ខេត្តព្រៃវែង ៖ ក្រុមអ្នកដំណើរក៏ដូចជាប្រជាពលរដ្ឋនៅទីប្រជុំជនអ្នកលឿងក្នុងស្រុកពាមរក៌ ខេត្តព្រៃវែង នាំគ្នារអ៊ូរទាំខ្លាំងរឿងកកស្ទះចរាចរណ៌ជារៀងរាល់ថ្ងៃនៅក្នុងទីប្រជុំជនមួយនេះ ដោយសារតែការជួសជុលផ្លូវជាតិលេខ១១ ពីចំណុចរង្វង់មូលអតីតកំពង់ចម្លងអ្នកលឿង ឆ្ពោះទៅកាន់ក្រុងព្រៃវែង ។
ជាក់ស្តែង ចាប់ពីម៉ោង៥ព្រឹក ថ្ងៃទី១៥ សីហា រហូតដល់ម៉ោង១២ថ្ងៃត្រង់ គេសង្កេតឃើញរថយន្តដឹកទំនិញ រថយន្តអ្នកដំណើរទាំងតូចទាំងធំរាប់រយគ្រឿង បានកកស្ទះបន្តគ្នាដាច់កន្ទុយភ្នែក ចាប់ពីរង្វង់មូលអតីតកំពង់ចម្លងអ្នកលឿង រហូតដល់រង្វង់មូលត្រីកោណ ផ្លូវឡើងស្ពានអ្នកលឿង និងពីរង្វង់មូលកំពង់ចម្លងអ្នកលឿង រហូតដល់មុខប៉ូស្តិ៍រដ្ឋបាលឃុំព្រែកខ្សាយ(ក) ។
ការកកស្ទះនេះត្រូវបានអ្នកស្រុកអះអាងថា បណ្តាលមកពីក្រុមអ្នកជួសជុលផ្លូវជាតិលេខ១១បានឈូសផ្លូវនេះទាំងមូលតែម្តង ស្របពេលមានភ្លៀងធ្លាក់មកធ្វើអោយបែកភក់ល្បាប់ខ្លាំង លុះពេលមានរថយន្តយីឌុបធំៗបើកឆ្លងកាត់ ក៏ធ្វើអោយស្រុតជាប់ទៅមុខមិនរួចថយក្រោយមិនកើត ជាហេតុធ្វើអោយរថយន្តផ្សេងៗទៀត ដែលមកពីមុខផងពីក្រោយផងត្រូវជាប់គាំងបន្តកន្ទុយគ្នារហូតរាប់រយគ្រឿងតែម្តង ។
ចំពោះបញ្ហានេះត្រូវបានអាជ្ញាធរ និងសមត្ថកិច្ចមូលដ្ឋានលួចបង្ហើបប្រាប់ថា មូលហេតុដែលធ្វើអោយមានការកកស្ទះបែបនេះ គឺមកពីក្រុមអ្នកជួសជុលផ្លូវនោះតែម្តង ដោយជាធម្មតាការធ្វើផ្លូវ គេត្រូវឈូសផ្លូវម្ខាង ទុកម្ខាងសម្រាប់ធ្វើចរាចរណ៌ពេលធ្វើរួចរាល់ម្ខាងហើយទើបគេឈូសម្ខាងទៀត ។ ប៉ុន្តែការធ្វើនៅចំណុចទីប្រជុំជនអ្នកលឿងនេះ គឺគេឈូសផ្លូវទាំងមូលតែម្តង ស្របពេលមានភ្លៀងធ្លាក់មកទៀត ធ្វើអោយតួផ្លូវទាំងមូលបែកភក់ល្បាប់ ទើបធ្វើអោយជាប់រថយន្តបង្កអោយស្ទះចរាចរណ៌បែបនេះតែម្តង ។
ដើម្បីដោះស្រាយបញ្ហានេះអាជ្ញាធរស្រុកពាមរក៌បានស្នើសុំអោយបងប្អូនក្រុមអ្នកដំណើរក៏ដូចជារថយន្តតូចធំទាំងអស់ ដែលមានបំណងចង់ធ្វើដំណើរទៅទីរួមខេត្តព្រៃវែង ឬខេត្តត្បូងឃ្មុំ កំពង់ចាមក្តី សូមធ្វើដំណើរវាងទៅតាមទីរួមស្រុកបាភ្នំវិញ ដើម្បីបញ្ចៀសកុំអោយមានការកកស្ទះនាំអោយខាតពេលវេលា ។ ដោយឡែកបងប្អូនប្រជាពលរដ្ឋនៅទីប្រជុំជនអ្នកលឿង សូមធ្វើដំណើរវាងតាមផ្លូវទំនប់ក្រវ៉ាត់ផ្សារអ្នកលឿង ចេញតាមខ្លោងទ្វាវត្តឧត្តមខេមរារាមទើបចៀសផុតពីការកកស្ទះ ៕
ចែករំលែកព័តមាននេះ