ក្រុមឧតុនិយមថៃ បានប្រកាសអាសន្នពីស្ថានភាពទឹកជំនន់នៅភាគខាងត្បូងកំពុងទទួលសម្ពាធអាកាសធាតុទាបគ្របដណ្តប់នៅបរិវេណភាគខាងត្បូងផ្នែកកណ្តាល ធ្វើឱ្យតំបន់ភាគខាងត្បូងមានភ្លៀងធ្លាក់នៅក្នុងតំបន់ជាច្រើន។ ប្រជាជនប្រុងប្រយ័ត្នគ្រោះថ្នាក់ទឹកជំនន់ និងទឹកហូរធ្លាក់ពីទីខ្ពស់ ជាពិសេសនៅក្នុងខេត្តឈុមផន រ៉ាណង ផាងង៉ា ភូកេត ស៊ូរ៉ាតថានី ណាក់ខនស៊ីថាម៉ារាជ ប៉ាតាលុង ក្រាប៊ី ត្រាំង និងខេត្តស្ទូល។ សម្រាប់រលកទឹកសមុទ្រក្នុងឈូងសមុទ្រថៃមានកំពស់ពី២-៣ម៉ែត្រ អ្នកនេសាទត្រូវមានការប្រុងប្រយ័ត្នបំផុតក្នុងការដើរសមុទ្រ។
ស្របពេលជាមួយគ្នានេះ យោងតាមប្រភពពីខេត្តណាក់ខនស៊ីថាម៉ារាជ បានបញ្ជាក់ថា ស្ថានភាពទឹកជំនន់នាពេលបច្ចុប្បន្នមានសភាពខ្លាំងក្លា ដោយជើងហោះហើរនានាត្រូវបានផ្អាក ព្រោះទឹកបានលិចចូលទៅក្នុងទីលានអាកាសយានដ្ឋាន។
ប្រភពខាងលើបន្តថា ស្ថានការណ៍ទឹកជំនន់នៅក្នុងខេត្តណាក់ខនស៊ីថាម៉ារាជនៅជន់លិចក្នុងស្រុកជាច្រើន ធ្វើឱ្យប៉ះពាល់ដល់ការធ្វើចរាចរណ៍យ៉ាងធ្ងន់ធ្ងរដល់ប្រជាជន។
កាលពីព្រឹកថ្ងៃទី២៨ មីនា កន្លងមក អាកាសយានដ្ឋានក្នុងខេត្តណាក់ខនស៊ីថាម៉ារាជ បានប្រកាសលុបចោលជើងហោះហើរគ្រប់ទិសទី ព្រោះសភាពផ្លូវយន្តហោះត្រូវទឹកជំនន់ជន់លិច។
គួរបញ្ជាក់ថា ស្ថានភាពអាកាសធាតុ និងគ្រោះធម្មជាតិនាពេលបច្ចុប្បន្នកំពុងបង្កឡើងឥតឈប់ឈរ ខណៈពេលកាលពីថ្ងៃទី១១ មីនា កន្លងមក មានគ្រោះរញ្ជួយដី និងរលកយក្សស៊ូណាមីនៅប្រទេសជប៉ុន បង្កឱ្យមានការខូចខាតដល់លំនៅឋានរបស់ប្រជាពលរដ្ឋជាច្រើនខ្នង និងប្រជាជនជាច្រើននាក់បានស្លាប់ និងរងរបួស។ លើសពីនេះទៀតកាលពីថ្ងៃទី២៥ មីនា កន្លងទៅក៏កើតមានរញ្ជួយដីនៅប្រទេសភូមា និងមានសភាពប៉ះពាល់ដល់ប្រទេសជាច្រើននៅជុំវិញដូចជាប្រទេសថៃ វៀតណាម ឡាវ និងប្រទេសចិន។
ជាក់ស្តែងនៅក្នុងអំឡុងពេលថ្មីៗនេះក៏មានកើតគ្រោះធម្មជាតិទឹកជំនន់ជន់លិចនៅតំបន់ភាគខាងត្បូងប្រទេសថៃ ដែលជាតំបន់មួយបច្ចុប្បន្នកំពុងទទួលរងការធ្វើឃាតពីសំណាក់ក្រុមជ្រុលនិយមនៅភាគខាងត្បូងបង្កឱ្យមនុស្សជាច្រើននាក់បានស្លាប់។
ទោះជាបែបណាក៏ដោយ ស្ថានភាពនៃគ្រោះធម្មជាតិនៅក្នុងប្រទេសនីមួយៗរមែងកើតឡើងដោយគ្មានអ្នកណាម្នាក់ដឹងទុកជាមុន ដោយប្រការនេះរមែងធ្វើឱ្យប្រជាជននៅទូទាំងពិភពលោកមានក្តីបារម្ភ៕
ចែករំលែកព័តមាននេះ