រាជធានីភ្នំពេញ ៖ រថយន្តម៉ាកកាម៉ារីបាឡែនមួយគ្រឿងបើកបរឆ្លងផ្លូវទៅបុកជាមួយ និងរ៉ឺម៉កម៉ូតូដឹកទំនិញមួយគ្រឿងបែកចង្កៀង និងក្រពឹតផ្នែកខាងមុខ ខណៈពេលដែលបុរសម្នាក់បើកបរដល់ចំណុចផ្លូវបំបែកជា៤ ដោយខ្វះការប្រុងប្រយ័ត្នទៅបុកជាមួយ និងម៉ូតូរ៉ឺម៉កដឹកទំនិញមួយគ្រឿងនោះ ។
ករណីគ្រោះថ្នាក់ចរាចរណ៍នេះដែរបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី ១៥ ខែសីហា ឆ្នាំ២០១៨ នៅត្រង់ចំណុចផ្លូវលេខ៣១០កែង និងផ្លូវលេខ៩៥ សង្កាត់បឹងកេងកងទី២ ខណ្ឌចំការមន ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា មុនពេលកើតហេតុគេបានឃើញម៉ូតូរ៉ឺម៉កឃ្លុបដឹកទំនិញមួយគ្រឿង ពណ៌ក្រហម ពាក់ស្លាកលេខភ្នំពេញ ១B-៨៩០៨ មួយគ្រឿង ដែលបើកបរដោយយុវវជនម្នាក់ តាមបណ្តោយផ្លូវលេខ៣១០ ក្នុងទិសដៅពីកើតទៅលិច ។ លុះមកដល់ចំណុចកើតហេតុខាងលើក៏ត្រូវបានរថយន្តម៉ាកកាម៉ារីបាឡែន ពណ៌ស ពាក់ស្លាកលេខភ្នំពេញ ២AQ-០៧២៤ មួយគ្រឿង បើកបរដោយបុរសម្នាក់ និងមានបុរសម្នាក់ទៀតជាអ្នករួមដំណើរ (គ្នាពីរនាក់) បានបើកបរតាមបណ្តោយផ្លូវលេខ៩៥ ក្នុងទិសដៅពីត្បូងទៅជើងឆ្លងផ្លូវលេខ៣១០ ។
តាមប្រភពដដែលបានប្រាប់បន្តទៀតថា ពេលនោះរថយន្តបាឡែនមួយគ្រឿងនោះក៏បានទៅបុកចំជ្រុងរបស់ម៉ូតូរ៉ឺម៉កឃ្លុបដឹកទំនិញនោះបណ្តាលឲ្យបែកចង្កៀង និងក្រពិតផ្នែកខាងមុខខ្លួនឯង រងការខូចខាតយ៉ាងដំណំតែម្តង សំណាងល្អមិនបង្កឲ្យមានមនុស្សណាម្នាក់រងគ្រោះថ្នាក់ឡើយ ។
ក្រោយពេលកើតហេតុកម្លាំងមានសមត្ថកិច្ចមូលដ្ឋានក៏បានចុះមកដល់កន្លែងកើតហេតុខាងលើ ធ្វើការវាស់វែង និងយករថយន្តម៉ាកកាម៉ារីបាឡែន និងម៉ូតូរ៉ឺម៉កឃ្លុបដឹកទំនិញទាំង២គ្រឿង ទៅដាក់លើចិញ្ចើមផ្លូវ ដើម្បីធ្វើការដោះស្រាយគ្នា ដោយអស់រយៈពេលរាប់ម៉ោងទើបត្រូវគ្នា ដោយសារតែភាគីខាងរ៉ឺម៉កមានការយោគយល់នោះក៏យល់ព្រមជួយចេញលុយចំនួន៥០ដុល្លារទៅឲ្យភាគីខាងរថយន្តយកទៅធ្វើការជួសជុលដោយខ្លួនឯង និងបញ្ចប់រឿងនៅនឹង កន្លែងកើតហេតុភ្លាមៗផងដែរ ៕
ចែករំលែកព័តមាននេះ