ទីក្រុងប៉េកាំង ៖ ក្រុមហ៊ុននាំចូលប្រេងក្នុងប្រទេសចិន កំពុងតែជៀសវាងការទិញប្រេងពីសហរដ្ឋអាមេរិក ព្រោះតែមានការភ័យខ្លាចថា ប្រទេសចិនអាចនឹងសម្រេចចិត្តដាក់ប្រេងក្នុងបញ្ជីផលិតផលជាប់ពន្ធវិញ ខណៈដែលកំពុងស្ថិតក្នុងជម្លោះពាណិជ្ជកម្ម ។ ទិន្នន័យរបស់ Thomson…
ទីក្រុងប៉េកាំង ៖ ក្រុមហ៊ុននាំចូលប្រេងក្នុងប្រទេសចិន កំពុងតែជៀសវាងការទិញប្រេងពីសហរដ្ឋអាមេរិក ព្រោះតែមានការភ័យខ្លាចថា ប្រទេសចិនអាចនឹងសម្រេចចិត្តដាក់ប្រេងក្នុងបញ្ជីផលិតផលជាប់ពន្ធវិញ ខណៈដែលកំពុងស្ថិតក្នុងជម្លោះពាណិជ្ជកម្ម ។
ទិន្នន័យរបស់ Thomson Reuters Eikon បានបង្ហាញថា ចាប់ពីដើមខែសីហាមក មិនមាននាវាដឹកប្រេងឆៅពីសហរដ្ឋអាមេរិកមួយឡើយ ដែលធ្វើដំណើរទៅកាន់ប្រទេសចិន ខណៈដែលប្រទេសចិនធ្លាប់តែនាំចូលប្រេងប្រមាណ ៣០ម៉ឺនធុងក្នុង១ថ្ងៃពីសហរដ្ឋអាមេរិក កាលពីខែមិថុនា និងកក្កដា ។
សហរដ្ឋអាមេរិកនិងប្រទេសចិន បានជាប់ក្នុងជម្លោះពាណិជ្ជកម្មអស់រយៈពេលជាច្រើនខែមកហើយ ប៉ុន្តែប្រេងឆៅមិនជាប់ក្នុងបញ្ជីផលិតផលជាប់ពន្ធរបស់ប្រទេសចិន ដែលបានប្រកាសកាលពីសប្តាហ៍មុនឡើយ ។
ការសម្រេចចិត្តនេះបង្ហាញពីសារសំខាន់របស់សហរដ្ឋអាមេរិកក្នុងនាមជាអ្នកផលិតប្រេងដ៏សំខាន់មួយលើពិភពលោក និងជាប្រភពផ្គត់ផ្គង់ដ៏សំខាន់សម្រាប់ប្រទេសចិន ។
ប៉ុន្តែក្រុមហ៊ុននាំចូលក្នុងប្រទេសចិនដែលមានចំណាប់អារម្មណ៍លើប្រេងអាមេរិកអាចនឹងត្រូវបានប្រើប្រាស់ក្នុងការចរចាជាមួយនឹងសហរដ្ឋអាមេរិកនាពេលអនាគត ។
ប្រធានផ្នែកស្រាវជ្រាវក្នុងក្រុមហ៊ុន Wood Machenzi លោក Sushant Gupta បានឲ្យដឹងថា ៖« ព្រោះតែវាត្រូវការពេលរាប់ខែក្នុងការដឹកជញ្ជូនប្រេងអាមេរិកទៅកាន់ប្រទេសចិនការមិនទិញប្រេងអាមេរិកគឺជាវិធានប្រុងប្រយ័ត្នមួយដើម្បីជៀសវាងការប្រញាប់លក់ចេញវិញក្នុងករណីដែលរដ្ឋាភិបាលដាក់ពន្ធលើប្រេងឆៅអាមេរិក »។
ប្រភពមួយមកពីក្រុមហ៊ុនកែច្នៃប្រេងចិនបាននិយាយថា ក្រុមហ៊ុនកំពុងតែតាមដានមើលស្ថានការណ៍ មុនពេលកុម្មង់ប្រេងអាមេរិកបន្ថែម ៕
ចែករំលែកព័តមាននេះ