ខេត្តកំពត ៖ ទណ្ឌិតដែលកំពុងជាប់ឃុំឃាំងពាក់ព័ន្ធគ្រឿងញៀនមានចំនួន៥០២នាក់ លោកវរសេនីយ៍ ឯកគង់ សុខន ស្នងការរងទទួលផែនប្រឆាំងបទល្មើសខេត្តកំពតបានអានរបាយការណ៍ក្នុងទិវាអន្តរជាតិប្រយុទ្ធប្រឆាំងគ្រឿងញៀន ដែលរដ្ឋបាលខេត្តកំពតបានរៀបចំ កាលពីព្រឹកថ្ងៃទី១៥ សីហា ២០១៨ នៅវិទ្យាល័យព្រះបិតាជាតិ ក្នុងស្រុកកំពង់ត្រាច ដោយមានអ្នកចូលរួមមកពីក្រុង និងស្រុកចំនួន២៥០០នាក់ ។
លោកវរសេនីឯក គង់ សុខន បានអានរបាយការប្រាប់អ្នកដែលចូលរួមថា នៅភូមិសាស្ត្រខេត្តកំពត-សភាពការបទល្មើសគ្រឿងញៀនក្នុងឆមាសទី១ ឆ្នាំ២០១៨នេះគាត់សម្គាល់ឃើញថា មិនមានបទល្មើសអ្វីកើតឡើងទេ នៅការលបលួចកែច្នៃផលិតគ្រឿងញៀន និងការដាំដុះកញ្ឆា ។ ដោយឡែកការជួញដូរ និងប្រើប្រាស់គ្រឿងញៀននៅតែកើតមានជាបន្តបន្ទាប់នៅគ្រប់បណ្ដាស្រុក និងក្រុងទូទាំងខេត្តកំពត ប៉ុន្តែមានលក្ខណៈទ្រុងទ្រាយតូចៗ ។
លោកវរសេនីយ៍ឯក គង់ សុខន បានប្រាប់បន្តក្នុងរបាយការណ៍ថា សកម្មភាពគ្រឿងញៀននៅក្នុងខេត្តកំពតនោះ គឺគេនាំចូលមកពីក្រុងភ្នំពេញ តាមរយៈខោអាវតាមរថយន្តតាក់ស៊ី ឫការចល័តជួបគ្នាតាមទូរស័ព្ទ ។ លោកវរសេនីយ៍ឯកគង់ សុខន បានប្រាប់ឲ្យដឹងថា ជាក់ស្ដែងក្នុងឆមាសទី១ ក្នុងឆ្នាំ២០១៨ នេះ នគរបាលបានបង្ក្រាបបទល្មើសគ្រឿងញៀនបានចំនួន១០៨ករណី និងឃាត់ខ្លួនជនសង្ស័យបានចំនួន២៥០នាក់ ស្រីចំនួន២៩នាក់ ។ ក្នុងនោះដែរកម្លាំងកងរាជអាវុធហត្ថខេត្តបង្ក្រាបបានចំនួន១៥ករណីផងដែរ ឃាត់ខ្លួនមនុស្ស៤៦នាក់ ក្នុងនោះមានជនជាតិបទេសម្នាក់ ។ និងបទល្មើសជួញដូរគ្រឿងញៀនបង្ក្រាបបាន៨២ ករណីចាប់ខ្លួនជនសង្ស័យបានចំនួន១៩១នាក់ ស្រី២៤នាក់ យកវត្ថុតាងគ្រឿងញៀន២៧៦កញ្ចប់ ទម្ងន់២៥៩/៥០ក្រាម និងជញ្ជីងថ្លឹងចំនួន៦រថយន្ត៣គ្រឿង ម៉ូតូ៩គ្រឿង ទូរស័ព្ទដៃ១៦គ្រឿង អាវុធកែឆ្នៃ៥ដើម ដាវ៥ដើម និងប្រាក់រៀល និងដុល្លារមួយចំនួនទៀត ។
លោកវរសេនីយ៍ឯក គង់ សុខន ស្នងការរងទទួលផែនបទល្មើសថា ក្នុងរយៈពេលឆមាសទី១ ឆ្នាំ២០១៨នេះ មានទណ្ឌិតចំនួន៥០២នាក់ពាក់ព័ន្ធ និងគ្រឿងញៀនកំពុងជាប់ឃុំក្នុងពន្ធនាគាខេត្តកំពត ។
លោកជាវ តាយ អភិបាលនៃគណអភិបាលខេត្តកំពតបានអានសាររបស់អគ្គមហាសេនាបតីតេជោ ហ៊ុន សែន ដែលមានខ្លឹមសារក្នុងទិវាអន្តរជាតិប្រយុទ្ធប្រឆាំងគ្រឿងញៀន ។ លោក ជាវ តាយ អភិបាលខេត្តកំពតមានប្រសាសន៍ថា រដ្ឋបាលខេត្តមានការរៀបចំយឺតយ៉ាវដោយសារ តែជាប់រវល់រៀបចំការបោះឆ្នោតជាតិ បន្ទាប់មកទៀតស្រុកមួយចំនួនបានរងគ្រោះដោយជំនន់ទឹកភ្លៀង ។ លោកបន្តមានប្រសាសន៍ថា ពាក់ព័ន្ធ និងគ្រឿងញៀនមន្ត្រីតាមបណ្ដាស្រុកឃុំបន្តយកចិត្តទុកដាក់បន្ថែមទៀត និងជម្រុញការក្ដាប់សភាពការឲ្យបានស៊ីជម្រៅ និងការកសាងឲ្យមានកម្លាំងភ្នាក់ងារសម្ងាត់ជ្រៀតចូលនៅមុខសញ្ញាដែលយើងកំពុងតាមដាន ៕
ចែករំលែកព័តមាននេះ