រាជធានីភ្នំពេញ ៖ បុរសជាកូនថៅកែកាប់ជ្រូកម្នាក់ រួមទាំងបក្សពួក២នាក់ទៀត ត្រូវបានកម្លាំងនគរបាលខណ្ឌប្ញស្សីកែវ សហការជាមួយនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញឃាត់ខ្លួន នៅព្រឹកថ្ងៃទី១៥ សីហា បន្ទាប់ពីជិះរថយន្តម៉ាកឡិចស៊ីសលេខ៥៧០ ពាក់ផ្លាកលេខរដ្ឋមួយគ្រឿង…
រាជធានីភ្នំពេញ ៖ បុរសជាកូនថៅកែកាប់ជ្រូកម្នាក់ រួមទាំងបក្សពួក២នាក់ទៀត ត្រូវបានកម្លាំងនគរបាលខណ្ឌប្ញស្សីកែវ សហការជាមួយនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញឃាត់ខ្លួន នៅព្រឹកថ្ងៃទី១៥ សីហា បន្ទាប់ពីជិះរថយន្តម៉ាកឡិចស៊ីសលេខ៥៧០ ពាក់ផ្លាកលេខរដ្ឋមួយគ្រឿង ហក់ឡើងសួនច្បារទៅបុកបង្គោលភ្លើងបំភ្លឺផ្លូវមួយដើមបាក់រាបដល់ដី នៅវេលាម៉ោងជាង២ទៀបភ្លឺ ហើយនាំបក្សពួកទៅស្ទាក់ភ្ជង់ដោយកាំភ្លើងខ្លីយករថយន្ត ដែលប៉ូលិសស្ទូចដឹកទៅរក្សាទុកនៅការិយាល័យចរាចរណ៍នៃស្នងការដ្ឋានរាជធានី ទៅទុកផ្ទះរបស់ខ្លួនវិញ ។
ហេតុការណ៍រថយន្តបុកបាក់បង្គោលភ្លើងនេះ បានកើតឡើងកាលពីវេលាម៉ោង២ និង១៥នាទីរំលងអធ្រាត្រ ឈានចូលថ្ងៃទី១៥ សីហា តាមបណ្តោយផ្លូវជាតិលេខ៥ នៅចំណុចមុខវិទ្យាល័យឫស្សីកែវ ស្ថិតនៅក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។
ជនដែលត្រូវឃាត់ខ្លួនមាន ៖
១-ឈ្មោះ ទ្រី ដារិន ហៅហ៊ាពៅ ភេទប្រុស អាយុ៣៨ឆ្នាំ ជាថៅកែកាប់ជ្រូក និងជាម្ចាស់រថយន្តឡិចស៊ីស៥៧០ ពណ៌ស ពាក់ផ្លាកលេខរដ្ឋ០៧ ២.៨៩៨៩ ដែលបង្កគ្រោះថ្នាក់បុកបង្គោលភ្លើង ។
២-ឈ្មោះ ស្រ៊ុន ពិសិដ្ឋ ភេទប្រុស អាយុ៣២ឆ្នាំ ជាអ្នកបើកបររថយន្តដឹកជ្រូក ។
៣-ឈ្មោះ អ៊ុល ផានិត ភេទប្រុស អាយុ២៥ឆ្នាំ ជាកម្មករសំណង់ ។
បន្ទាប់ពីឃាត់ខ្លួនហើយ នគរបាលក៏បានដកហូតកាំភ្លើងម៉ាកប៉េអាតាមួយដើម ដែលជននេះលាក់ទុកក្នុងបន្ទប់ទឹកជាន់ទី២ នៅការដ្ឋានសំណង់សង់ថ្មីនៅភូមិខ១ សង្កាត់ច្រាំងចំរេះទី២ ខណ្ឌប្ញស្សីកែវ ព្រមទាំងដកហូតបានវត្ថុតាងរថយន្តដែលបង្កហេតុបុកបង្គោលភ្លើងនោះមកវិញ ។
តាមនគរបាលបានឱ្យដឹងថា នៅវេលាយប់ថ្ងៃកើតហេតុ កូនថៅកែកាប់ជ្រូកម្នាក់នេះ បានបើករថយន្តមួយគ្រឿងម៉ាកឡិចស៊ីស ពាក់ផ្លាកលេខរដ្ឋខាងលើ ធ្វើដំណើរតាមបណ្តោយផ្លូវជាតិលេខ៥ ក្នុងទិសដៅពីត្បូងទៅជើង ។ ខណៈពេលបើកមកដល់ចំណុចកើតហេតុ ក៏បានជ្រុលចង្កូតទៅបុកក្បាលសួនច្បារនិងជ្រុលទៅបុកបង្គោលភ្លើងបំភ្លឺផ្លូវបាក់រាបដល់ដី ។
តាមព័ត៌មានឱ្យដឹងថា បន្ទាប់ពីគ្រោះថ្នាក់អ្នកបើកបរបានគេចបាត់ ហើយនគរបាលមូលដ្ឋាន ក៏បានហៅនគរបាលការិយាល័យចរាចរណ៍ផ្លូវគោក ចុះទៅវាស់វែងស្ទូចយករថយន្តទំនើបនេះ ទៅដាក់នៅការិយាល័យចរាចរណ៍ ដើម្បីដោះស្រាយសំណងការខូចខាតសម្បត្តិសាធារណៈ ។ នៅពេលដែលរថយន្តស្ទូចបានដឹករថយន្តនេះទៅដល់មុខវត្តទួលសន្តិវ័ន ហៅវត្តទួលអស់លោក ស្រាប់តែជនជាម្ចាស់រថយន្ត រួមទាំងកូនចៅដែលជាអ្នកបើកបររថយន្តដឹកជ្រូក បានបើករថយន្តម៉ាកកូរ៉ូឡា ពណ៌ទឹកប៊ិចមួយគ្រឿង ពាក់ផ្លាកលេខកណ្តាល២A-១២៤៦មួយគ្រឿងទៅកាក់ឡានស្ទូចឱ្យឈប់ ហើយធ្វើសកម្មភាពភ្ជង់អ្នកបើករថយន្តស្ទូច ឱ្យយករថយន្តរបស់ខ្លួនយកទៅដាក់ផ្ទះខ្លួនវិញ ។
តាមនគរបាលឱ្យដឹងទៀតថា បន្ទាប់ពីមានករណីភ្ជង់យកវត្ថុតាង នគរបាលការិយាល័យចរាចរណ៍ ក៏បានចុះទៅដល់កន្លែងកើតហេតុរាយការណ៍ទៅនគរបាលខណ្ឌឫស្សីកែវ និងរាយការណ៍ទៅព្រះរាជអាជ្ញារងលោក សៀង សុខ ចុះទៅឡោមព័ទ្ធឆែកឆេរដកហូត រថយន្តព្រមទាំងឃាត់ខ្លួនជនសង្ស័យ៣នាក់នៅវេលាព្រឹកថ្ងៃដដែល ។
អ្វីដែលគួរឱ្យអាម៉ាស់នោះ គឺរថយន្តស៊េរីទំនើបមួយគ្រឿងរបស់ថៅកែកាប់ជ្រូកនេះ បានបំពាក់ផ្លាកលេខរដ្ឋដោយខុសច្បាប់ ។ មតិខ្លះថា រថយន្តដែលបានបំពាក់ផ្លាកលេខរដ្ឋនេះ គឺជារថយន្តរបស់រដ្ឋ មិនមែនរបស់ថៅកែកាប់ជ្រូកនេះទេ ហើយបើសិនជាយកមកពាក់លើរថយន្តជាកម្មសិទ្ធិរបស់ខ្លួន គឺខុសច្បាប់ហើយ និងអាម៉ាស់ដល់ស្ថាប័នរដ្ឋថែមទៀតផង និងកុំឆ្លើយថា លេខសេះហោះឱ្យសោះ ព្រោះថាផ្លាកលេខសេះហោះ គឺប៉ូលិសចរាចរណ៍ស្គាល់ច្បាស់ណាស់ ។
អ្នកខ្លះនិយាយថា ប្រសិនបើរថយន្តនេះមិនមានបញ្ហាបុកបង្គោលភ្លើង ហើយម្ចាស់ថ្លើមធំមិនបានប្រើកាំភ្លើងភ្ជង់គេឯង ម្លេ៉ះសមរថយន្តថៅកែកាប់ជ្រូកនេះ នៅតែប្រើផ្លាកលេខរដ្ឋបែបនេះរំភើយ រហូតហើយមើលទៅ ។ តាមប្រភពព័ត៌មានបានបង្ហើបឱ្យដឹងថា ទ្រីដារិន នេះក៏ជាអតីតកងរាជអាវុធហត្ថខេត្តបន្ទាយមានជ័យដែរ ចំណែករថយន្តនិងកាំភ្លើងគឺអត់ពន្ធនិងច្បាប់ ។ ជនទាំង៣នាក់និងត្រូវនាំខ្លួនឡើងតុលាការថ្ងៃនេះ ៕
https://www.youtube.com/watch?v=HBaAKgVetAc
ចែករំលែកព័តមាននេះ