រាជធានីភ្នំពេញ ៖ នារីរូបស្រស់២នាក់ដែលគេសង្ស័យថាស្រវឹង បានជិះម៉ូតូមួយគ្រឿងឌុបគ្នាក្នុងល្បឿនយ៉ាងលឿនចុះពីលើស្ពានអាកាសស្ទឹងមានជ័យកាច់ចង្កូតមិនទាន់ក៏ជ្រុលបុកខឿនចិញ្ចើមផ្លូវ បណ្តាលឱ្យរងរបួសបាក់ជើងឆ្វេងទាំង២នាក់ ហើយត្រូវបានរថយន្តសង្គ្រោះដឹកទៅព្យាបាលមន្ទីរពេទ្យភ្លាមៗផងដែរ ។ ហេតុការណ៍នេះបានកើតឡើងកាលពីវេលាម៉ោង២និង៣០នាទីរំលងអាធ្រាត្រឈានចូលថ្ងៃទី១៦ ខែសីហា ឆ្នាំ២០១៨ នៅចំណុចគល់ស្ពានអាកាសស្ទឹងមានជ័យត្រើយខាងជើង ផ្លូវ២៧១ សង្កាត់បឹងសាឡាង ខណ្ឌទួលគោក ។
តាមសាក្សីនៅកន្លែងកើតហេតុបានឱ្យដឹងថា មុនពេលកើតហេតុ គេបានឃើញនារីក្មេង២នាក់ ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ ១CF-២៥៦៩ ធ្វើដំណើរចុះពីលើស្ពានអាកាសស្ទឹងមានជ័យក្នុងទិសដៅពីត្បូងទៅជើងឆ្ពោះទៅផ្លូវលេខ២៧១ ក្នុងល្បឿនយ៉ាងលឿន លុះមកដល់ចំណុចកើតហេតុ ដោយសារតែផ្លូវរាងកោង ហើយសង្ស័យអ្នកបើកបរម៉ូតូស្រវឹងផងនោះ ទើបកាច់ចង្កូតមិនទាន់ក៏ជ្រុលទៅបុកខឿនចិញ្ចើមផ្លូវ ក្រោមស្ពានអាកាសស្ទឹងមានជ័យ បណ្តាលឱ្យដួលម៉ូតូអូសជិត២០ម៉ែត្រ ធ្វើឱ្យនារីវ័យក្មេងទាំងពីរនាក់នោះរងរបួសបែកមុខ បែកមាត់ និងបាក់ជើងខាងឆ្វេងទាំង២នាក់តែម្តង។ ភ្លាមៗនោះដែរ នារីជនរងគ្រោះទាំង២នាក់ត្រូវប្រជាពលរដ្ឋដែលឃើញហេតុការណ៍ជួយហៅរថយន្តសង្គ្រោះឱ្យមកដឹកជនរងគ្រោះយកទៅព្យាបាលនៅគ្លីនិកឯកជន ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅកន្លែងកើតហេតុ រួចហើយបានយកម៉ូតូរបស់នារីជនរងគ្រោះដែលរងការខូចខាតបន្តិចបន្តួចយកទៅរក្សាទុកនៅប៉ុស្តិ៍នគរបាលបឹងសាឡាង រង់ចាំបងប្អូនមកទទួលយកវិញ៕
ចែករំលែកព័តមាននេះ