CNN ផ្សាយថា លោកប្រធានាធិបតីRodrigo Duterte របស់ហ្វ៊ីលីពីន កាលពីពេល ថ្មីៗកន្លងមកបានពិនិត្យមើលពីការកិនបំផ្លាញរថយន្ត និងម៉ូតូស៊េរីទំនើបមានតម្លៃសរុបជាង៥,៥លានដុល្លារ និងជាផ្នែកមួយនៃបទដ្ឋានប្រឆាំងនឹងអំពើពុករលួយនៅក្នុងប្រទេស ។
រដ្ឋាភិបាលហ្វ៊ីលីពីនបានបង្ហាញវីដេអូឃ្លីបមួយរបស់លោកប្រធានាធិបតីឌូតឺតេ ក្នុងពេលធ្វើដំណើរទៅពិនិត្យការកិនបំផ្លាញរថយន្តដែលនាំចូលខុសច្បាប់ ។ នៅក្នុងឃ្លីបបង្ហាញត្រាក់ទ័របើកកិនពីលើរថយន្ត និងម៉ូតូនាំចូលខុសច្បាប់ចំនួន៧៦គ្រឿង ក្នុងនោះមានរថយន្តLamborghini , Mercedes-Benz និងPorsche ។
នៅក្នុងសេចក្ដីថ្លែងការណ៍មួយដែលបង្ហាញដោយរដ្ឋាភិបាលបានបញ្ជាក់ថារថយន្ត និងម៉ូតូដែលបានបំផ្លាញកាលពីថ្ងៃទី៣០ កក្កដា គឺជាផ្នែកមួយនៃរថយន្តចំនួន៨០០គ្រឿងដែលនាំចូលហ្វ៊ីលីពីនដោយខុសច្បាប់ ។ មិនមែនជាលើកដំបូងទេដែលលោកឌូតឺតេធ្វើជាសាក្សីក្នុងការបំផ្លាញរថយន្តទំនើបទាំងនេះ កាលពីខែកុម្ភៈកន្លងមកលោកក៏បានបញ្ជាឲ្យកម្ទេចរថយន្តចំនួន៣០គ្រឿងដែរ ។
ចាប់តាំងពីជាប់ឆ្នោតនៅឆ្នាំ២០១៦កន្លងមក លោកឌូតឺតេ បានប្រកាន់ភ្ជាប់លើការប្រឆាំងនឹងអំពើពុករលួយ និងជាអំណះអំណាងយ៉ាងយុត្តិធម៌ដល់ការបង្ក្រាបការជួញដូរគ្រឿងញៀនរបស់ប្រទេស ខណៈពេលមុននេះលោកធ្លាប់ប្រកាសថាសុខចិត្តចុះចេញពីតំណែងប្រសិនបើបរាជ័យក្នុងការលុបបំបាត់អំពើពុករលួយ ៕
ចែករំលែកព័តមាននេះ