ខេត្តត្បូងឃ្មុំ៖ លំនៅឋានរបស់ប្រជាពលរដ្ឋខ្មែរអ៊ិស្លាមចំនួន៤ខ្នង ស្ថិតនៅជាប់មាត់ទន្លេមេគង្គ ក្នុងឃុំ
ជីរោទ៍ទី១ ស្រុកត្បូងឃ្មុំ បានរលំបាក់ចូលទៅក្នុងទឹកទន្លេ តែមិនមានបណ្តាលឱ្យមនុស្សណាម្នាក់រងគ្រោះថ្នាក់នោះទេ ។ ទោះបីជាទឹកបានស្រកនៅត្រឹម១៤,៨៨ម៉ែត្រ ដែលកំរិតប្រកាសឲ្យប្រុងប្រយ័ត្ន១៥,២០ម៉ែត្រ ក៏ពលរដ្ឋដែលរងគ្រោះដោយទឹកជំនន់ កំពុងតែរស់នៅលើទីទួលសុវត្ថិភាពជាច្រើនកន្លែងមិនទាន់បានទៅរស់នៅលើលំនៅឋានវិញនោះទេ ។
យោងតាមរបាយការណ៍របស់លោកនាយប៉ុស្ត៏រដ្ឋបាលឃុំជីរោទ៍ទី១បានឱ្យដឹងថា កាលពីវេលាម៉ោង១រសៀលថ្ងៃទី១៤ សីហា ២០១៨ ទឹកទន្លេហូរកួចខ្លាំងបណ្តាលឱ្យផ្ទះ៤ខ្នងស្មើនឹង៤គ្រួសារ ក្នុងនោះរួមមាន ១-ផ្ទះដែលមានម្ចាស់ឈ្មោះ សា រ៉សេត ភេទប្រុស អាយុ២៨ឆ្នាំ នៅបឹងទន្សោង សង់ពីឈើប្រក់ស័ង្កសីទំហំ៤ម៉ែត្រគុណនឹង៥ម៉ែត្រ ដួលទាំងស្រុង ២-ផ្ទះដែលមានម្ចាស់ឈ្មោះ ម៉ាត់ ម៉ាលី ភេទស្រី អាយុ៤៣ឆ្នាំ ភូមិព្រែកតូច ទំហំ៣ម៉ែត្រគុណនឹង៤ម៉ែត្រដួលទាំងស្រុង ៣-ផ្ទះដែលមានម្ចាស់ឈ្មោះ ញិល វី ភេទប្រុស ទំហំ៤ម៉ែត្រគុណ៥ម៉ែត្រ នៅភូមិព្រែកតូច ដួលទាំងស្រុង និង៤-ផ្ទះដែលមានម្ចាស់ឈ្មោះ កើ ជះ ភេទស្រី នៅភូមិព្រែកតូចទំហំ៣ម៉ែត្រគុណ៤ម៉ែត្រ សង់អំពីឫស្សីដួលទាំងស្រុង ។
លោកគាន លឹមហេង អាយុ៦១ឆ្នាំ ជាប្រជាពលរដ្ឋរស់នៅភូមិទន្លេបិទលើ ឃុំទន្លេបិទ ស្រុកត្បូងឃ្មុំ ប្រាប់នៅព្រឹកថ្ងៃទី១៦ សីហា ២០១៨ ថា កាលពីថ្ងៃទី២ សីហា កន្លងទៅទឹកទន្លេបានហក់ឡើងមកលិចក្រោមផ្ទះរបស់គាត់ ដោយរស់នៅមិនកើត គាត់ក៏នាំសមាជិកក្រុមគ្រួសារ មកស្នាក់នៅលើទួលសុវត្ថិភាពឧកញ៉ាសេតនៅឃុំទន្លេបិទរួមជាមួយនឹងគោចំនួន៩ក្បាល បន្តរហូតមកដល់ថ្ងៃទី១៦សីហា ក៏មិនទាន់បានទៅវិញដែរ។
លោកលឹម ហេង ប្រាប់បន្តថា ស្របពេលដែលកំពុងតែរស់នៅលើទីទួលកំពុងតែជួបការលំបាកផង ស្រាប់
តែសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន មកចែកអំណោយកាកបាទក្រហម ក្នុងនោះមានអង្ករ ត្រីខ សារុង ក្រមា និងរបស់ផ្សេងៗទៀត ដែលអាចជួយដោះស្រាយនូវទុក្ខលំបាកបានមួយគ្រាផងដែរ ។ ដោយ
សារតែកន្លែងគាត់ស្នាក់នៅលើទីទួលផុតពីទឹក ដីស្ងួតល្អ គោរបស់គាត់ និងគោរបស់អ្នកភូមិផ្សេងទៀតជិត១០០ក្បាលមានសុខភាពល្អ មិនទាន់ឈឺដោយជំងឺអុតក្តាម ឬសាទឹកនោះទេ ប្រសិនបើមានពេទ្យសត្វមកចាក់ថ្នាំការពារជំងឺឱ្យនោះរឹតតែប្រសើរ ។ គាត់ពិបាករស់នៅបន្តិចដោយសារតែខ្វះកៅស៊ូតង់សម្រាប់ប្រក់ដំបូល ហើយបើកាកបាទក្រហមចែកកៅស៊ូតង់ឲ្យនោះគាត់នឹងយកមកបាំងការពារកុំឱ្យក្តៅ ឬភ្លៀងផងដែរ ។ មិនដឹងថាតើត្រូវរស់នៅលើទួលសុវត្ថិភាពនេះយូរប៉ុណ្ណាទៀតទេ ព្រោះទឹកទន្លេមិនទាន់ស្រកទៅ
វិញអស់ ហើយផ្លូវបេតុងត្រូវដើរលុយទឹកត្រឹមក្បាលជង្គង់ទៀត។
លោក យូ សុខឃាន់ អាយុ៣៧ឆ្នាំ ជាប្រជាពលរដ្ឋរស់នៅភូមិទន្លេបិទលើ ឃុំទន្លេបិទ បានឱ្យដឹងថា ពីមុនគាត់បានរៀបការទៅរស់នៅជាមួយខាងផ្ទះប្រពន្ធនៅភូមិដូនម៉ៅ ឃុំទន្លេបិទ បានកូនមួយ លុះពេលដែលលែងលះគ្នារួចមក គាត់បានមកនៅផ្ទះរបស់គាត់វិញត្រូវបានទឹកទន្លេឡើងមកជន់លិច ហើយផ្ទះដែលមានទំហំ៤ម៉ែត្រគុណ៥ម៉ែត្របានទ្រេត គាត់មានការព្រួយខ្លាចរំលំ ក៏បិទទ្វារចោលមិនហ៊ានរស់នៅ រួចមកនៅទីទួលសុវត្ថិភាពជាមួយនឹងគេឯង ។ ជាមួយនឹងក្តីកង្វល់នេះ គាត់ស្នើសុំអាជ្ញាធរជួយជាថវិការខ្លះសម្រាប់រុះផ្ទះ ព្រោះគាត់មានជីវភាពខ្វះខាតហើយក៏មិនទាន់បានទទួលអំណោយម្តងណាដែរ ។
លោកហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់និងនេសាទប្រាប់ឲ្យដឹងដែរថាចំពោះសត្វគោរបស់
ប្រជាពលរដ្ឋដែលរងគ្រោះដោយទឹកលិចលង់ ត្រូវបានម្ចាស់នាំមកនៅទីទួលសុវត្ថិភាពក្នុងឃុំទន្លេបិទ
ស្រុកត្បូងឃ្មុំ នាពេលកន្លងទៅមន្ត្រីបសុពេទ្យបានចុះចាក់ថ្នាំបង្ការសម្លាប់មេរោគជាបន្តបន្ទាប់ហើយ
ប្រសិនបើគោដែលមិនទាន់បានចាក់ថ្នាំនោះ រូបលោកនឹងចាត់ឲ្យមន្ត្រីជំនាញចុះទៅចាក់ថ្នាំជូន ដើម្បី
ឱ្យសត្វគោមានសុខភាពល្អ សម្រាប់ទុកបង្កបង្កើនផល ៕
ចែករំលែកព័តមាននេះ