ខេត្តសៀមរាប ៖ កម្លាំងនគរបាលនៃការិយាល័យព្រហ្មទ័ណ្ឌកំរិតស្រាល បានសហការជាមួយកម្លាំងអង្គភាពនគរបាលទេសចរណ៍ បានធ្វើការបង្ក្រាបករណីចោរឆក់កាបូបភ្ញៀវបរទេសមិនបានសម្រេច ហើយត្រូវសមត្ថកិច្ចឃាត់ខ្លួនបានជនសង្ស័យម្នាក់ភ្លាមៗ បង្កឱ្យមានការភ្ញាក់ផ្អើលកើតឡើងកាលពីវេលាម៉ោង៨និង៣០នាទីយប់ថ្ងៃទី១៥ ខែសីហា ឆ្នាំ២០១៨ ស្ថិតនៅម្តុំមុខផ្សារចៅសាំងហុក ក្នុងភូមិសាស្ត្រ សង្កាត់ស្វាយដង្គំ ក្រុងសៀមរាប។
ជនសង្ស័យម្នាក់ដែលសមត្ថកិច្ចចាប់បានឈ្មោះ ធុន ហុង ភេទប្រុស អាយុ១៨ឆ្នាំ មុខរបរមិនពិតប្រាកដ មានទីកន្លែងកំណើតខណ្ឌជ្រោយចង្វា រាជធានីភ្នំពេញ មកនៅសៀមរាប ស្នាក់នៅបន្ទប់ជួល ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប ចំណែកជនរងគ្រោះឈ្មោះ សារ៉ូស ខាន់ (SHAHROZE KHAN) អាយុ២៣ឆ្នាំ សញ្ជាតិប៉ាគីស្ថាន កាន់លិខិតឆ្លងដែនលេខ MD៤១២៤២៥១ បានរងរបួសជើង និងស្មា។
តាមប្រភពពីសមត្ថកិច្ចជំនាញខេត្តបានឱ្យប្រាប់ដឹងថា ជនសង្ស័យ២នាក់បានបើកម៉ូតូមួយគ្រឿងម៉ាកឃ្លិច ស៊េរីឆ្នាំ២០១៥ ពណ៌ឈាមជ្រូក បានធ្វើសកម្មភាពជិះម៉ូតូឆក់កាបូបដៃរបស់ជនបរទេសខាងលើ ខណៈកំពុងដើរម្នាក់ឯងតាមផ្លូវ បណ្តាលឱ្យបុរសដែលជាជនបរទេសរងបួសជើង និងស្មា ។ បន្ទាប់ពីក្រុមជនសង្ស័យបានធ្វើសកម្មភាពឆក់កាបូបបានភ្លាម ក៏ត្រូវកម្លាំងនគរបាលដែលកំពុងល្បាតនៅជិតនោះប្រទះឃើញបានដេញតាមប្រមាញ់ចាប់បានជនសង្ស័យម្នាក់ដែលជាអ្នកជិះពីក្រោយ និងជាអ្នកធ្វើសកម្មភាពឆក់ផងដែរ ចំណែកជនសង្ស័យម្នាក់ទៀតជាអ្នកបើកម៉ូតូបានជិះម៉ូតូគេចខ្លួនបាត់ ។
ចំពោះសម្ភារៈ និងកាបូបដៃរបស់ជនរងគ្រោះ ត្រូវកម្លាំងសមត្ថកិច្ចយកបានមកវិញទាំងអស់ ។ ក្រោយការសាកសួររបស់សមត្ថកិច្ចជំនាញ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពឆក់កាបូបពីជនបរទេសខាងលើពិតប្រាកដមែន។
បច្ចុប្បន្នជនសង្ស័យម្នាក់ខាងលើត្រូវបានកម្លាំងសមត្ថកិច្ចជំនាញកំពុងកសាងសំណុំរឿង និងបញ្ជូនទៅតាមនីតិវិធីច្បាប់បន្ត ។ រីឯរបស់របរនិងសម្ភារនៅក្នុងកាបូប កម្លាំងសមត្ថកិច្ចបានប្រគល់ជូនម្ចាស់វិញអស់ហើយដែរ៕
ចែករំលែកព័តមាននេះ