តាមប្រភពព័ត៌មាន Sky Sports បានឲ្យដឹងថា ខ្សែបម្រើរបស់ក្លិបមេឃខៀវបានរងរបួសជង្គង់កំឡុងពេលហ្វឹកហាត់កាលពីព្រឹកថ្ងៃពុធដែលអាចធ្វើឲ្យរូបគេបាត់មុខពីការប្រកួតពីចន្លោះ២ទៅ៤ខែ ។
ប្រភពមកពីក្លិបមេឃខៀវ Man City ប្រាប់ថា របួសរបស់កីឡាករ Kevin De Bruyne គឺជាការរមួលជង្គង់ដែលកើតឡើងពេលហ្វឹកហាត់កាលពីព្រឹកថ្ងៃពុធ ។ ខណៈនេះកីឡាករវ័យ២៧ឆ្នាំ កំពុងតែទទួលការធ្វើតេស្តដើម្បីរកមើលសេចក្តីលម្អិតស្តីពីមុខរបួស ។
សារបញ្ចេញពី Man City បានសរសេរថា ៖«Kevin De Bruyne កំពុងតែទទួលការពិនិត្យទៅលើជង្គង់ខាងស្តាំរបស់គេក្រោយរងរបួសនៅពេលហ្វឹកហាត់កាលពីថ្ងៃពុធ ។ បញ្ហាតទៅទៀតនៅមិនទាន់ដឹងច្បាស់នៅឡើយទេ តែពួកយើងនឹង Update ពីស្ថានភាពរបស់គេនៅពេលក្រោយ» ។
គួរបញ្ជាក់ផងដែរថា De Bruyne បានមកលេងឲ្យ Man City វិញ កាលពីសប្តាហ៍មុនក្រោយការពីភារកិច្ចនៅ World Cup ជាមួយនឹងមិត្តរួមក្រុមជម្រើសជាតិប៊ែលហ្ស៊ិក ។ កាលពីរដូវកាល 2016-2017 កីឡាកររូបនេះក៏ធ្លាប់របួសជង្គង់ផងដែរ ពេលប្រកួតជាមួយនឹង Everton ។ របួសម្តងនេះ គេអាចនឹងបាត់មុខពីតារាងនៅក្នុងការប្រកួតជាមួយនឹង Huddersfield, Wolves, Newcastle និង Fulham ៕
ចែករំលែកព័តមាននេះ