រាជធានីភ្នំពេញ ៖ កម្លាំងនគរបាលខណ្ឌដង្កោដឹកនាំដោយលោកវរសេនីយ៍ឯកជឹម ស៊ីថា អធិការនគរបាលខណ្ឌ បានចុះបង្ក្រាបការជួញដូរគ្រឿងញៀនមួយកន្លែង ដោយឃាត់ខ្លួនជនសង្ស័យដែលជាអ្នកជួញដូរ និងអ្នកប្រើប្រាស់ ព្រមទាំងអ្នកផ្តល់ទីតាំងសម្រាប់ការជួញដូរ និងប្រើប្រាស់ដោយខុសច្បាប់នូវសារធាតុញៀនចំនួន៧នាក់ ហើយដកហូតបានកាំបិត ដាវ កន្ត្រៃ និងថ្នាំញៀនមួយចំនួនផងដែរ។
ការចុះបង្ក្រាបនេះបានធ្វើឡើងកាលវេលាម៉ោង១១និង៣០នាទីព្រឹកថ្ងៃទី១៤ ខែសីហា ឆ្នាំ២០១៨ នៅចំណុចបន្ទប់ជួលមួយកន្លែងដែលមានទីតាំងស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
នគរបាលបានឱ្យដឹងថា ជនសង្ស័យទាំង៧នាក់ខាងលើនោះ រួមមាន ១-ឈ្មោះ ស ឌីណា ភេទប្រុស អាយុ៣៣ឆ្នាំ ២-ឈ្មោះ រឿង សុខសុវណ្ណ ភេទប្រុស អាយុ៣៦ឆ្នាំ ៣-ឈ្មោះ ប៊ុន វណ្ណៈ ភេទប្រុស អាយុ៣២ឆ្នាំ ៤-ឈ្មោះ ស ដារ៉ា ភេទប្រុស អាយុ៣៦ឆ្នាំ ៥-ឈ្មោះ ចាន់ ដារ៉ារិទ្ធ ភេទប្រុស អាយុ២៣ឆ្នាំ ៦-ឈ្មោះ កៅ វណ្ណៈ ភេទប្រុស អាយុ២៦ឆ្នាំ និង៧-ឈ្មោះ សាន់ បូរិទ្ធ ភេទប្រុស អាយុ២៩ឆ្នាំ ។ ជនសង្ស័យទាំង៧នាក់នេះស្នាក់នៅក្នុងភូមិម័ល សង្កាត់ដង្កោ ខណ្ឌដង្កោ។
ដោយឡែកវត្ថុតាងដែលកម្លាំងសមត្ថកិច្ចដកហូតបានរួមមាន ថ្នាំញៀនប្រភេទម្សៅក្រាមពណ៌សថ្លា១កញ្ចប់ សម្ភារសម្រាប់ជក់គ្រឿងញៀនមួយចំនួន ដាវកែច្នៃប្រវែង៥៧សង់ទីម៉ែត្រចំនួន១ដើម កូនកាំបិតចិតបន្លែ១ដើម កាំបិតស្នៀតប្រវែង២៣សង់ទីម៉ែត្រចំនួន១ដើម និងកន្ត្រៃដងក្រហម១ដើម ។
ប្រភពដដែលបានបន្តថា នៅមុនពេលចុះបង្ក្រាប កម្លាំងនគរបាលខណ្ឌបានធ្វើការស្រាវជ្រាវរកមុខសញ្ញាបទល្មើសផ្សេងៗនៅក្នុងមូលដ្ឋាន និងបានទទួលព័ត៌មានពីប្រជាពលរដ្ឋថា មានជនសង្ស័យ១ក្រុមកំពុងជួញដូរ និងប្រើប្រាស់គ្រឿងញៀន ពេលនោះលោកវរសេនីយ៍ឯកជឹម ស៊ីថា អធិការនគរបាលខណ្ឌ បានដឹកនាំកម្លាំងចុះទៅបង្ក្រាប និងចាប់ខ្លួនបានជនសង្ស័យចំនួន៧នាក់ដើម្បីយកទៅធ្វើការសាកសួរនាំនៅអធិការដ្ឋានខណ្ឌដង្កោ និងកសាងសំណុំរឿងចាត់ការតាមច្បាប់៕
ចែករំលែកព័តមាននេះ