រាជធានីភ្នំពេញ ៖ បុរសម្នាក់បានជួបគ្រោះថ្នាក់ចរាចរណ៍បណ្តាលឱ្យស្លាប់ភ្លាមៗនៅកន្លែងកើតហេតុ មិនដឹងថាបុកជាមួយអ្វីឱ្យពិតប្រាកដនោះទេ តែមានការសង្ស័យថាបុកជាមួយរថយន្តពីក្រោយ ហើយក្រុមគ្រួសារដឹកសពយកទៅផ្ទះភ្លាមៗផងដែរ ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៨យប់ថ្ងៃទី១៦ ខែសីហា ឆ្នាំ២០១៨ នៅតាមបណ្ដោយផ្លូវ ៣០ម៉ែត្រកែងផ្លូវជាតិលេខ៣ ចំងាយប្រមាណ១០០ម៉ែត្រ ស្ថិតនៅព្រំប្រទល់ខណ្ឌពោធិ៍សែនជ័យ និងខណ្ឌដង្កោ ដែលស្ថិតនៅភូមិព្រៃកំបុត សង្កាត់ចោមចៅ២ ខណ្ឌពោធិ៍សែនជ័យ ។
ជនរងគ្រោះដែលស្លាប់ឈ្មោះ ទឹក សុខលីម ភេទប្រុស អាយុ៤៤ឆ្នាំ មុខរបរជាងសំណង់ រស់នៅភូមិស្រែក្នុងសង្កាត់កន្ទោក ខណ្ឌពោធិ៍សែនជ័យ ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៦ពណ៌ខ្មៅ ពាក់ស្លាកលេខ កណ្ដាល ១C-១១៤០ បើកបរក្នុងទិសដៅពីកើតទៅលិច។
តាមប្រភពព័ត៌មានពីប្រជាពលរដ្ឋដែលធ្វើដំណើរតាមផ្លូវខាងលើបាននិយាយថា មុនពេលកើតហេតុ គេឃើញបុរសជាជនរងគ្រោះដេកដួលនៅលើថ្នល់ ហើយជនរងគ្រោះមានស្នាមរយះមុខធ្ងន់ធ្ងរ ចំណែកម៉ូតូរបស់ជនរងគ្រោះរងការខូចខាតផ្នែកកាង និងក្បាលម៉ូតូ ក៏ប៉ុន្តែកង់ម៉ូតូមិនមានរងការខូចខាតឡើយ មិនដឹងបុកជាមួយអ្វីនោះទេ តែគេសង្ស័យថាបានបុកជាមួយរថយន្តធុនធំពីក្រោយ ហើយរថយន្តបើកចេញទៅបាត់ ។
ប្រភពព័ត៌មានបានបន្តទៀតថា ពេលនោះប្រជាពលរដ្ឋខាងលើក៏បានទាក់ទងទៅក្រុមគ្រួសារមកដល់កន្លែងកើតហេតុភ្លាមៗផងដែរ បន្ទាប់មកក្រុមគ្រួសារជនរងគ្រោះខាងលើក៏បានដឹកសពតាមរ៉ឺម៉កម៉ូតូកង់បី ចំណែកម៉ូតូត្រូវបានបងប្អូនជិះយកទៅផ្ទះជនរងគ្រោះផងដែរ។
ប្រភពព័ត៌មានពីសមត្ថកិច្ចវិញបានឲ្យដឹងថា បន្ទាប់ពីមានប្រជាពលរដ្ឋបានរាយការណ៍ទៅសមត្ថកិច្ចប្រាប់ពីហេតុការណ៍ខាងលើរួចមក ភ្លាមៗនោះសមត្ថកិច្ចបានជិះម៉ូតូដើររកចុះឡើងៗជាច្រើនដងតែរកមិនឃើញ លុះប្រមាណជាង២ម៉ោង ទើបសមត្ថកិច្ចដឹងថា សពត្រូវក្រុមគ្រួសារដឹកយកទៅផ្ទះបាត់ហើយ ។
ដោយហេតុការណ៍ខាងលើមិនមែនកើតឡើងក្នុងទឹកដីរបស់ខ្លួន ទើបកម្លាំងនគរបាលផ្នែកចរាចរណ៍ខណ្ឌដង្កោ បានប្រគល់ករណីខាងលើនេះទៅឱ្យជំនាញផ្នែកសណ្តាប់ធ្នាប់ចរាចរណ៍ខណ្ឌពោធិ៍សែនជ័យវិញ ដើម្បីចុះវាស់វែងកន្លែងកើតហេតុខាងលើផងដែរ ៕
ចែករំលែកព័តមាននេះ