើងនូវការស្មុគស្មាញបំផុត ដែលស្ត្រីជាម្ដាយម្នាក់បានប៉ុនប៉ងរុះផ្ទះលក់យកប្រាក់សងបំណុលដល់ធនាគារមួយ តែត្រូវបានធនាគារមួយទៀតបានរារាំង ព្រោះជំពាក់ដែរ ។
ផ្ទះពីរខ្នងប្រក់ក្បឿងក្បាច់ ជញ្ជាំងក្ដារយ៉ាងល្អប្រណិតមួយ នៅជនបទនៅភូមិកន្លង់ ឃុំស្ដេចគង់ខាងជើង ស្រុកបន្ទាយមាស ដែលកំពុងវ័ន្តកម្ចាស់ផ្ទះ ឈ្មោះ អ៊ូច សារេត អាយុ៥២ឆ្នាំ ។ ស្ត្រីចំណាស់រូបនេះបាននិយាយឱ្យដឹងថា គាត់ជាម្ដាយរបស់ម្ចាស់ផ្ទះនេះ ដែលមានកូនប្រសាស្រីឈ្មោះ នឹម រស្មី អាយុ២៨ឆ្នាំ និងឈ្មោះ អ៊ុយ យ៉េត អាយុ៣២ឆ្នាំ ជាកូនប្រុសរបស់គាត់ ។
ម្ចាស់ផ្ទះទាំងពីរនាក់ប្ដីប្រពន្ធនេះ ត្រូវបានគាត់ជាម្តាយបានជួយធានាផ្ដិតមេដៃ និងប្រគល់ប្លង់ដីស្រែ ចំនួន៣កន្លែង ទៅឱ្យធនាគារឯកជនមួយ ។ ទឹកប្រាក់ដែលគាត់ជាម្ដាយជួយធានាក្នុងការខ្ចីប្រាក់ធនាគារមានចំនួន១មុឺន៣ពាន់ដុល្លារ ជួយឱ្យកូនទិញម៉ាសុីនច្រូតស្រូវ១គ្រឿង ដើម្បីយកមកប្រកបរបរស៊ីឈ្នួលច្រូតកាត់ ។ ប៉ុន្តែជាអកុសល កូនប្រុសរបស់គាត់ឈ្មោះ អ៊ុយ យ៉េត ដែលបានទៅសុីឈ្នួលច្រូតនៅខេត្តកំពង់ស្ពឺ ត្រូវរងគ្រោះដោយខ្យល់គរស្លាប់ កាលពីដើមឆ្នាំ២០១៨នេះទៅ ។
គាត់រៀបរាប់ទៀតថា លុះមិនបានប៉ុន្មានខែផង កូនប្រសាស្រីបានយកប្ដីម្នាក់ទៀត ថែមទាំងបានគេចខ្លួនមិនព្រមជួយសងបំណុលធនាគារនោះទេ ដោយទុកឱ្យគាត់ជាម្ដាយក្មេក ជាអ្នកសងបំណុលរាល់ខែ ។ ស្ត្រីចំណាស់រូបនេះ បាននិយាយប្រាប់បន្តថា ដោយសារតែកូនប្រសាស្រីយកម៉ាស៊ីនច្រូតស្រូវទៅលាក់ទុក ថែមទាំងមិនជួយសងបំណុល ហើយគាត់ក៏អត់លទ្ធភាពបង់បំណុល ក៏មានគំនិតរុះផ្ទះកូនលក់យកប្រាក់សងបំណុល ព្រោះកូនជាអ្នកខ្ចី ។ ផ្ទះនេះ គ្រាន់តែប្រុងរុះ៣ដងហើយ មិនបានសម្រេចព្រោះមានធនា គារឯកជនមួយទៀតមករារាំង រួមមានទាំងកំលាំងនគរបាលប៉ុស្តិ៍ស្ដេចគង់ខាងជើងមកជាមួយផង ។
ស្ត្រីចំណាស់រូបនេះ បានសំណូមពរឱ្យអាជ្ញាធរជួយគាត់ផង ។ គាត់ចោទប្រកាន់ថា អាជ្ញាធរមិនយក ចិត្តទុកដាក់ពីបញ្ហាប្រឈមរបស់គាត់ទេ តើទុកឱ្យគ្រួសារគាត់ត្រូវគេមករឹបអូសទ្រព្យសម្បត្តិអស់រលីងពីផ្ទះ ហើយឱ្យគាត់ទៅពឹងនរណា ។ លោក អ៊ូ គឹន មេឃុំស្ដេចគង់ខាងជើងបានប្រាប់ឱ្យដឹងថា រឿងគ្រួសារនោះគាត់ជំពាក់បំណុលធនាគារឯកជន គឺពាក់ព័ន្ធវែងឆ្ងាយណាស់ ។ លោកមេឃុំបានប្រាប់ថា ឈ្មោះ អ៊ុយ យ៉េត ជាម្ចាស់ផ្ទះបានស្លាប់ទៅហើយ នៅសល់តែប្រពន្ធ ។
ចំពោះការជំពាក់បំណុលធនាគារនេះ ស្ត្រីជាម្តាយបានធានាដល់កូនដែលបានខ្ចីប្រាក់នេះដែរ ដោយដាក់ប្លង់ដីស្រែ៣កន្លែង ហើយកូនប្រសានិងកូនប្រុសរបស់គាត់ដែលស្លាប់ទៅនោះ ក៏បានចងការប្រាក់ពីធនាគារមួយទៀត ទើបពេលម្តាយក្មេកប៉ងរុះផ្ទះលក់យកលុយបង់បំណុលធនាគារមួយ ក៏ស្រាប់តែធនាគារមួយ ទៀតរារាំង ។ ពេលនេះមិនដឹងត្រូវដោះស្រាយបែបណាទេ ៕
ចែករំលែកព័តមាននេះ