ខេត្តបន្ទាយមានជ័យ ៖ មន្ត្រីនាយកដ្ឋានកាំងកុងត្រូលបានចុះពិនិត្យស្ថានីយប្រេងឥន្ធនៈចំនួន១០កន្លែង រកឃើញស្ថានីយមួយចំនួនរង្វាស់បរិមាណ១០០លីត្រ ខ្វះប្រមាណពី៦ទៅ៨លីត្រ ជំហ៊ានដំបូងគ្រាន់តែណែនាំ បើមានលើកទី២ ឬ៣ និងចាត់ការតាមច្បាប់ ដែលធ្វើការពិនិត្យនៅព្រឹកថ្ងៃទី១៥ ខែសីហា ឆ្នាំ២០១៨ នៅក្រុងសិរីសោភ័ណ ខេត្តបន្ទាយមានជ័យ ។
លោក មាន ចំណាប់ អនុប្រធាននាយកដ្ឋានកិច្ចការការពារអ្នកប្រើប្រាស់ និងបង្ក្រាបការក្លែងបន្លំនៃនាយកដ្ឋានកាំកុងត្រូលបានប្រាប់ថា ដោយមានការណែនាំពីរដ្ឋមន្ត្រីក្រសួងពាណិជ្ជកម្ម និងនាយកដ្ឋានកាំកុងត្រូលបានសហការជាមួយមន្ត្រីសាខាកាំកុងត្រូលខេត្ត រួមមន្ត្រីមន្ទីពាណិជ្ជកម្មខេត្តបន្ទាយមានជ័យជាង១០រូបបានធ្វើការពិនិត្យស្ថានីយប្រេងឥន្ធនៈនៅខេត្តបន្ទាយមានជ័យ ។
លោកបានបញ្ជាក់ថា នៅពេលចុះពិនិត្យរយៈពេលកន្លះថ្ងៃបានចំនួន១០ស្ថានីយប្រេងឥន្ធនៈនៅក្នុងក្រុងសិរិសោភ័ណ ការចុះពិនិត្យនេះជាជំហ៊ានដំបូង គឺពិនិត្យមើលកម្រិតរង្វាស់រង្វាល់ប្រេង ឬបរិមាណប្រេងមានសាំងប្រេងម៉ាស៊ូត និងពិនិត្យមើលកម្រិតចំហេះ ។ ប្រេងសាំងកម្រិតអ៊ុបតានមាន២ប្រភេទ មានសាំងកម្រិត៩៥ ឬសាំងស៊ុបពា និងសាំងកម្រិត៩២សាំងធម្មតា និងប្រេងម៉ាស៊ុតកម្រិតសេតាន ។ លោក មាន ចំណាប់ បានបញ្ជាក់ថា ការចុះពិនិត្យស្ថានីយប្រេងឥន្ធនៈនេះជាលើកដំបូង គ្រាន់តែផ្សព្វផ្សាយ និងណែនាំដល់ម្ចាស់ស្ថានីយប្រេងឥន្ធនៈឲ្យមានការយល់ដឹងច្បាប់ការលក់ប្រេងសាំង និងម៉ាស៊ូតឲ្យអថិតិជនឲ្យបានគ្រប់បរិមាណលីត្រ និងតម្លៃប្រេងដោយគ្មានការក្លែងបន្លំ ហើយធ្វើកិច្ចសន្យា បើរកឃើញស្ថានីយប្រេងណាមួយល្មើសច្បាប់ ហើយកិច្ចសន្យាមានលើកទី២ ឬ៣លើក និងចាត់វិធាការទៅតាមផ្លូវច្បាប់ចំពោះម្ចាស់នោះ ។ តាមច្បាប់បច្ចេកទេសស្ថានីយប្រេងឥន្ធនៈរយៈ១ឆ្នាំ មន្ត្រីជំនាញត្រូវចុះពិនិត្យមើលដៃបាញ់ប្រេងឲ្យបាន២ដងទើបត្រឹមត្រូវ ។
លោក ប៉ុក ឡាយជី ប្រធានមន្ទីពាណិជ្ជកម្មខេត្តបន្ទាយមានជ័យបានបញ្ជាក់ថា នៅខេត្តបន្ទាយមានជ័យមាន៩ស្រុក-ក្រុង ហើយមានស្ថានីយប្រេងឥន្ធនៈចំនួន៨៨កន្លែង ដែលស្ថានីយប្រេងស្តង់ដារដែលមានដៃចាប់ពី៦ទៅ១២ដៃបាញ់ប្រេងមានជាងពាក់កណ្តាល ។
មន្ត្រីជំនាញខ្លះបានខ្សឹបប្រាប់ថា នៅពេលដែលមន្ត្រីនាយកដ្ឋានកិច្ចការការពារអ្នកប្រើប្រាស់ និងបង្ក្រាបការក្លែងបន្លំនៃនាយកដ្ឋានកាំកុងត្រូលសហការជាមួយមន្ត្រីសាខាកាំកុងត្រូលខេត្ត និងមន្ទីរពាណិជ្ជកម្មខេត្តចុះពិនិត្យស្ថានីយប្រេងឥន្ធនៈក្នុងទីប្រជុំជនក្រុងសិរីសោភ័ណបានចំនួន១០កន្លែង រកឃើញមានស្ថានីយប្រេងឥន្ធនៈមួយចំនួនធ្វើការរង្វាស់រង្វាល់ប្រេងមានប្រេងសាំង និងប្រេងម៉ាស៊ូតក្នុងចំនួន១០០លីត្រខ្វះបរិមាណ៦ទៅ៨លីត្រ ហើយមានស្ថានីយប្រេងឥន្ធនៈខ្លះទៀតក្លែងបន្លំប្រេងសាំងស៊ុបពាមកដាក់ប្រេងធម្មតា ។ ហើយមានស្ថានីយ៍ប្រេងឥន្ធនៈមួយចំនួនខ្វះខាតបរិមាណបន្តិចបន្តួចចាត់ទុកថា អាចទទួលយកបាន និងត្រឹមត្រូវ ។
អថិតិជនដែលចាក់ប្រេងបានប្រាប់ថា នៅពេលដែលឃើញមន្ត្រីជំនាញចុះពិនិត្យស្ថានីយប្រេងឥន្ធនៈក្នុងខេត្តបន្ទាយមានជ័យ និងមានការកោតសសើរ និងគាំទ្រព្រោះស្ថានីយប្រេងឥន្ធនៈមួយចំនួនបានលក់ប្រេងដោយមិនគ្រប់បរិមាណ និងលក់បន្លំទិញប្រេងស៊ុបពាដាក់ប្រេងធម្មតាដែលធ្វើឲ្យប៉ះពាល់ស្ថានីយប្រេងដែលលក់ត្រឹមត្រូវ និងសុំឲ្យចាត់ការចំពោះស្ថានីយប្រេងណាមួយដែលលក់ប្រេងល្មើសត្រូវចាត់ការតាមច្បាប់ ៕
ចែករំលែកព័តមាននេះ