រាជធានីភ្នំពេញ ៖ រហូតមកដល់ពេលនេះមិនទានចប់ទេការចោទប្រកាន់គ្នាទៅវិញទៅមករវាងតារាសម្តែងកញ្ញាណាក់ ស្រីណា និងថៅកែផលិតកម្មមហាហង្សលោកអ៊ិន សុភិន ពាក់ព័ន្ធរឿងជំពាក់ប្រាក់ថ្លៃសម្តែងមិនទាន់សងនោះ។ ជាថ្មីម្តងទៀតណាក់ ស្រីណា បានទម្លាក់កំហុសនេះទៅលោកអ៊ិន…
រាជធានីភ្នំពេញ ៖ រហូតមកដល់ពេលនេះមិនទានចប់ទេការចោទប្រកាន់គ្នាទៅវិញទៅមករវាងតារាសម្តែងកញ្ញាណាក់ ស្រីណា និងថៅកែផលិតកម្មមហាហង្សលោកអ៊ិន សុភិន ពាក់ព័ន្ធរឿងជំពាក់ប្រាក់ថ្លៃសម្តែងមិនទាន់សងនោះ។ ជាថ្មីម្តងទៀតណាក់ ស្រីណា បានទម្លាក់កំហុសនេះទៅលោកអ៊ិន សុភិន និងបានចោទប្រកាន់ថៅកែផលិតកម្មមហាហង្សរូបនេះថាប្រើល្បិចពិសពុលមកលើរូបនាង និងអ្នកសិល្បៈមួយចំនួន ។
ការលាតត្រដាងហេតុផលនៃការមិនព្រមទូទាត់ប្រាក់ថ្លៃសម្តែងរបស់ណាក់ ស្រីណា នាពេលនេះធ្វើឡើងបន្ទាប់ពីលោកអ៊ិន សុភិន បានអះអាងថា ផលិតកម្មរបស់លោកមិនមានបំណងយកណាក់ ស្រីណា ឲ្យចូលរួមសម្តែងទេ ហើយការមិនទាន់បានបើកប្រាក់ថ្លៃសម្តែងឲ្យនាងមកពីអតិថិជនជាដៃគូរកស៊ីជាមួយលោកនោះក៏មិនទាន់ទូទាត់ប្រាក់ឲ្យផលិតកម្មលោកដែរ ហេតុនេះទើបមានភាពយឺតយ៉ាវ ។ ការលើកឡើងបែបនោះធ្វើឲ្យណាក់ ស្រីណា ខឹងក៏បានលាតត្រដាងពីល្បិចរបស់លោកអ៊ិន សុភិន ។
តាមរយៈសារដែលណាក់ ស្រីណា បានបង្ហោះកាលពីពេល ថ្មីៗកន្លងមកឲ្យដឹងថា ៖
១-ជាដំបូងនាងខ្ញុំសូមគោរពអរគុណចំពោះលោកអ៊ិន សុភិន ចាងហ្វាងផលិតកម្មមហាហង្សដែលបានចេញបកស្រាយនូវហេតុផលដែលគ្មានទំនួលខុសត្រូវលើការងារ ព្រមទាំងប្រើល្បិចពិសពុលកេងប្រវ័ញ្ចលើកម្លាំងពលកម្មមនុស្សជាច្រើននាក់ព្រោះតែប្រយោជន៍របស់ខ្លួន ។
២-ខ្ញុំបានបំពេញការងារជូនក្រុមហ៊ុនរបស់លោកតាមតួនាទី និងកិច្ចសន្យាការងារតាមលក្ខខណ្ឌរវាងខ្ញុំ និងលោកដោយមិនដែលធ្វើឲ្យក្រុមការងារវេទនា ឬមានបញ្ហាដោយសារខ្ញុំឡើយ ដូច្នេះរឿងមួយនេះមិនមែនជារឿងដែលលោកទៅយកអតិថិជនមកពាក់ពន្ធ័ ហើយដោះសាយករួចខ្លួនអ៊ីចឹងទេ ព្រោះខ្ញុំជាអ្នកចុះកុងត្រាធ្វើការជាមួយលោក ។
សួរថាគ្រាន់តែអតិថិជនរបស់លោកជ្រើសរើសយកខ្ញុំមកសម្តែង តើជាកំហុសរបស់ខ្ញុំមែនទេដែលត្រូវឲ្យលោកមិនបើកលុយឲ្យខ្ញុំ ? គេជាភ្ញៀវរបស់លោកគេមានសិទ្ធិជ្រើសរើសតួ តែសំខាន់លោកឯងជាអ្នកចរចាតម្លៃជាមួយតួ ដូច្នេះលោកត្រូវមានទំនួលខុសត្រូវមកលើតួ ។
៣-សូមបញ្ជាក់ថារឿង«មរតកចុកឈាម»នេះ ខ្ញុំមិនបានទៅអង្វរក្រាបលន់តួខាងអតិថិជន ឬខាងផលិតកម្មរបស់លោកឲ្យយកខ្ញុំធ្វើជាតួឯកទេ ក៏ប៉ុន្តែលោក និងអតិថិជនជាអ្នកសម្រេចដោយខ្លួនឯង អ៊ីចឹងលោកត្រូវមានទំនួលខុសត្រូវចំពោះរឿងនេះ ។
៤-ក្នុងនាមលោកជាប្រធាន និងជាថ្នាក់ដឹកនាំក្រុមហ៊ុនមួយរូប បើលោកមានឆន្ទ:ល្អស្អាតស្អំ លោកប្រាកដជាយកគំនិតបែបអ្នកដឹកនាំមកដោះស្រាយបញ្ហាដែលកើតមានមកលើខ្ញុំ និងមនុស្សដទៃផ្សេងទៀតដោយវិធីល្អប្រសើរជាងនេះ មិនមែនប្រើឲ្យគេធ្វើការចប់ហើយ បែរជាមិនអើពើនឹងតម្លៃកម្លាំងពលកម្មគេបែបនេះទេ ។
៥-ជាការសំនូមពររបស់ខ្ញុំ គឺខ្ញុំគ្រាន់តែចង់ឲ្យលោកដែលជាម្ចាស់ផលិតកម្មមហាហង្សមេត្តាបញ្ឈប់នូវសកម្មភាព និងអំពើដ៏ពិសពុលដែលធ្វើដាក់ខ្ញុំ និងអ្នកសិល្ប:ដទៃទៀតទៅ ព្រោះវាជះផលអាក្រក់ខ្លាំងណាស់ដល់មនុស្សជាច្រើននាក់ដែលគេមានបេះដូងបម្រើសិល្ប:ដោយក្តីស្រលាញ់ ។
៦-ខ្ញុំមិនមែនចង់ឈ្នះចាញ់ជាមួយប្រភេទមនុស្សដូចជាលោកទេ តែខ្ញុំគ្រាន់ចង់កត់បទពិសោធន៍ដ៏ឈឺចាប់មួយនេះទុក និងជាសារដើម្បីផ្សព្វផ្សាយដល់បងប្អូនដទៃទៀតកុំឲ្យគេរងគ្រោះព្រោះលោកអ៊ិន សុភិន ដូចជាខ្ញុំ ។
មិនទាន់មានការឆ្លើយតបទៅវិញទេពីលោកអ៊ិន សុភិន ទាក់ទិនអ្វីដែលណាក់ ស្រីណា និយាយចំពោះលោកនោះ ៕
ចែករំលែកព័តមាននេះ