រាជធានីភ្នំពេញ ៖ ឆ្នាំ២០១៨នេះ គឺជាឆ្នាំទី៧ហើយនៃការរៀបចំបុណ្យសមុទ្រ និងជាជុំទី២ សម្រាប់ខេត្តកោះកុងធ្វើជាម្ចាស់ផ្ទះ បន្ទាប់ពីលើកទី១ បានប្រារព្ធធ្វើកាលពីឆ្នាំ២០១៤ ប្រកបដោយជោគជ័យ ។…
រាជធានីភ្នំពេញ ៖ ឆ្នាំ២០១៨នេះ គឺជាឆ្នាំទី៧ហើយនៃការរៀបចំបុណ្យសមុទ្រ និងជាជុំទី២ សម្រាប់ខេត្តកោះកុងធ្វើជាម្ចាស់ផ្ទះ បន្ទាប់ពីលើកទី១ បានប្រារព្ធធ្វើកាលពីឆ្នាំ២០១៤ ប្រកបដោយជោគជ័យ ។
តាមការសម្រេចរបស់រាជរដ្ឋាភិបាលកម្ពុជា បុណ្យសមុទ្រលើកទី៧នេះ នឹងត្រូវធ្វើឡើង ចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០១៨ ដោយត្រូវរៀបចំឲ្យកាន់តែធំជាងមុន ដោយរំពឹងនឹងទទួលបានភ្ញៀវជាតិ និងអន្តរជាតិចូលរួមទស្សនាប្រមាណ៣០ម៉ឺននាក់ ក្រោមវត្តមានអញ្ជើញចូលរួមជាអធិបតីដ៏ខ្ពង់ខ្ពស់ពីសម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។
រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន បានថ្លែងក្នុងកិច្ចប្រជុំកាលពីថ្ងៃទី១៣ សីហា នៅសាលាខេត្តកោះកុងថា ពិធីបុណ្យសមុទ្រឆ្នាំនេះ ក្រសួងនឹងធ្វើឲ្យធំ និងមានភាពអធិកអធមជាងមុនសម្រាប់ខេត្តកោះកុង ដែលនឹងត្រូវធ្វើជាម្ចាស់ផ្ទះក្នុងការរៀបចំពិធីសមុទ្រលើកទី៧ ជុំទី២ ក្នុងឆ្នាំ២០១៨នេះ ខណៈលើកទី១ បានប្រារព្ធធ្វើកាលពីឆ្នាំ២០១៤ ដោយមានភ្ញៀវចូលរួមជាង១០ម៉ឺននាក់ ប៉ុន្តែសម្រាប់ឆ្នាំនេះ លោករំពឹងទុកថា នឹងមានភ្ញៀវចូលរួមប្រមាណជិត៣០ម៉ឺននាក់ ។
លោក ថោង ខុន បានអះអាងថា ៖« ខេត្តកោះកុង មានតំបន់សក្ដានុពលទេសចរណ៍ជាច្រើន ដែលអាចទាក់ទាញភ្ញៀវជាតិ និងអន្តរជាតិមកទស្សនាកម្សាន្ដ ក្នុងនោះដូចជា តំបន់កោះស្ដេច តំបន់អារ៉ែង តំបន់ព្រៃកោងកាង រួមទាំងតំបន់សហគមន៍ទេសចរណ៍មួយចំនួនទៀត។ ទន្ទឹមនោះ យើងក៏បានឯកភាពគ្នាថា នឹងខិតខំរៀបចំតំបន់ឆ្នេរខ្សាច់សម្រាប់ភ្ញៀវទេសចរថែមទៀត » ។ តាមលោករដ្ឋមន្ត្រី បុណ្យសមុទ្រដែលមានរយៈពេល៣ថ្ងៃនេះ មានកម្មវិធីច្រើនជាងមុន ធំជាងមុន ជាមួយនឹងការអញ្ជើញក្រុមសិល្បៈ និងក្រុមកីឡាមកពីប្រទេសជិតខាង ដូចជា ថៃ ឡាវ និងវៀតណាមចូលរួម ដើម្បីញ៉ាំងឲ្យពិធីបុណ្យកាន់តែមានភាពទាក់ទាញ ។ លោកថា ៖« ពិធីបុណ្យសមុទ្រឆ្នាំនេះ យើងរៀបចំឲ្យប្លែក និងធំជាងឆ្នាំមុន នៅត្រង់ថា យើងនឹងរៀបចំតំបន់ទេសចរណ៍ដ៏មានសក្ដានុពលដែលបានលើកឡើងខាងលើ ដើម្បីស្រូបទាញទេសចរទៅកាន់តំបន់នោះ » ។
ទោះយ៉ាងនេះក្ដី លោករដ្ឋមន្ត្រីបានលើកឡើងអំពីបញ្ហាប្រឈម ដែលនឹងត្រូវរៀបចំដោះស្រាយឲ្យរួចរាល់ផងដែរ ពិសេសគឺផ្លូវគមនាគមន៍ដែលកំពុងជួបការលំបាកដោយសារគ្រោះទឹកជំនន់ ។ ក្នុងនោះដែរ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ក៏បានសន្យាហើយថា លោកនឹងខិតខំស្ដារ និងជួសជុលឲ្យបានទាន់មុនពិធីបុណ្យសមុទ្រនេះ ។
លោកជំទាវ មិថុនា ភូថង អភិបាលខេត្តកោះកុង បានឲ្យដឹងដែរថា ពិធីសមុទ្រឆ្នាំនេះ អាជ្ញាធរខេត្តនឹងរៀបចំហេដ្ឋារចនាសម្ព័ន្ធសម្រាប់ទទួលភ្ញៀវទេសចរដូចជា សណ្ឋាគារ ផ្ទះសំណាក់ និងការបោះតង់ ជាដើម ។ ទន្ទឹមនោះ អាជ្ញាធរខេត្តក៏បានផ្សព្វផ្សាយ និងបំផុសឲ្យប្រជាពលរដ្ឋរៀបចំផ្ទះសម្បែងរៀងៗខ្លួនឲ្យមានរបៀបរៀបរយ ដើម្បីត្រៀមទទួលភ្ញៀវផងដែរ ក្នុងករណីភ្ញៀវចង់ស្នាក់នៅផ្ទះប្រជាពលរដ្ឋ ។
លោកជំទាវអភិបាលខេត្ត បានបន្ដថា ៖«ក្រៅពីការរៀបចំសន្តិសុខសណ្ដាប់ធ្នាប់ រួមទាំងហេដ្ឋារចនាសម្ព័ន្ធបម្រើឲ្យពិធីបុណ្យនេះ អាជ្ញាធរខេត្ត រួមទាំងមន្ត្រីជំនាញ ក៏បានត្រៀមរៀបចំនូវក្រុមសិល្បៈ សំខាន់សិល្បៈដែលបង្ហាញនូវទម្រង់ប្រពៃណី ទំនៀមទម្លាប់របស់ខេត្ត ដើម្បីចូលរួមសម្ដែង និងបង្ហាញឲ្យភ្ញៀវទេសចរជាតិ និងអន្តរជាតិបានទស្សនាឈ្វេងយល់ផងដែរ » ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងថា ការប្រារព្ធពិធីបុណ្យសមុទ្រ ពិតជាមានសារសំខាន់ណាស់ ដើម្បីឲ្យប្រជាពលរដ្ឋបានយល់ដឹងពីសមុទ្រ និងចូលរួមថែរក្សាបរិស្ថានសមុទ្រឲ្យបានស្អាត និងនិរន្តរភាព ពិសេសជាការលើកកម្ពស់ការផ្សព្វផ្សាយពីសក្តានុពលទេសចរណ៍នៅតំបន់ឆ្នេរទៅកាន់ពិភពលោក ឲ្យបានស្គាល់ច្រើនថែមទៀត ។ លោកបន្តថា ៖« ពិធីនេះក៏ជាការផ្តល់ផលប្រយោជន៍ច្រើនដល់សហគមន៍ជុំវិញតំបន់នោះ ដោយពួកគេអាចលក់ផលិតផលរបស់ពួកគេដល់ភ្ញៀវជាតិ និងអន្តរជាតិផងដែរ » ។ លោកបន្ថែមថា ៖« វិស័យទេសចរណ៍ជាវិស័យស្នូលមួយក្នុងការបង្កើតសកម្មភាពសេដ្ឋកិច្ច ដោយភ្ញៀវទេសចរទៅដល់ទីណា សកម្មភាពសេដ្ឋកិច្ចបានបង្កើតឡើងនៅទីនោះ » ។
ទោះយ៉ាងនេះក្ដី ដើម្បីឲ្យការរៀបចំពិធីបុណ្យលើកនេះកាន់តែរលូន និងទាក់ទាញភ្ញៀវទេសចរជាតិ និងអន្តរជាតិថែមទៀតនោះ ក្រសួងទេសចរណ៍បានដាក់ចេញនូវផែនការសំខាន់ និងចាំបាច់ចំនួន៦ចំណុចដូចខាងក្រោម ៖១-រៀបចំអភិវឌ្ឍន៍ផលិតផលទេសចរណ៍ និងរៀបចំកញ្ចប់ទស្សនកិច្ចនៅខេត្ត ដោយភ្ជាប់គោលដៅទេសចរណ៍ ជាមួយសហគមន៍អេកូទេសចរណ៍ ពិសេសត្រូវរៀបចំឲ្យមានឆ្នេរខ្សាច់មួយ ដើម្បីជាផលិតផលទេសចរណ៍ថ្មីសម្រាប់ខេត្ត ។ ២-ពង្រឹងគុណភាពឧស្សាហកម្ម និងសេវាកម្មទេសចរណ៍ ពិសេសសេវាស្នាក់នៅ ម្ហូបអាហារ ដឹកជញ្ជូន និងរមណីយដ្ឋានទេសចរណ៍ ។ សំខាន់ត្រូវជំរុញចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ និងបដិសណ្ឋារកិច្ចល្អ។ ៣-ការរៀបចំកែលម្អ និងលើកកម្ពស់សោភ័ណភាព សណ្តាប់ធ្នាប់ របៀបរៀបរយ ចរាចរណ៍ អនាម័យ បរិស្ថានស្អាត និងការតុបតែងលម្អនៅទីក្រុង និងតាមទីប្រជុំជននានា ពិសេសការបំផុសចលនាឲ្យប្រជាពលរដ្ឋចូលរួម និងរៀបចំទទួលទេសចរ ។ ៤-ការត្រៀមសម្រួលដល់ការធ្វើដំណើរ និងការស្នាក់នៅរបស់ប្រជាពលរដ្ឋកម្ពុជា និងថៃ នៅខាងទឹកដីថៃ និងទឹកដីកម្ពុជា តាមរយៈការបង្កើនទំនាក់ទំនង និងកិច្ចសហការដ៏ល្អរវាងកម្ពុជា-ថៃ ។ ៥-ត្រៀមរៀបចំកម្មវិធី និងព្រឹត្តិការណ៍នានាក្នុងរយៈពេល៣ថ្ងៃនៃពិធីបុណ្យសមុទ្រ មានដូចជា ការសម្ដែងសិល្បៈវប្បធម៌ ការហែក្បួនព្យុហយាត្រា ការប្រកួតកីឡាលើទឹក លើគោក លើអាកាស ការតាំងពិព័រណ៍ផលិតផល និងម្ហូបអាហារ និងការដាំដើមឈើ ជាដើម ។ ៦-រៀបចំបង្កើតក្រុមការងារអន្តរក្រសួងមួយដើម្បីសម្របសម្រួល និងដំណើរការរៀបចំពិធីបុណ្យសមុទ្រ និងសហការជាមួយក្រុមការងារថ្នាក់ខេត្ត ៕
ចែករំលែកព័តមាននេះ