រាជធានីភ្នំពេញ៖តារាចម្រៀងកញ្ញាវ៉ាន់ នីឡា បានចូលខ្លួននៅសាលាឧទ្ធរណ៍តាមពាក្យបណ្តឹងទាស់ពីអតីតគូស្នេហ៍ នៅព្រឹកថ្ងៃទី១៥ ខែសីហា ២០១៨ បន្ទាប់ពីសាលាដំបូងសម្រេចឲ្យនាងឈ្នះក្តី ។ វ៉ាន់ នីឡា…
រាជធានីភ្នំពេញ៖តារាចម្រៀងកញ្ញាវ៉ាន់ នីឡា បានចូលខ្លួននៅសាលាឧទ្ធរណ៍តាមពាក្យបណ្តឹងទាស់ពីអតីតគូស្នេហ៍ នៅព្រឹកថ្ងៃទី១៥ ខែសីហា ២០១៨ បន្ទាប់ពីសាលាដំបូងសម្រេចឲ្យនាងឈ្នះក្តី ។
វ៉ាន់ នីឡា បានបង្ហាញខ្លួនតាមដីកាកោះហៅ ដោយមិនមានមេធាវីមកជាមួយឡើយ បន្ទាប់ពីនាងបានឈ្នះក្តីលើអតីតគូស្នេហ៍ដែលជាកូនមន្ត្រីថ្នាក់ធំឈ្មោះគុយ សិទ្ធសក្តិ ប៉ុន្តែភាគីចុងចោទបានប្តឹងទាស់ទៅសាលាឧទ្ធរណ៍ ។
លោកសុខ ជំនោរ ជាបងប្រុសវ៉ាន់ នីឡា ប្រាប់កោះសន្តិភាពថា រហូតមកដល់ពេលនេះមានរយៈពេលមួយឆ្នាំគត់ បន្ទាប់ពីសាលាដំបូងសម្រេចឲ្យប្អូនស្រីរបស់លោកឈ្នះក្តី ។ នីឡាចូលទៅសាលាឧទ្ធរណ៍ដោយមិនមានមេធាវីទៅជាមួយឡើយ តបតាមការកោះហៅពីព្រះរាជអាជ្ញាពាក់ព័ន្ធការប្តឹងទាស់ពីភាគីចុងបណ្តឹង ។ ដល់សាលាឧទ្ធរណ៍ នាងគ្មានមេធាវីទេ យើងរំសាយក្រុមការងាររបស់សមាគមមិត្តសិល្បៈហើយ ខណៈពេលដែលភាគីចុងចោទក៏មិនបានចូលខ្លួនមកដែរគឺមានតែតំណាងមេធាវីពីររូបដែលចូលមកប៉ុណ្ណោះ។
បើតាមលោកសុខ ជំនោរ បន្ទាប់ពីចូលខ្លួនតតាំងក្តីនៅសាលាឧទ្ធរណ៍ គឺនៅមិនទាន់មានលទ្ធផលយ៉ាងណាទេ ហើយក៏អត់ដឹងពេលណា គឺត្រូវរង់ចាំការកោះហៅប៉ុណ្ណោះ។ លោកបញ្ជាក់ថា «យើងរង់ចាំទៀតហើយ គេយកច្បាប់មកប្រឡែងដូចបាយឡុកបាយឡ តែខ្ញុំនៅតែសង្ឃឹមថាអ្នកកាន់ច្បាប់នៅខ្មែរ នៅតែមានអ្នកសុចរិត យុត្តិធម៌ ទោះភាគច្រើនគេនិយមខ្លាចខ្សែក៏ដោយ ។ គេអាចមានខ្សែធំនៅក្រសួងមហាផ្ទៃ ព្រោះឳពុក និងគ្រួសារគេ នៅមានធ្វើធំនៅទីនោះនៅឡើយ »។
តារាចម្រៀងវ៉ាន់ នីឡា បានបង្ហោះសារតាមអ៊ីនស្តាក្រាមរបស់នាងថា «ឥឡូវមិនមែនជាពេលត្រូវសើច ហើយក៏មិនមែនជាពេលត្រូវយំ រឹតតែមិនមែនជាពេលកើតទុក្ខ វាជាពេលវេលាដែលត្រូវដើរទៅមុខហើយតតាំង ។ រយៈពេលជិត២ឆ្នាំដែលខ្ញុំរស់នៅជាមួយការចងចាំដ៏អាក្រក់មួយ ខ្ញុំត្រូវតែក្លាហាន មិនភ័យខ្លាច មិនតក់ស្លុត។ មនុស្សអាក្រក់ មនុស្សខូចខិលតែងវាយកខ្លួនត្រូវ ហើយចុះខ្ញុំ ? រឿងអីដែលមិនចេះរើបម្រះ មនុស្សក្រីក្រឋានៈដូចខ្ញុំគ្មានអ្វីក្រៅពីពាក្យថារឹងមាំ» ។
អតីតគូស្នេហ៍របស់វ៉ាន់ នីឡា ដែលជាកូនមន្ត្រីថ្នាក់ខ្ពស់មួយរូបនៅក្រសួងមហាផ្ទៃ ត្រូវសាលាដំបូងរាជធានីភ្នំពេញចេញសាលដីកាផ្តន្ទាទោសដាក់ពន្ធនាគារ១ឆ្នាំ និងតម្រូវឲ្យសងជំងឺចិត្តទៅកាន់ភាគីដើមបណ្តឹង(វ៉ាន៉ នីឡា)ចំនួន២០០លានរៀលពីបទហិង្សាដោយចេតនា និងចែកចាយរូបភាពអាសអាភាសកាលពីចុងឆ្នាំ២០១៧ ។ បន្ទាប់ពីសាលក្រមប្រកាសរួច លោកគុយ សិទ្ធិសក្តិ នៅតែបន្តនៅក្រៅឃុំនៅឡើយ និងបានរៀបការទៀតផង ជាហេតុធ្វើឲ្យវ៉ាន់ នីឡា សម្តែងការខកចិត្ត។
វ៉ាន់ នីឡា ធ្លាប់បានបង្ហោះសារពាក់ព័ន្ធទៅនឹងបញ្ហានេះថា «ហ្នឹងហើយបងប្អូនទាំងអស់គ្នា មើលទៅណាប្រព័ន្ធច្បាប់តុលាការស្រុកខ្មែរ ខ្ញុំមិនទាន់ទទួលភាពយុត្តិធម៌ស្អីទេ កុំយល់ច្រឡំ ភាពយុត្តិធម៌សម្រាប់ខ្ញុំមានត្រឹមតែក្រដាសប្រកាសសាលក្រមក្លែងក្លាយដែលគ្មានប្រសិទ្ធភាពតែមួយសន្លឹកប៉ុណ្ណោះ ហើយក៏គ្មានខាងតុលាការមួយរូបណាអើពើនឹងរកដំណោះស្រាយឱ្យខ្ញុំចេញជារូបជារៀងទៅតាមសេចក្តីប្រកាសសាលក្រមនោះដែរ ។
ខ្ញុំសូមជម្រាបថា ខ្ញុំអត់បានឈឺចុកចាប់នឹងរឿងដែលមនុស្សហ្នឹងរៀបការទេ តែខ្ញុំឈឺដែលមនុស្សត្រូវជាប់ទោស បែរជារួចខ្លួនសប្បាយរីករាយក្អាកក្អាយ មិនតែប៉ុណ្ណោះថែមទាំងប្រកាស ក្តែងៗរៀបការទាំងមិនទាន់ចេញមុខដោះស្រាយរឿងក្តីចប់សព្វគ្រប់»៕
ចែករំលែកព័តមាននេះ