ខេត្តព្រៃវែង ៖ បច្ចុប្បន្ននេះប្រជាពលរដ្ឋនៅស្រុកពារាំងទាំងមូលកំពុងតែមានការព្រួយបារម្ភជាខ្លាំង ចំពោះបញ្ហាសុខភាពរបស់ពួកគាត់នៅពេលទិញសាច់ជ្រូក និងគោក្របីពីផ្សារយកមកបរិភោគ ព្រោះសាច់សត្វទាំងនោះពុំបានឆ្លងកាត់ការព្រួតពិនិត្យពីមន្ត្រីជំនាញពេទ្យសត្វឡើយ ។
ចំណែកក្រុមអាជីវករអ្នកលក់សាច់ជ្រូក និងសាច់គោនៅក្នុងផ្សារកំពង់ពពិល ផ្សារព្រៃព្នៅ និងផ្សារស្នាយពលក៏បានលើកឡើងពីការព្រួយបារម្ភដូចគ្នាផងដែរ ដោយពួកគាត់បានអះអាងថា នៅពេលពួកគាត់យកជ្រូកទៅកាប់នៅក្នុងឡសត្តឃាត និងកាប់គោនៅតាមផ្ទះ គឺមិនដែលមានពេទ្យសត្វណាទៅត្រួតពិនិត្យឡើយ ហើយករណីនេះបានកើតមានច្រើនឆ្នាំមកហើយ ។
ប្រភពដដែលនេះបានបញ្ជាក់ថា ពេទ្យសត្វស្រុកពារាំងគេមិនចុះត្រួតពិនិត្យនោះទេ ប៉ុន្តែគេចុះមកយកលុយពីក្រុមអាជីវកររៀងរាល់ខែ ដោយអាជីវករលក់សាច់ជ្រូកម្នាក់ត្រូវបង់ឲ្យគេ៦ម៉ឺន៥ពាន់រៀល(រួមជាមួយខាងពន្ធដារ) និងអ្នកលក់សាច់គោត្រូវបង់១០ម៉ឺនរៀលក្នុង១ខែ ។ បន្ថែមលើនេះទៅទៀតអ្នកលក់សាច់ជ្រូកត្រូវបង់ឲ្យមន្ត្រីពេទ្យសត្វមួយតង់ទៀតតម្លៃ៣ម៉ឺនរៀលក្នុង១ខែ ជាថ្លៃមិនឲ្យពេទ្យសត្វយកសាច់ចន្លកទុកធ្វើជាសំណាកគំរូ ។
ដោយឡែកក្រុមអាជីវករកាប់ជ្រូកចំនួន៦នាក់នៅផ្សារកំពង់ពោធ៌ ក្នុងឃុំមេសរប្រចាន់ ស្រុកពារាំង ឯណោះវិញក៏បានលើកឡើងដែរថា មន្ត្រីពេទ្យសត្វមិនដែលចុះពិនិត្យនៅតាមឡសត្តឃាតទេ នៅពេលដែលពួកគាត់យកជ្រូក និងគោទៅកាប់ ប៉ុន្តែពួកគាត់ត្រូវយកលុយទៅបោះបង់ឲ្យមន្ត្រីពេទ្យសត្វស្រុកឈ្មោះ ផល្លា ឬរ៉ី ក្នុង១ខែ២ម៉ឺនរៀល និង១ឆ្នាំ៦០ម៉ឺនរៀលទៀតក្នុងម្នាក់ៗដោយពុំមានឯកសារ ឬវិក្កយបត្រអ្វីទេ តែបើមិនព្រមបង់នោះ និងមានបញ្ហា គេមិនឲ្យរកស៊ីបានស្រួលនោះទេ ។
ចំពោះបញ្ហានេះ លោក ចិន វិសាល ប្រធានការិយាល័យផលិតកម្ម និងបសុព្យាបាលខេត្តព្រៃវែង ធ្លាប់បានប្រាប់ក្រុមអ្នកព័ត៌មានកាលពី១ ខែមុនថា លោក និងចុះស្រាវជ្រាវរឿងចោទប្រកាន់មន្ត្រីពេទ្យសត្វមិនចុះធ្វើការនេះ ហើយបើរកឃើញថា ពិតជាដូចការលើកឡើងនេះមែន លោក និងចាត់វិធានការរដ្ឋបាលចំពោះមន្ត្រីពេទ្យសត្វស្រុកពារាំងនោះភ្លាម ។ ទោះជាលោក ចិន វិសាល បានអះអាងបែបនេះក្តី ប៉ុន្តែរហូតមកដល់បច្ចុប្បន្ននេះក្រុមអាជីវករនៅតែអះអាងថា មន្ត្រីពេទ្យសត្វស្រុកពារាំងខាងលើនៅតែមិនចុះពិនិត្យសាច់សត្វនៅតាមឡសត្តឃាត និងដើរប្រមូលលុយពីក្រុមអាជីវកររៀងរាល់ខែ ដោយមិនចេញវិក្កយបត្រដូចមុនដដែល ។
ដោយឡែកលោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បានឲ្យដឹងតាមទូរស័ព្ទ កាលពីព្រឹកថ្ងៃទី១៦ សីហាថា ព័ត៌មាននេះលោកមិនដែលបានដឹងនោះទេ ប៉ុន្តែលោក និងសួរនាំមើល ហើយបើមានដូចការលើកឡើងពិតមែន លោក និងចាត់វិធានការភ្លាម ៕
ចែករំលែកព័តមាននេះ