ខេត្តក្រចេះ ៖ សេចក្តីរាយការណ៍បន្តឱ្យដឹងថា ពាក់ព័ន្ធអំពើឃាតកម្មសម្លាប់មនុស្សផ្តាច់ពូជ១គ្រួសាររួចដុតកម្ទេចសាកសព ដែលជនរងគ្រោះជាប្តី-ប្រពន្ធ និងកូនប្រុស-ស្រី បណ្តាលឱ្យឆេះក្លាយជាផេះនិងធ្យូងរួញក្រញង់សល់ពាក់កណ្តាលនៃរាងកាយនោះ គឺកំពុងស្ថិតក្នុងភាពងងឹតដដែល ។ បើទោះបីជានគរបាលព្រហ្មទណ្ឌខឹតខំស្រាវជ្រាវជ្រាវយ៉ាងសស្រាក់សស្រាំ…
ខេត្តក្រចេះ ៖ សេចក្តីរាយការណ៍បន្តឱ្យដឹងថា ពាក់ព័ន្ធអំពើឃាតកម្មសម្លាប់មនុស្សផ្តាច់ពូជ១គ្រួសាររួចដុតកម្ទេចសាកសព ដែលជនរងគ្រោះជាប្តី-ប្រពន្ធ និងកូនប្រុស-ស្រី បណ្តាលឱ្យឆេះក្លាយជាផេះនិងធ្យូងរួញក្រញង់សល់ពាក់កណ្តាលនៃរាងកាយនោះ គឺកំពុងស្ថិតក្នុងភាពងងឹតដដែល ។ បើទោះបីជានគរបាលព្រហ្មទណ្ឌខឹតខំស្រាវជ្រាវជ្រាវយ៉ាងសស្រាក់សស្រាំ និងដុតដៃដុតជើងយ៉ាងណា ក៏ហាក់នៅមិនទាន់បានបង្ហាញសញ្ញាអ្វីនៅឡើយ ។
គិតត្រឹមថ្ងៃទី១៥ សីហា នេះ គឺមានរយៈពេល៣ថ្ងៃហើយ ដែលសំណុំរឿងឃាតកម្មដ៏សាហាវឃោរឃៅនេះ នៅមិនទាន់អាចបំបែកសំណុំរឿងបាន ពីសំណាក់កម្លាំងនគរបាលព្រហ្មទណ្ឌខេត្ត ខណៈជនដែលជាប់សង្ស័យក៏នៅតែឃាត់ខ្លួន ដើម្បីសាកសួរដដែល ។ ចំពោះការចុះទៅរុករកវត្ថុតាងនៅកន្លែងកើតហេតុ ក៏នៅតែបន្តធ្វើ ស្របជាមួយស្ថានភាពភូមិសាស្ត្រកន្លែងកើតហេតុ មានទីតាំងនៅតំបន់ដាច់ស្រយាល ពិបាកនឹងធ្វើការចុះទៅស្រាវជ្រាវ ។
ជាមួយនឹងការបើកការស៊ើបអង្កេតពីកម្លាំងនគរបាលជំនាញ អស់រយៈពេលជាច្រើនថ្ងៃមកនេះ មានមនុស្សចំនួន៥នាក់ហើយ ដែលសុទ្ធសឹងជាអ្នករស់នៅខាងក្រោយភូមិប្អៀ ឃុំថ្មី ស្រុក ចិត្របុរី ក្បែរផ្ទះកើតហេតុរបស់គ្រួសាររងគ្រោះ ក៏ត្រូវបាននគរបាលព្រហ្មទណ្ឌនាំខ្លួនពួកគេជាបន្តបន្ទាប់មកស្នងការដ្ឋាន ដើម្បីសាកសួរ ក្រោយពីសង្ស័យថា ពួកគេទាំងនេះ អាចមានជាប់ពាក់ព័ន្ធជាមួយករណីឃាតកម្ម ដែលមានចរិត យ៉ាងសាហាវព្រៃផ្សៃ ដែលពុំធ្លាប់មាននេះ ។
គួរបញ្ជាក់ថា មូលហេតុដែលឈានឱ្យមានការចាប់ខ្លួនមនុស្សទាំង៥នាក់ជាបន្តបន្ទាប់ ដើម្បីធ្វើការសាកសួរនេះ គឺក្រោយពីនគរបាលសង្ស័យថា ពួកគេទាំងនេះ អាចមានជាប់ពាក់ព័ន្ធករណីឃាតកម្ម សម្លាប់មនុស្សយ៉ាងសាហាវទៅលើគ្រួសាររបស់ជនរងគ្រោះជាអ្នកចម្ការខាងលើ ស្ថិតនៅតំបន់ដាច់ស្រយាល ក្នុងភូមិប្អៀ ឃុំថ្មី ស្រុកចិត្របុរី ហើយករណីនេះ ក៏ត្រូវបាននគរបាលសន្និដ្ឋានថា អាចកើតឡើងកាលពីយប់ថ្ងៃទី៩ សីហា កន្លងមក ។
ដោយសារតែស្ថានភាពក្នុងភូមិសាស្ត្រកន្លែងកើតហេតុ នៅតំបន់ឆ្ងាយពីភូមិ ហើយសកម្មភាពរបស់ជនសង្ស័យ ដែលបានប្រព្រឹត្តនេះ មិនបានបន្សល់ទុកនូវត្ថុតាងណាមួយនៅកន្លែងកើតហេតុទេ ។ មួយវិញ
ទៀត ការទទួលព័ត៌មានរបស់នគរបាលពីកន្លែងកើតហេតុ មានភាពយឺតយ៉ាវបន្តិច ទើបធ្វើឱ្យនគរបាលជំនាញពិបាក និងកំណត់មុខសញ្ញាឱ្យបានច្បាស់ ក្នុងការស៊ើបអង្កេត ។
អនុកណ្តាលការិយាល័យព្រហ្មទណ្ឌខេត្ត លោកវរសេនីយ៍ឯក កង វណ្ណី ក៏បានឱ្យដឹងនៅថ្ងៃទី១៥ សីហា ដដែលនេះថា ការសាកសួរទៅលើមនុស្សទាំង៥នាក់នោះនៅមិនទាន់បានពន្លឺ ជុំវិញករណីឃាតកម្មសម្លាប់មនុស្សយ៉ាងសាហាវមួយនេះនៅឡើយទេ ។ ប៉ុន្តែលោកថា បើទោះបីជាករណីនេះ មានភាពស្មុញស្មាញក្នុងការស្រាវជ្រាវយ៉ាងណាក្តី ក៏កម្លាំងយើង នៅតែខិតខំស្រាវជ្រាវស៊ើបអង្កេតយ៉ាងយកចិត្តទុកដាក់បំផុត ។
ចែករំលែកព័តមាននេះ