រាជធានីភ្នំពេញ ៖ ទោះជាមានអ្នកនិយាយថា សកម្មភាពបញ្ចេញញើសតាមរយៈការធ្វើការងារដោយកម្លាំង ដើរហាត់ប្រាណ និងរាំតាមចង្វាក់ភ្លេងជាដើម សុទ្ធតែមានប្រយោជន៍ចំពោះសុខភាព ក៏អ្នកជំនាញនៅតែអះអាងថា សកម្មភាពទាំងនោះនៅតែមិនអាចទទួលបានផលល្អខ្លាំងដូចគ្នានឹងការហាត់ប្រាណក្នុងក្លិប និងការបញ្ចេញញើសនៅកន្លែងស្ទីមបានទេ ដោយសារតែការបញ្ចេញញើសដោយការហាត់ប្រាណក្នុងក្លិប និងនៅកន្លែងស្ទីម វាមានលទ្ធភាពធ្វើឱ្យរន្ធញើសបើកចំហបញ្ចេញជាតិពុលបានល្អជាងការធ្វើសកម្មភាពបញ្ចេញញើសខុសស្ដង់ដារ ។ អ៊ីចឹងហើយទើបគេឃើញមនុស្សច្រើនឡើងងាកទៅធ្វើលំហាត់ប្រាណក្នុងក្លិប និងទៅបញ្ចេញញើសនៅកន្លែងស្ទីម ជាពិសេសអ្នកដែលត្រូវការទាំងរូបរាងស្អាត និងសុខភាពល្អ។
លោក រស់ សោភ័ណ្ឌ ជាគ្រូបង្វឹកលំហាត់ប្រាណក្នុងសណ្ឋាគារធំៗ និងជាតារាសម្ដែងដែលមានសាច់ដុំធំស្រស់សង្ហារ បានអះអាងថា ការហាត់ប្រាណដោយរាំតាមសួន ឬដើរហាត់ប្រាណ និងហាត់ប្រាណក្នុងក្លិបមិនដូចគ្នានោះទេ ហើយវារឹតតែខុសគ្នាទៅទៀតបើការហាត់ប្រាណក្នុងក្លិបមានគ្រូបង្វឹកច្បាស់លាស់ ។
លោកថា ការហាត់ប្រាណក្នុងក្លិបនឹងលេចចេញលទ្ធផលគាប់ចិត្តឱ្យអ្នកប្រឹងប្រែងហ្វឹកហាត់តាមដែលខ្លួនចង់បាន ដូចជាការចង់សម្រកក្បាលពោះត្រូវហាត់ជាមួយឧបករណ៍ណា ចង់សម្រកខ្លាញ់កំភួនជើងត្រូវហ្វឹកហាត់ជាមួយឧបករណ៍ណា និងត្រូវហ្វឹកហាត់យ៉ាងម៉េចឱ្យល្អជាដើម ។ លោកថា អ្នកចង់ហាត់ប្រាណគ្រាន់តែឱ្យបែកញើស គឺពិតជាឱ្យតម្លៃលើការហាត់ប្រាណតាមសួន តែបើចង់បានរាងកាយស្អាត និងចង់បានសាច់ដុំ ឬសម្រកខ្លាញ់ត្រង់ចំណុចណាមួយ គឺមិនមានអ្វីប្រសើរជាងការហាត់ប្រាណក្នុងក្លិបនោះទេ ។
លោកថា បើទោះអ្នកហាត់ប្រាណតាមសួន និងហាត់ប្រាណដោយរត់ ឬដើរ នៅតែមានចំនួនច្រើន ប៉ុន្តែអ្នកហាត់ប្រាណក្នុងក្លិបក៏មានកំណើនច្រើនដែរ ដោយក្នុងមួយថ្ងៃៗលោកសឹងមិនមានពេលបង្វឹកបច្ចេកទេសដល់អ្នកចង់បានសាច់ស្អាត និងចង់មានសុខភាពល្អដែលតម្រូវឱ្យលោកទទួលការងារនោះផង ។ លោកថា ការហាត់ប្រាណក្នុងក្លិបគេមានទម្រង់ និងបច្ចេកទេសរបស់គេច្បាស់លាស់ ហើយក្រោយការព្យាយាមគឺអ្នកហាត់នឹងទទួលបានលទ្ធផលច្បាស់លាស់ ដែលផ្ទុយពីការហាត់ប្រាណដោយរាំតាមសួន គឺបានត្រឹមតែបែកញើសតែមិនច្បាស់ថាបានផ្នែកណាមួយតាមការពេញចិត្តនោះទេ ។
លោកថា ការហាត់ប្រាណតាមក្លិបគឺអ្នកហាត់នឹងមានសាច់ម៉ាន់ រឹងមាំ ហើយបើនិយាយពីរាងកាយគឺមានការប្រែប្រួល ដោយផ្ដល់អត្ថប្រយោជន៍ច្រើនឡើងនៅពេលអ្នកហាត់កាន់តែបន្តហាត់ឱ្យបានដិតដល់ ។ ក្នុងនោះបើនិយាយពីសុវត្ថិភាពក៏ខុសគ្នាណាស់ដែរ ដោយសារតែការហាត់ប្រាណក្នុងក្លិបមិនភ័យរឿងចោរឆក់ចោរប្លន់ ។ យ៉ាងណាមិញ លោកទទួលស្គាល់ថា ការហាត់ប្រាណក្នុងក្លិបគឺពិតជាតម្រូវឱ្យអ្នកចង់ហាត់ចំណាយពេលច្រើន និងពិបាកក្នុងការធ្វើដំណើរច្រើនមែន ដែលផ្ទុយពីការហាត់ប្រាណដោយរាំតាមសួន គឺឃើញកន្លែងណាអាចចូលហាត់កន្លែងហ្នឹងបាន ។
លោកថា ការហាត់ប្រាណក្នុងក្លិបបើត្រូវហាត់ប្រាណក្នុងក្លិបល្អៗ ហើយមានគ្រូបង្វឹកជំនាញទៀត គឺរឹតតែត្រូវចំណាយដល់ខ្ទង់រយដុល្លារក្នុងមួយឆ្នាំ ក្នុងពេលដែលការហ្វឹកហាត់នោះក៏មានពីរបៀបតមអាហារ និងថែសុខភាពច្បាស់លាស់ផងដែរ។ លោកថា ការហាត់ប្រាណដោយស្ទីមក៏ល្អដែរ ប៉ុន្តែល្អសម្រាប់តែអ្នកមានវ័យជ្រេមិនសូវចង់ហាត់ប្រាណដោយប្រើកម្លាំងប៉ុណ្ណោះ។
លោក ខេវិន ជាអ្នកចូលចិត្តជ្រើសរើសយកការបញ្ចេញញើសនៅកន្លែងហាត់ប្រាណ បានអះអាងថា ក្រោយការបង់លុយហ្វឹកហាត់ក្នុងក្លិបលោកយល់ថា ការហាត់ប្រាណក្នុងក្លិបទទួលបានអត្ថប្រយោជន៍ច្រើនជាង បើទោះជាបរិយាកាសគឺមិនសប្បាយដូចគ្នានឹងការហាត់តាមរបៀបរាំនៅតាមសួននានាក្ដី ។
លោកថា ការចំណាយពេលហាត់ប្រាណនៅខាងក្រៅក្លិប បានត្រឹមតែបែកញើស និងមានសុខភាពល្អតែប៉ុណ្ណោះ ប៉ុន្តែនៅពេលលោកប្ដូរមកហាត់ប្រាណក្នុងក្លិបវិញ គឺមានការប្រែប្រួលជាងមុន ជាពិសេសគឺដឹងពីរបៀបហាត់យករាង ហាត់យកសាច់ស្មា ហាត់យកសាច់ដុំដៃ ហាត់យកសាច់ដុំក្បាលពោះ និងហាត់យកសាច់ដុំផ្នែកផ្សេងៗ ដោយលោកបញ្ជាក់ថា ក្រោយការប្រឹងប្រែងគឺឃើញរាងរបស់ខ្លូនចាប់ផ្ដើមស្រឡាញ់ជាងមុន។ យ៉ាងណាមិញ លោកថាការហាត់ប្រាណក្នុងក្លិបគឺត្រូវប្រើការអត់ធ្មត់ និងភាពតស៊ូ ដោយសារតែឧបករណ៍ដែលតម្រូវឱ្យហ្វឹកហាត់ជាមួយសុទ្ធតែបណ្ដាលឱ្យឈឺខ្លួនខ្លាំងក្នុងប៉ុន្មានថ្ងៃដំបូង ជាពិសេសសម្រាប់អ្នកមកហាត់ឈប់ៗមិនជាប់លាប់ គឺរឹតតែពិបាក។
ដោយឡែក សម្រាប់លំហាត់ប្រាណនៅកន្លែងស្ទីម លោកថាក៏ល្អម្យ៉ាងដែរ ដោយសារតែមានទាំងទឹកក្ដៅ ទឹកត្រជាក់ និងមានបន្ទប់កំដៅធ្វើឱ្យចេញញើសបានល្អ សម្រាប់អ្នកមិនចង់ហាត់ប្រាណដោយប្រើកម្លាំង ។ ប៉ុន្តែលោកថាការហាត់ប្រាណនៅកន្លែងស្ទីម បានត្រឹមតែយូរៗម្ដងប៉ុណ្ណោះ បើញឹកញាប់ពេកដូចហាត់ប្រាណក្នុងក្លិប ក៏ឆាប់ខ្សោះខ្លួនផងដែរ។
គួរបញ្ជាក់ផងដែរថា ក្លិបហាត់ប្រាណ និងកន្លែងស្ទីមហាត់ប្រាណនៅក្នុងប្រទេសកម្ពុជា កាន់តែមានកំណើន ដោយសារអ្នកពេញនិយមហាត់ប្រាណ និងចង់បញ្ចេញញើសបែបនេះមានចំនួនច្រើនឡើង ដោយក្លិបហាត់ប្រាណត្រូវគេឃើញវិនិយោគស្ទើរគ្រប់ទីកន្លែងសូម្បីតែនៅកន្លែងកន្លុកកន្លៀត ផ្ទះ១ល្វែងក៏គេអាចបើកបម្រើអតិថិជនបានដែរ លើកលែងតែកន្លែងស្ទីមដែលគេនិយមបោះទុនតែនៅទីប្រជុំធំៗ។
ចំពោះតម្លៃចូលក្លិបហាត់ប្រាណក្នុងមួយលើក២ពាន់រៀល និងបើប្រើម៉ាស៊ីនដោយសេរីគឺមួយខែ៣០ដុល្លារ និងមានតម្លៃខ្ពស់ទាបជាងនេះ អាស្រ័យលើការកំណត់ ខណៈដែលតម្លៃក្នុងការស្ទីមមួយលើកវិញគឺ៣-៤ដុល្លារ ឬលើសនេះ អាស្រ័យលើទីតាំង និងសេវាកម្មដូចគ្នា៕
ចែករំលែកព័តមាននេះ