ប្រទេសស៊ុយអែត ៖ បើតាមអាជ្ញាធរបានរាយការណ៍នាថ្ងៃទី១៤ សីហានេះថា រថយន្តដល់ទៅជិត៨០គ្រឿងរងការដុតបំផ្លាញ កាលពីយប់ថ្ងៃទី១៣ មកទី១៤ សីហា នៅភាគខាងលិចប្រទេសស៊ុយអែត រួចមនុស្ស២នាក់ត្រូវចាប់ខ្លួនសង្ស័យចូលរួមក្នុងការវាយប្រហារ…
ប្រទេសស៊ុយអែត ៖ បើតាមអាជ្ញាធរបានរាយការណ៍នាថ្ងៃទី១៤ សីហានេះថា រថយន្តដល់ទៅជិត៨០គ្រឿងរងការដុតបំផ្លាញ កាលពីយប់ថ្ងៃទី១៣ មកទី១៤ សីហា នៅភាគខាងលិចប្រទេសស៊ុយអែត រួចមនុស្ស២នាក់ត្រូវចាប់ខ្លួនសង្ស័យចូលរួមក្នុងការវាយប្រហារ ខណៈសល់ពេលជិត១ខែទៀតដល់ការបោះឆ្នោះសភា។
យោងតាមប៉ូលិសបានឱ្យដឹងថា រឿងនោះកើតមានកាលពីយប់ថ្ងៃទី១៣ សីហា នៅទីក្រុង GOTEBORG ជាទីក្រុងធំទី២ របស់ស៊ុយអែត នៅ២០កន្លែងផ្សេងៗគ្នា។ មនុស្ស២នាក់ម្នាក់មានអាយុ១៦ឆ្នាំ ហើយម្នាក់ទៀតអាយុ២១ឆ្នាំ ត្រូវចាប់ខ្លួននាព្រឹកថ្ងៃទី១៤ សីហា។ ហើយពុំមានសេចក្ដីរាយការណ៍ពីជនរងគ្រោះឡើយ។ ចំណែកអ្នកនាំពាក្យប៉ូលិសម្នាក់និយាយថា យើងពុំដែលជួបប្រទះនឹងការដុតបំផ្លាញរថយន្តច្រើនបែបនេះឡើយ។
ឧប្បត្តិហេតុនោះនាំឲ្យមានប្រតិកម្មយ៉ាងខ្លាំងពីសំណាក់ពួកអ្នកនយោបាយដែលកំពុងធ្វើការឃោសនាបោះឆ្នោតសភានាថ្ងៃទី៩ កញ្ញា ខាងមុខនេះ។ ហើយនាយករដ្ឋមន្ត្រីស៊ុយអែតលោក STEFAN LOFVEN ជាបេក្ខជនសម្រាប់បន្តតំណែងនោះមានប្រតិកម្មថា ខ្ញុំពិតជាខឹងខ្លាំងណាស់ ខ្ញុំសួរថា តើហេតុអីបានជាពួកអ្នកធ្វើបែបនេះ? ពួកអ្នកកំពុងបំផ្លាញវាសនាខ្លួនឯងផ្ទាល់ឪពុកម្ដាយខ្លួនឯង និងសង្កាត់ខ្លួនឯង។ លោកបញ្ជាក់ថាសកម្មភាពទាំងនេះហាក់ធ្វើដោយមានការសម្របសម្រួលគ្នាដូចក្នុងប្រតិបត្តិការយោធាមួយដូច្នោះដែរ។
រៀងរាល់ថ្ងៃនៅតាមបណ្ដាតំបន់ជាយក្រុងស្តុកខូល បណ្ដារថយន្តរងការដុតបំផ្លាញ ដោយអំពើទាំងនេះគេថា ជាស្នាដៃពួកយុវជនក្រីក្រ។ ហើយកាលពីឆ្នាំ២០១៧ រថយន្ត១.៤៥៧គ្រឿងត្រូវដុតបំផ្លាញនៅស៊ុយអែត ទល់នឹង១.៦៤១គ្រឿង ក្នុងឆ្នាំ២០១៦៕ វីដេអូដកស្រង់ចេញពី ៖ Daily Mail
ចែករំលែកព័តមាននេះ