ប្រទេសអាហ្វហ្គានីស្ថាន ៖ មនុស្សយ៉ាងតិច៣៤នាក់ស្លាប់ ហើយ៥៦នាក់នាក់ទៀតរងរបួស កាលពីថ្ងៃទី១៥ សីហា ដោយសារការវាយប្រហារអត្តឃាតថ្មីមួយនៅក្រុងកាប៊ុល ខណៈភាពស្ងប់ស្ងាត់កើតមានឡើងវិញនៅក្រុងហ្គាស្នី ភាគខាងកើតប្រទេស ក្រោយការវាយរុញច្រានពួកតាលីបង់ឲ្យខ្ទាតចេញពីទីក្រុងនោះ។
ការវាយប្រហារអត្តឃាតនេះកើតមានក្នុងសាលារៀនមួយ ស្ថិតក្នុងសង្កាត់ស៊ីអ៊ីតភាគខាងលិចរដ្ឋធានីអាហ្វហ្គានីស្ថាន ហើយជនរងគ្រោះភាគច្រើនជានិស្សិត។ លោកហាស្មាតស្តានីកហ្សៃ អ្នកនាំពាក្យប៉ូលិសក្រុង គូសបញ្ជាក់ថា នាវេលាម៉ោង១៦ម៉ោងក្នុងស្រុក ជនអត្តឃាតម្នាក់បំពាក់ដោយគ្រឿងផ្ទុះ បានធ្វើឲ្យផ្ទុះក្នុងមជ្ឈមណ្ឌលអប់រំMAWOUD។ មនុស្ស៣៤នាក់ស្លាប់ ដោយសារការផ្ទុះ ហើយ៥៦នាក់ទៀតរងរបួស។
មុននេះមានសេចក្ដីរាយការណ៍ពីមនុស្សស្លាប់ដល់៤៨នាក់និងរបួស៦៨នាក់។ ចំនួនមនុស្សដែលមានវត្តមាននៅកន្លែងមានការផ្ទុះពុំត្រូវបានគេដឹងច្បាស់ឡើយ តែតាមសាក្សីម្នាក់ជានិស្សិតថា មានសិស្សប្រមាណ១០០នាក់នៅខាងក្នុងសាលាពេលមានការវាយប្រហារភេរវកម្មនេះ។
ចំណែកនៅទីក្រុងហ្គាស្នីភាគខាងកើតប្រទេស រងការវាយលុកធំមួយរបស់ពួកតាលីបង់វិញ កងកម្លាំងសន្តិសុខល្បាតតាមដងវិថីទាំងឡាយ រួចនាថ្ងៃទី១៥សីហាគេពុំឃើញមានវត្តមានរបស់យុទ្ធជនតាលីបង់ម្នាក់ណាឡើយ។ ចំណែកពាណិជ្ជករចាប់ផ្ដើមជួសជុលការខូចខាត ព្រមទាំងសម្អាតហាងពួកគេ។
ការវាយលុកលើទីក្រុងហ្គាស្នី ជាទីក្រុងយុទ្ធសាស្ត្រមួយ ចាប់ផ្ដើមពីយប់ថ្ងៃទី៩ សីហាមក។ កងទ័ពអាហ្វហ្គានីស្ថានជួយទ្រទ្រង់ដោយការវាយប្រហារតាមអាកាសរបស់អាមេរិក ត្រូវទប់ទល់រយៈពេលច្រើនថ្ងៃ ចំពោះការវាយលុកដ៏សាហាវនោះទំរាំអាចវាយរុញច្រានពួកតាលីបង់ ចេញពីទីក្រុងនេះបាន។ ហើយគេនៅតែខ្លាចពួកតាលីបង់វិលមកវាយលុកជាថ្មីទៀត។
នាព្រឹកថ្ងៃទី១៦ សីហា នៅក្រុងកាប៊ុល មានពួកជនប្រដាប់អាវុធ វាយប្រហារប្រឆាំងមជ្ឈមណ្ឌលហ្វឹកហ្វឺនមួយនៃទីភ្នាក់ងារស៊ើបការណ៍អាហ្វហ្គានីស្ថានហើយផ្ទុះការប្រយុទ្ធគ្នា៕
ចែករំលែកព័តមាននេះ